Yowanis 20

1 Gubuê miamun Suntaê maratait nam rungê mimindan da Maria sagat Magadala ifa tauf bampun da itsangan ibi manga rimpingê i tauf tsiraê igi sinungê tauf bampun nifun igi sib. 2 Ibinigi da arangan itip irunt iba da Saimon Petrus da garam atsungêa i Yisu aru Arangan maran arida gin da ini binaê, “Rib fain iyu Nifutsarif riniuriatsan iwaê sib sinungê tauf bampun aga, da aga wasruê i gan rima Arangan gin u!" 3 Ibinigi da Petrus irut garam atsungêa i Yisu mangan igi itangin gamp rai da ifa tauf bampun. 4 Rib iruê igi impruê ruan runta fadan, da bitsintaê garam atsungêa gin mangan igi irunt iyus Petrus da iwaê tauf bampun mungê. 5 Da idzuangê iruê da yarangê yatangê da itsanga bruê tuas aru patiêa Yisu gin ugu rumingêan, da anungê yatangê u. 6 Da Saimon Petrus irunt yatsungê arangan ibawaê da yatangê inting tauf bampun. Da itsanga bruê patiêa Yisu gin ugu rumingêan 7 da bruê patiêa Aranga gudzunggan gin rumingêan nigi rugan i bruê fain igi, ibi manga ipingêan. 8 Ida garam atsungêa gin mangan suda miamun i ruan ugu imus atangêa bampan. Arangan itsangan da imuaruts. 9 Gubuê arigi da ribarangan anungê idzidziwan i nan akaran nida bida Yisu tipa muntida marataê. 10 Ibinigi da rib atsungêa gin iruê igi itip ifa ungaran mpada gin. 11 Maria sagat Magadala imunti irang tauf bampun manaê. Da gubuê arangan rungê rangan da idzuangê iruê i raraba atangêa ntsuf igi, 12 da itsanga angira iruê mpada wasaê igi. Angira iruê igi yatsuf ngarukui maragamp da impa Yisu gan gingêa gin ugu. Mangan impa gudzun da mangan impa fagan. 13 Angira igi gut i Maria ibiani, “Sagat, u rang iyaê?” Da arangan ini binaê, “Rib iyu dzi Nifutsarifangê ifan da dzi wasruê i gan rima Arangan gin u." 14 Gubuê Maria nida nan sib, da iparim i ruan da itsanga Yisu muntidan nigi, da bitsintaê wafaringê Arangan u. 15 Yisu igut i arangan, “Sagat, u rang iyaê? Da u sau mangan igi?” Maria ibuni Arangan garam mpada tayangê gum igi da ini rutin, “Garam tsiraê, bida agu uda Arangan fadan, da wani da dzi i u gam rima Arangan gin da dzi nafayu Arangan." 16 Yisu ini da arangan, “Maria.” Da Maria iparim i maran rutin da ini i nifun nan Hibru ibiani, “Rabonai!” (wainggan ibi ‘Kidungwaga’). 17 Da Yisu ini, “Anungê waripa ngifa dzi, i dzi anungê iwarip iyab ifa da Ramangê u. Wafan da wani da dzi raingê rusangê ugu nabiani, ‘Dzi nang i yaba fadan da Ramanggangê da agam Ramanggam impruê, da Anutu gangê da agam Anutu gam impruê.’" 18 Ibinigi da Maria sagat Magadala itip ifan da ini da rib atsungêa Yisu ibiani, “Dzi tsanga Nifutsarif sib!” Da arangan ini da ribarangan i nan santan Yisu nida rutin. 19 Gubuê miamun Suntaê arigi idziang gan da rib atsungêa Yisu impruê ruan impa ungar wasaê da itsungin muantsi sib i ruan, i ribarangan irat i garam Yuda gudzun rusan. Da Yisu iwaê imunti wasaê i ribarangan da ini ibiani, “Nan nufan narut agam!" 20 Ini nan igi sib da isantingê banginggan da saran da ribarangan. Gubuê riban atsungêa gin tsanganda Nifutsarifan da nugun itsiaê. 21 Da Yisu itip ini, “Nan nufan narut agam! Ramangê itangin dzi iba, i sanab bida nigi da dzi tangin agam ifan." 22 Ini ibinigi sib da igufi nifu pau ifan da riban atsungêa gin da ini, “Agam wau Marapayam Mararam. 23 Bida agam siata garam mangan nanggan maisan rai, da Anutu isiat rai sib. Da bida agam mamida i siata i gan nanggan maisan rai, da gan nanggan maisan rumingê." 24 Gubuê Yisu waêan da riban atsungêa gin, da riban 12 igi mangan binganggan Tomas (nida Didimas in ) anungê impa wasaê impruê u. 25 Ibinigi da riban atsungêa gin fain ini da arangan ibiani, “Aga tsanga Nifutsarif sib!” Da bitsintaê Tomas ini da ribarangan ibiani, “Bida dzi mamida i tsanganda pirim nifun i Arangan bangin da mamida i tsuringêa bangi tsitsin atangêa gin da mamida i rima bangingê i saran, da dzi wasangê i muarutsan u." 26 Suntaê manga fada sib da Arangan riban atsungêa gin itip impruê ruan impai ungar mpada gin ugu, da gubuê arigi da Tomas impa wasaê impruê. Da itsungin muantsi sib i ruan ntuaê. Da Yisu iwaê imunti wasaê i ribarangan da ini, “Nan nufan narut agam!" 27 Da ini da Tomas, “Waba tsuringê bangi tsitsinggam natangê dzi banginggangê da watsangan. Warim banginggam ba dzi sarangê. U wangum anungê suda iruêrun u; wamuaruts angu." 28 Da Tomas ini binaê, “O, dzi Nifutsarifangê da Anutu gangê!" 29 Da Yisu ini da arangan, “U rarab dzi sib da u muaruts, a? Rib mamida i tsanganda dzi da bitsintaê muarutsan nugun natsiaê." 30 Yisu inang nam maran mangan ampi bingan imingê riban atsungêa gin maranggan, da dzi anungê ikakar santan iruê papiar ani u. 31 Da bitsintaê dzi kakar nan ani i agam muarutsa Yisu igi Kristus, Garam Anutu Ragadan, da Anutu Narunggan. Da bida agam muarutsan da agam bungê ayu nam mpada maran taêan i Arangan binganggan.