Yowanis 17

1 Gubuê Yisu nida nan igi sib, da idantangê iyab gunungun da yugin ibiani, “Ramangê! Gubuê maran ibawaê sib. Warim bingan tsiraê da Narunggam, i U Narunggam bungê arim bingan tsiraê da Agu. 2 I U rim nampang da arangan sib i suda wain i garam gar sib angu, i arangan rima nam mpada ratar ntingan angu da rib santan aru Agu runggam tangindan da arangan ugu. 3 Nam mpada ratar ntingan angu igi ibiani, sruêa i Agu, Anutu wain bitsintaê nan nidzun angu, mpruêan da Yisus Kristus aru Agu tanginda badan ugu. 4 “Dzi santingê Agu nampanggam da binganggam tsiraê wasi imingê intap ani sib iyab i gum U riman da dzi i nangan da dzi ntsupa sib. 5 Ramangê, gubuê intap mamida waêan ugu, da dzi rut Agu impruê ruangê mpadan da dzi yu bingan tsiraê impruê. Da aruani da watip warim bingan tsiraê igi da dzi da gubuê dzi tipa ruta Agu mpadan. 6 “Dzi kupis Agu wasi da rib U runggam piriangêan sinungê garam intap ani da tangindan da dzi. Ribani su Agu gam, da U tangin da dzi, da ribarangan isu ringa mafrip da yatsungê i Agu nanggam. 7 Aruani da ribarangan isruê gin i nam santan U tangindan da dzi igi iba imingê Agu runtaê angu gin. 8 I dzi santingê ribarangan i nan santan U riman da dzi ugu, da ribarangan iyu iyab da isruê gin nidzun angu ibi dzi rut Agu impai da dzi ba. Da ribarangan imuaruts ibi U tangin dzi iba. 9 “Dzi yugin i ribarangan da anungê garam intap santan u, rib aru U riman da dzi ugu angu, i ribarangan isu Agu gam. 10 Rib santan mingêa dzi gin isu Agu gam, da rib santan mingêa Agu gin isu dzi gangê. Da ribigi irim bingan tsiraê da dzi sib. 11 “Dzi wasangê rumpada intap ani u, da bitsintaê ribani rubungê ampa intap ani, da dzi bungê abiaê da Agu. O Ramangê Mararam Wain, wampa tayangê ribani i U binganggam aru U riman da dzi ugu riniurun gan, i ribarangan suda bitsintaê bida agi su bitsintaê. 12 Gubuê aru dzi ruta ribani mpadan da dzi mpa tayangê ribarangan bini i bingan aru U riman da dzi ugu riniurun gan. Da ribarangan santan impa bini, da garam bitsintaê angu aru U tagada mungê ugu, arangan runtaê irim runggan rai. Nigi iwaê i nanga U nanggam kakaran suda nidzun. 13 “Gubuê aruani da dzi nang i biaêan da Agu, da dzi ni nan tuas aruani da gubuê dzi rungê mpada intap ani, i dzi nugungê tsiaêan gangê sisungêa ribani wangunggan ntingan angu. 14 Dzi ragi U nanggam wasi da ribani sib, da garam intap ani irim ipiap i ribarangan, i ribarangan wasu intap ani gan ibi dzi wasu intap ani gan u. 15 Dzi wagut i Agu i U uda ribani sinungê intap ani u, da bitsintaê U mpada tayangê ribarangan bini i Garam Maisan anungê wayada ribarangan u. 16 Ribani anungê isu intap ani gan u, ibi dzi anungê isu intap ani gan u. 17 Agu nanggam igi nan nidzun bingan. Da wanang ribani nasu U nanggam mararam i U nan nidzun gam. 18 Ibi aru U tanginda dzi bada intap ani ugu, da dzi tangin ribani ifa intap da intap. 19 Da dzi rim runggangê santan da Agu i ribarangan bida nigi suda U garamam mararam rururungan i nan nidzun. 20 “Dzi anungê yugin i ribarangan angu u, dzi yugin i rib ringanta i dzi nanggangê mingêa ribani nifunggan fisa gin da muarutsa dzi, 21 i ribarangan sib angu suda bitsintaê, bida Ramangê U mpa dzi wasaê da dzi mpa Agu wasaê. Da ribarangan nampa Agu da dzi wasaê, i garam intap tsangandan da muarutsa bida U tangin dzi iba. 22 Dzi rim bingan tsiraê aru U riman da dzi ugu sib da ribarangan i suda bitsintaê bida Agu da dzi suda nam wain bitsintaê ugu. 23 Dzi mpa ribarangan wasaê da U mpa dzi wasaê, i ribarangan suda bitsintaê nidzun angu. I sanab bida nigi da garam intap santan nasruê gin nabi U tangin dzi iba da U maram yari i rib muarutsa dzi isangê ibi U maram arida i dzi. 24 “Ramangê, dzi ni rib U riman da dzi ugu i ruta dzi mpada gamp dzi mpada gin aga da tsanganda dzi nampanggangê da binganggangê tsiraê aru U riman da dzi mungê ugu. U rim da dzi, i wain, U maram yari i dzi da gubuê intap mamida i waêan. 25 Ramangê rururungan wain, garam intap wasruê i Agu u, da bitsintaê dzi sruê i Agu. Da dzi ribangê tuas arani isruê gin ibi U tangin dzi iba. 26 Dzi ni Agu wasi da ribarangan, da dzi rubungê asantingê Agu wasi nabinigi, i U nanggam maran aridan aru U maram arida i dzi igi namingê ribarangan wangunggan da dzi nampa ribarangan wasaê gan."