Yowanis 18

1 Gubuê Yisu ntsupa nanggan uda gin sib, da irut riban atsungêa gin itangin nigi rai da iyung ifa bump Kidron marafain. Gum oliv mangan imingê igi, da Arangan irut riban atsungêa gin yatangê gin. 2 Yudas, garam rima Yisu fada garam ipiap banginggan, isruê i gum igi sib, i gubuê fain da Yisu irut riban atsungêa gin iti ifa mpa nigi. 3 Da garam pumuêa Anutu gudzun rusan da Farisai ruas itangin garam singaari mpada tayangê Ungar Mararam fain ifan da Yudas. Da Yudas iyu garam singaari Rom fain impruê da imungê gin iba gum igi inting da dzaf tsitsuê da rampi da singan. 4 Yisu isruê i nam santan nida waêan da Arangan igi da ifa gut i ribigi, “Agam isau mangan nigi?" 5 Ribarangan ini Arangan nifunggan mungaê ibiani, “Yisu, Garam Nasaret ugu.” Da Yisu ini binaê, “Dzi Arangan Aruani.” Da Yudas, garam rima Arangan fadan da garam ipiap, imunti nigi impruê da ribigi. 6 Gubuê Yisu nida binaê, “Dzi Arangan Aruani,” da ribarangan ifa barun barun da iruaê iruê intap. 7 Da Arangan itip igut i ribarangan, “Agam isau mangan nigi?” Da ribarangan ini, “Yisu, Garam Nasaret ugu." 8 Yisu ini ribarangan nifunggan mungaê ibiani, “Dzi ni da agam i Dzi Arangan Aruani! Bida agam sauda dzi badan da agam wanang da garam fain ani nafan." 9 Nam igi waê i nanga nan Arangan nidan ugu suda nidzun: “Dzi watiri garam aru U tangindan da dzi ugu gan manga rai u." 10 Da Saimon Petrus, uda bainat ugu, itus bainat iyab da itsapi garam pumuêa Anutu wain tsiraê garam guman mangan ringan bini utrap. Garam gum igi binganggan Malkus. 11 Yisu ini da Petrus ini binaê, “Wantsungê bainatam arigi naruê! Ibianungê? U tsanga ibi dzi wanasangê i numa i kap Ramangê riman da dzi ani u, a?" 12 Garam singaari da gan garam gudzun gan da garam singaari mpada tayangê Ungar Mararam bada mingêa garam Yuda gudzun rusan ugu impung Yisu da yudzu Arangan bangin. 13 Da iyu iba da Anas, Kaiafas fininggan ramanggan, isu miamun. Da Kaiafas impa ibi garam pumuêa Anutu wain gudzunggan tsiraê da gubuê arigi. 14 Da arangan garam aru nidan da garam Yuda gudzun rusan nida binaê, “Bini iyus i garam bitsintaê angu mampa i uda ampan tsiraê mumai gan." 15 Saimon Petrus irut Yisu garaman atsungêa gin mangan yatsungê Yisu. Garam pumuêa Anutu wain tsiraê isruê i Yisu garaman mangan nigi, ibinigi da garam arigi irut Yisu yatangê garam pumuêa Anutu wain tsiraê ntiang gan. 16 Da bitsintaê Petrus rungê imunti muantsi nifun. Da Yisu garaman atsungêa gin aru garam pumuêa Anutu wain tsiraê sruêa gin igi itip iwaê ba da itip nan da sagat gum muntida tayangê muantsi da iyu Petrus yatangê. 17 Da sagat gum igi igut i Petrus, “Mabi arangan garaman atsungêa gin mangan agu?” Da Petrus ini, “Imaê! Anungê dzi u." 18 Garam gum da garam singaari mpada tayangê Ungar Mararam ruas yarungê dzaf da imunti imaf rinin gin, i nam irangarang wasi. Da Petrus ibinigi imunti impruê ribigi da imaf rinin. 19 Gubuê arigi da garam pumuêa Anutu wain tsiraê igut i Yisu i riban atsungêa gin da nanggan fisa gin. 20 Da Yisu ini binaê, “Dzi fis i nan dzidziwandan wasi da ampan tsiraê imingê nam manaê da ungar mpruêa ruan gin da Ungar Mararam ntiangê gan wasaê aru garam Yuda santan mpruêa ruan gin, da dzi wadzigin nan mangan u. 21 Ibianungê da u gut i dzi? Wagut i rib ringanta i dzi aga. Ribarangan isruê i nan idzuwai dzi fisa gin." 22 Gubuê Yisu nida nan igi da garam singaari mpada tayangê Ungar Mararam mangan muntida uts ipuak Yisu da ini, “Nigi sanab bini i u nida nan mungaê da garam pumuêa Anutu wain tsiraê, a?" 23 Da Yisu ini, “Bida dzi nida nan manga asub da wani wasi! Da bida dzi nida nan nidzun, da ibianungê da u puak dzi?" 24 Ida Anas itangin Arangan ruta bangin dzura sib ifan da garam pumuêa Anutu wain tsiraê Kaiafas. 25 Wasaê aru Petrus rungê muntida mafa rinin i dzaf, da ribigi igut i arangan ini binaê, “Da agu binigi, u su arangan mamaê gan manga atsungêa gin mpruêan, a?” Da arangan ini ribigi nifunggan mungaê ini binaê, “Aêa! Anungê dzi u!" 26 Da garam pumuêa Anutu wain tsiraê garam guman mangan imunti nigi, da iba imingê garam Petrus tsapida i ringan utrap ugu utupan. Da ini da arangan, “Dzi wanatungê marangê tsanganda agu mpruêan da garam igi mingêa gum aga ugu, a?" 27 Da Petrus itip itungê maran i arangan, da gubuê arigi rururungan da tatariê ikakarak. 28 Maratait santan da rib Yuda garam gudzun rusan iyu Yisu imingê Kaiafas ungaran ifan da Pilatus, garam Rom mpada tayangê intap Yudia, i ungaran tsiraê mpada gin da nanga guman gin. Maran ifur i anungê nanga runggan bubumpuadan mingêa Anutu maran u, i ribarangan ini gada nam gadan tsiraê i maran fura gubuê Angira Atupa Sib. Ibinigi da ribarangan anungê yatangê ifa ungar igi wasaê gan u. 29 Imunti manaê angu da Pilatus iwaê ba da igut i ribarangan, “Agam irarab garam ani asuban nangan idzuwai da agam ini rarudan?" 30 Da ribarangan ini nan mungaê ini binaê, “Bida aranga garam mamida nanga asub, da aga wasangê uda aranga bamuntida agu maram u." 31 Da Pilatus ini biani, “Agam runggam wayu aranga biaê da wararu nasangê agam nanggam faidagin nidan.” Da rib Yuda igi ini nan mungaê ibiani, “Rom nanggan faidagin ini aga wasangê i isa garam mangan funub u." 32 Nigi iwaê yatsungê Yisu nanggan nidan da ragidan ugu yaba i sanaban mampan bungê awaê nabianungê, da nan igi iwaê isu nidzun. 33 Ibinigi da Pilatus itip yatangê ifa ungar da inuê Yisu yatangê ifan da igutin ini binaê, “Garam Yuda King gan agu, a?" 34 Yisu itip igut i arangan ini binaê, “Nigi agu uwayantam ma garam fain ini dzi wasi da agu?" 35 Pilatus ini Arangan nifunggan mungaê ini binaê, “Mani dzi garam Yuda, a? U garamam da garam pumuêa Anutu wain ruas itangin agu ba dzi banginggangê. Da u nang asub idzuwai?" 36 Yisu ini arangan nifunggan mungaê ini biani, “Dzi nanggangê mpada tayangê gangê garamangê bida king wamingê intap ani u. Dabi damingê intap ani, da dzi garamangê madasif ngants i dzi, da rib Yuda wadasangê mpunga dzi u. Da bitsintaê aruani da dzi nanggangê mpada tayangê gangê garamangê bida king wamingê intap ani u, imaê." 37 Da Pilatus ini, “Ibinigi da agu king, a?” Da Yisu ini arangan nifunggan mungaê ini binaê, “U runggam ini i dzi king. Rinangê yapingê dzi da dzi ba intap ani i wain ibiani, i fisa i nan nidzun wasi. Da garam santan maran arida i nan nidzun da uda yaban, da iringant i dzi nanggangê da yatsungê gin." 38 Da Pilatus itip ini, “Da agi nabusruê i nan nidzun igi nabianungê?” Rib Yuda Gudzun Rusan Ini Isa Yisu Funub (Matiu 27:15-31; Markus 15:6-20; Lukas 23:13-25) Pilatus itip iwaê ungar ba da garam Yuda gudzun rusan da ini binaê, “Dzi wawaê da garam ani asuban mangan nangan u. 39 Da bitsintaê agam isruê i agi sanabangê dzi nangan da gubuê Angira Atupa Sib da udzuf santan, i tanginda garam manga fada sinungê karabus. Da agam maram ifur i dzi tanginda garam Yuda king gan biaêan da agam?" 40 Da ribigi inuê nifun tsiraê bingan ini binaê, “Anungê nigi u! Watangin Barabas ba da agai!” Barabas igi garam ruta gabman Rom isa ruan da isa garam funub.