Lukas 15

1 Garam uda takis da garam asub ampi bingan angu ifa tsuafiê Yisu sib i rima ringan i Arangan. 2 Da Farisai da garam gudzupuê i nan faidagin ini nan pusupusan ibiani, “Garam aruani iti isu rinun rusan angu i garam asub da irut iga nam." 3 Da Yisu ini nan raman ani da ribarangan: 4 “Bida agam mangan mpada tayangê dumpa 100 da gan bits fada sinungê da 99 rumpadan, da garam igi bungê atangin 99 igi rai i puatsi manaê da bungê afa i sauda mangan igi sangêa waêa rutin. 5 Gubuê arangan waêa rutin da bungê auntu da nayung nafa gampan ruta nugun tsiaêan. 6 Da gubuê arangan waêa ungar da bungê ais bangin i rinun rusan da riban mpada uts nampruê da nani rutin, ‘Dzi waê da dumpa gaê saudan ugu da agam nugum watsiaê nampruê da dzi.’ 7 Dzi nani da agam, i sanab bida nigi da rib mpada gunungun nugun bungê atsiaê i garam asub mangan parima i ruan fadan da Anutu, nayus rib rururungan 99 asuban maêan i parima i ruan gin." 8 Da Yisu itip ini, “Ma bida sagat mangan uda moni gan 10 da rima bits rai, da arangan nanga bida anungê? Arangan bungê antang rampi da nasamur ungaran igi da nasau nasangê waêa rutin. 9 Da gubuê arangan waêa rutin da arangan bungê ais bangin i rinun rusan da riban mpada uts nampruê. Da nani rutin, ‘Agam nugum watsiaê nampruê da dzi, i dzi waê da moni gangê saudan ugu.’" 10 Yisu ini, “Dzi nani da agam, i sanab bida nigi da Anutu da gan angira gan inang da nugun itsiaê iyus i garam asub mangan parima i ruan." 11 Yisu rung ini, “Garam mangan narunggan marub iruê impai. 12 Da isiê ini da ramanggan, ‘Ramangê, wafab nam bunumpam u suda wain gin ani dzi gangê.’ Ibinigi da raman ifab nam bunumpan igi isangê narun rusan igi. 13 “Da gubuê iruê ifa sib da narun isiê isub moni i nam bunumpan igi santan. Da arangan iyung ifa gamp bingibing mangan. Da iwaya moni gan santan i sanab maisan bida garam buman uwayantan imingê nigi. 14 Gubuê arangan ntsupa moni gan santan sib da mangits tsiraê iwaê imingê gamp igi santan. Da arangan isau runggan nidzun angu. 15 Ibinigi da arangan ifa gut i garam gamp wain igi mangan i gum da itangin arangan i mpada tayangê ifab i rima nam gada rutin. 16 Da mangits yis arangan funub angu da maran ifur i gada upis gangan ifab gadan igi sufan, da bitsintaê mangan anungê irim arangan sib i nam mangan u. 17 “Gubuê arangan tsanganda runggan da arangan maran ifur da ini, ‘Ai, dzi bubiani! Dzi ramanggaê mamaê guman ugu santan impa bini angu i nam gadan, da mangits ibu is dzi funub angu i nani! 18 Dzi bungê atip nafan da ramanggaê da nani rutin nabiani, “Ramangê, dzi nang asub i Anutu da agu, 19 da dzi anungê rung idaum i u faringêa bida u narunggam. Watsanga dzi nabi u mamaê gumam mangan.”’ 20 “Ibinigi da arangan yuriê da iyung i waêa da ramanggan. Da gubuê arangan rung bada guntiê da ramanggan itsangan da maran intuê i arangan. Ramanggan irunt ifan da arangan da impung da itsutsuf i gian. 21 Da narun ini da raman, ‘Ramangê, dzi nang asub i Anutu da agu. Dzi anungê rung idaum i u faringêa dzi bida u narunggam.’ 22 “Da bitsintaê ramanggan ini da mamaê guman, ‘Wayu ngarukui bini naba sung da watsuf da arangan, da watsuf ring i banginggan da faga gangkang i faganggan. 23 Da agam wayu makau narun dadabungan bini arugu naba da wais funub. Da agi naga nam da nugungê natsiaê gin. 24 I dzi narunggaê aruani imamp sib da maran itip itaê. Gubuê guntiê bingan da dzi watsanga i maran da aruani da dzi tip iwaê rutin.’ Ibinigi da ribarangan iga nam ruta nugun tsiaêan. 25 “Gubuê arigi da rain tsiraê impa gum wasaê sib. Da gubuê arangan basuda uts da ungar, da iringant i mint da nam ngumpan. 26 Da arangan inuê mamaê gum bits i sruêa i nam waêan igi wainggan. 27 Da mamaê gum ini, ‘U rainggam itip ibawaê ngarubini angu, ibinigi da u ramanggam ini da aga is makau narun dadabungan bini arugu gin.’ 28 “Da rain tsiraê nugun itsakia da ibugin atangêa fada ungar igi. Ibinigi da raman iwaê ifa i yafada arangan i atangêa ba. 29 Da bitsintaê arangan ini nan mungaê da ramanggan, ‘Watsangan! Udzuf ampi bingan ugu da dzi nang gum tsiraê bingan i agu. Da dzi anungê isu ringa dadantang i u nanggam nidan. Da bitsintaê agu anungê irim nuning narun mangan da dzi i ruta rinungê rusangê gadan da nugungê nufan! 30 Da bitsintaê gubuê u narunggam aru tapuda u nam bunumpam rai i sanab araraê ugu bawaêan da u is makau narun dadabungan bini arugu gin!’ 31 “Da raman ini, ‘Dzi narungê, gubuê sib angu da u rut dzi mpai, da nam santan dzi gin ani isu u gam. 32 Da bitsintaê agi naga nam da nugungê natsiaê, ibiani u rainggam ani imamp sib da maran itip itaê; agi watsanga i maran da agi tip iwaê rutin.’"