Yowanis 19

1 Ibinigi da Pilatus ini da garam singaari iyu Yisu ifan da idzibi. 2 Garam singaari iyu bruê maradantang da ifir imimuan gin isu dampun gudzun da yatsuf iruê Yisu gudzun. Da yari ngarukui biê bini bida king gan iyab i Arangan. 3 Da ribigi iba munti Arangan maran da iyasi Arangan ini binaê, “O Yuda King gan! Aga tsarif agu.” Da imus ipuak Arangan. 4 Pilatus itip iwaê ba da ini da garam Yuda ini binaê, “Agam watsangan! Dzi tip iyu garam ani iwaê ba da agam, i agam sruêa gin bida dzi watsanga asub i garam ani mangan u." 5 Gubuê Yisu waêa ba ntingan da dampun gudzun maradantang riman da ngarukui biê atsufan, da Pilatus ini binaê, “Agam watsangan! Garam agam nidan ugu arani!" 6 Gubuê garam pumuêa Anutu wain gudzun rusan da garam singaari ruas mpada tayangê Ungar Mararam tsanganda Arangan, da inuê nifun tsiraê bingan ini binaê, “Wais arangan nayab gai mpara i ruan! Wadintip arangan nayab gai mpara i ruan!” Da bitsintaê Pilatus ini ribigi nifunggan mungaê ibiani, “Agam runggam wayu arangan da wadintip wayab gai mpara i ruan! Dzi anungê iwaê da asub mangan garam ani gan nangan u." 7 Da garam Yuda gudzun rusan ini nan mungaê ibiani, “Aga nanggangê faidagin mangan rumingê da ini arangan mampan, i arangan ifaringê runggan isu Anutu Narunggan." 8 Gubuê Pilatus ringanta i nan igi da irat tsiraê bingan angu gin, 9 da itip yatangê ifa ungar wasaê da igut i Yisu ini binaê, “U ba imingê anungê?” Da bitsintaê Yisu wani nan mungaê u. 10 Pilatus ini da Arangan ibiani, “U bugin nida dzi nanggangê mungaê, a? U mami sruêa i dzi nampanggangê nida nifungê i tanginda agu waêan ma isa agu funub yaba gai mpara i ruan?" 11 Yisu ini arangan nifunggan mungaê ibiani, “Bida Anutu damami rima nampang igi da agu, da u anungê isangê i nanga nam mangan i dzi u. Ibinigi da manga aru rima dzi ba u banginggam igi nanggan maisan nangan tsiraê bingan iyus agu gam." 12 Pilatus iringant i nan igi da isau sanab i rima Yisu sib i tanginda Arangan fadan, da bitsintaê garam Yuda gudzun rusan runuê ini binaê, “Bida u tanginda arangan fadan da agu anungê Kaisar rinunggan u! Manga nanga i nida runggan suda king, da irim ipiap i Kaisar." 13 Gubuê Pilatus ringanta i nan igi da arangan iyu Yisu iwaê ba da impa iruê bintip raruda garam gin imingê mumai faringêa nida Tauf Fafusan Tsiraê Yunga Gin; mingêa nifu nan Hibru da ifaringê ini Gabata. 14 Gubuê arigi gubuê tipa nam gadan maran fura gubuê mararam tsiraê Angira Atupa Sib. Da gubuê maran ibi gubuê wasaê, da Pilatus inuê ini da garam Yuda ibiani, “Agam wararab gam king gam ani." 15 Da bitsintaê ribarangan itip inuê ini binaê, “Wais arangan! Wais arangan funub! Wadintip arangan nayab gai mpara i ruan!” Pilatus igut i ribarangan ini binaê, “Agam ini dzi dintipa agam king gam yaba gai mpara i ruan, a?” Da garam pumuêa Anutu wain gudzun rusan ini arangan nifunggan mungaê ibiani, “Kaisar angu isu aga king gangê!" 16 Ibinigi da Pilatus itangin Yisu ifan da garam singaari i isa arangan funub yaba gai mpara i ruan. Idintip Yisu Iyab Gai Mpara i Ruan (Matiu 27:32-44; Markus 15:21-32; Lukas 23:26-43) Ibinigi da garam singaari iyu Yisu ifan. 17 Da Arangan runggan ibuaringê gai mpara i ruan gan da itangin gamp tsiraê igi rai da ifa mumai faringêa nida Gudzu Urun. Da mingêa nifu nan Hibru da ifaringê ini Golgota. 18 Mingêa nigi da idintip Yisu iyab gai mpara i ruan impruê da garam iruêrun. Mangan imingê Arangan bangin bini da mangan imingê Arangan bangi yas, da Yisu imingê wasaê. 19 Pilatus ini da garam ikakar nan mangan ibiani, “YISU, GARAM NASARET, GARAM YUDA KING GAN,” da yis iyab Yisu gai mpara i ruan gan. 20 Da garam Yuda ampi bingan ifaringê nan kakaran igi, i wain, mumai Yisu tupriêa gin igi imingê uts da gamp tsiraê, da ikakar nan igi i nifu nan Hibru da Latin da Grik. 21 Ibinigi da garam Yuda garaman pumuêa Anutu wain gudzun rusan ini da Pilatus ibiani, “U anungê kakara, ‘Garam Yuda King gan’ u; imaê, wakakar nabi garam igi ini runggan garam Yuda King gan." 22 Pilatus ini ribarangan nifunggan mungaê ini binaê, “Nan idzuwai dzi kakaran, da dzi kakar." 23 Gubuê garam singaari dintipa Yisu yaba gai mpara i ruan sib, da iyu Arangan nanggan atsufan da ifab isu iruê da iruê isangê ribarangan. Da iyu i gan ngarukui gan impruê, da bitsintaê itsangan ibi intang ngarukui igi santan isu bitsintaê angu imingê wagungê ibawaê warangê. 24 Ibinigi da ini da ruan, “Agi anungê garidan u. Agi nantungê rarub i tsanganda manga sangê i udan.” Nigi waê i nanga nan kakaran bida ani suda nidzun, “Ribigi ifab dzi nanggangê atsufan isangê runggan da yantungê rarub i dzi ngarukui gangê.” Ibinigi da garam singaari inang nam bida nigi. 25 Yisu rinanggan da rinanggan rainggan da Klopas fininggan Maria da Maria sagat Magadala imunti uts angu da gai mpara i ruan Yisu tupriêa gin. 26 Gubuê Yisu raraba rinanggan ruta Arangan garaman atsungêa gin aru maran arida gin ugu mpruêa ruan muntida nigi, da ini da rinanggan, “Rinangê, nigi da agu narunggam." 27 Da itip ini da garaman atsungêa gin igi, “Nigi da agu rinanggam.” Da gubuê arigi fadan da gan garaman arigi iyu Arangan rinanggan ifa gan ungaran i mpada tayangê gin. 28 Raiyi da Yisu isruê gin i gan guman nangan santan iba ntsup sib, da ini, “Dzi wangê itsaraê,” i nanga Anutu nanggan kakaran suda nidzun. 29 Gubuê arigi da gur mangan imingê igi da wain gurun ngkiangan imingê gin, da ribigi iyu gai bangin mangan ripida bruê gin da itugu iruê wain gurun igi da yintsi iyab Yisu nifun. 30 Da gubuê Yisu numa sib da ini, “Intsup sib wa.” Da irim antungê iruê da itangin ganunggan ifan. 31 Gubuê arigi da gubuê tipa ruan i nam gadan i gubuê Sabat, da rib Yuda garam gudzunggan ibugin i garam dintipa yaba gai mpara i ruan rungê tupriêan da gubuê Sabat, i gubuê Sabat arigi gubuê mararam tsiraê. Ibinigi da ribarangan igut i Pilatus i nida nifun da garam singaari isa garam ruguda ruan gai mpara i ruan igi fagan dzudziê i mampa sung da uda fadan. 32 Ibinigi da garam singaari ifan da yis garam iruê dintipa mpruêan da Yisu ugu fagan dzudziê. 33 Da gubuê ribarangan badan da Yisu, da itsangan ibi Arangan imamp sib, da anungê yis Arangan fagan udziê u. 34 Da bitsintaê garam singaari igi mangan intang Yisu saran i singan da sung angu gan biê gan da mpui gan itsururuê. 35 Garam muntidan da tsanganda nam santan waêan igi ifis i nan igi wasi, da gan nanggan fisa gin igi nan nidzun bingan. Arangan isruê gin i arangan ini nan nidzun da ini wasi da agam, i agam muarutsa bida nigi. 36 Nam igi iwaê i nanga nan kakaran suda nidzun bida ani, “Ribigi wasangê i isa arangan urun mangan udziê u," 37 da nan kakaran mangan ini ibiani, “Ribigi bungê ararab garam aru ribarangan ntangan." 38 Raiyi da garam mangan binganggan Yosef, mpada mingêa gamp Arimatia, ifa gut i Pilatus i uda Yisu riniuriatsan fadan. Arangan garam mangan atsungêa Yisu, da bitsintaê irat i garam Yuda garam gudzunggan da idzigin runggan angu. Pilatus ini nifun, da arangan ifayu Yisu riniuriatsan ifan. 39 Da Nikodimus, garam aru badan da Yisu da idziang mangan ugu, iba impruê da Yosef. Arangan iyu nam rini gaunt ngarubini funub tipa i gai iruêrun iba, gan barabin gan isangê ibi 30 kilogram. 40 Tuasarangan iyu Yisu riniuriatsan da irim nam rini gaunt ngarubini igi gin da ipatiê i bruê ibi garam Yuda gan sanaban atsungêa gin i rima garam mampan. 41 Mingêa uts da gai mpara i ruan Yisu tupriêa gin igi, da gum mangan imingê. Da mingêa gum igi da tauf bampun faê mangan imingê, da warim garam mampan manga gin u. 42 Wain ibi garam Yuda gubuê gan tipa ruan i gubuê Sabat igi, da tuasarangan ifa rim Yisu i tauf bampun arigi, i imingê uts angu.