Miamun 38

1 Mingêa gubuê igi da Yuda itangin rain rusan rai da iruê i ruta garam bits mpada Adulam binganggan Hira. 2 Mpadan nigi da Yuda iwaê da garam Kanan bits, binganggan Sua, narun finam. Arangan iyu da irut impai. 3 Da sagat iwangun da irim arangan narunggan marub mangan da inuê arangan binganggan Er. 4 Impai da sagat igi itip iwangun da irim narun marub mangan da ifaringê i binganggan Onan. 5 Impai da arangan itip iwangun da irim narun marub mangan imingê gamp Kedzib da inuê arangan binganggan Sela. 6 Gubuê Yuda narunggan marub miamun Er suda garam sib, da ramanggan iyu sagat mangan rutin, binganggan Tamar. 7 Da bitsintaê Er iwaê maisan imingê Yawe maranggan da Yawe yis arangan funub. 8 Da Yuda ini da Er rainggan Onan ibiani, “Warut rainggam sagat yarufan wagingê natsungê agi sanabangê, i rima narun rutin i utusa u rainggam yanginggan rungê fadan." 9 Da bitsintaê Onan isruê gin sib ibi mamaê narun igi wasangê i suda arangan gan u, ibinigi da gubuê arangan ruta rainggan sagat yarufan igi gingêan da inang da iyats mpui iran gan rai iruê intap i Tamar anungê wangundan da rima narun i utusa rainggan yanginggan u. 10 Yawe itsangan Onan sanaban nangan igi iwaê maisan i maranggan, da yis arangan funub. 11 Yuda irat i narunggan Sela mampan bida rain rusan ugu. Ibinigi da ini da bunggan Tamar ibiani, “Watip wafan da wampa ramanggam gampan nabi sagat yaruf nasangê dzi narunggangê Sela yingêa suda garam sib.” Ibinigi da Tamar itip ifa ramanggan gampan i ruta riban mpadan. 12 Yuda impai nigi gubuê guntiê bingan da arangan fininggan, Sua narun finam, imamp. Arangan impai isangê arangan maran dzidziwandan, da arangan irut rinunggan Hira, garam Adulam, ifa Timna i tsanganda garaman trapa arangan dumpa gan rinifufun. 13 Gubuê rib fain nida sisingê da Tamar nida binaê, “U bunggam ini fada Timna i trapa dumpa gan rinifufun," 14 da Tamar igruê umpuafan rai da ipatiê gudzun da maran sib i bruê paparatan i manga anungê faringêa arangan u, da impa gamp Inaim muantsi nifunggan imingê sanab fada gamp Timna. Arangan itsangan ibi Sela isu garam sib da Yuda watsungê nanggan i Sela uda arangan suda i fininggan u. 15 Ibinigi da gubuê Yuda tsanganda arangan da ini sagat sanab angu gin, i arangan ipatiê maran sib. 16 Arangan anungê isruê gin ibi arangan bunggan u, da yis sanab udziê ifan da ini, “Amaê. Dzi ni ruta agu gingêan.” Da arangan ini, “Bida u ruta dzi gingêan da u burima nam idzuwai da dzi?" 17 Da Yuda ini, “Dzi bungê atangin nuning naru faê bits mingêa dzi apu gangê mpada tayangê gin naba da agu.” Da Tamar itip igutin, “Hai. Da isangê u rima nam mangan mungê da dzi i santingêa bida u ni nan nidzun da dzi, nasangê u rima nigi badan?" 18 Da arangan ini, “U maram yari i nam idzuwai arigi i dzi riman da agu?” Da Tamar ini, “U nanggam sungundan suda u maram nampruê da u itipam yunga gin.” Ibinigi da Yuda irim da arangan da irut igingê da arangan iwangun. 19 Tamar itiri Yuda rai da ifan. Da igruê bruê paparatan buafira maran sib in ugu rai, da itip yatsuf umpuafan. 20 Yuda itangin rinunggan Hira, garam Adulam ugu, i uda nuning naru faê i fada da sagat ruta gingêan ugu da tipa uda i gan nanggan riman rutin ugu, da bitsintaê isau arangan wasi. 21 Da igut i garam mpadan nigi ini binaê, “Sagat sanab mpada sanab ringan Inaim ani impa anungê?” Da ribigi ini binaê, “Sagat sanab mangan wampai ani mangan u." 22 Ibinigi da arangan itip ifan da ini da Yuda ibiani, “Dzi sau sagat arangan da dzi wawaê rutin u. Garam mpadan naga ini da dzi ibiani, ‘Sagat sanab mangan wampai ani mangan u.’" 23 Da Yuda ini, “Arangan runayu nam igi. Dzi bugin agi rusaudan da ampan rubungêa ruan i agi. Dzi rim nuning igi ifan da arangan ibi dzi nida rutin ugu. Da bitsintaê u wawaê da arangan u. Da isangê i." 24 Ukam iruê da bits ifa sib da rib fain ini da Yuda ibiani, “U bunggam Tamar inang runggan ibi sagat sanab. Da aruani da arangan iwangun sib.” Da Yuda ini, “Wayu arangan waba da wafanga i dzaf nasangê arangan mampan." 25 Gubuê garam uda arangan waêa ba, da arangan irim nam bunggan riman ugu da sisingê ibiani ifan da bunggan, “Garam suda wain i nam bida ani iwaê da dzi, da dzi wangun. Watsangan da wafaringê i manga nam maranggan da itipan yunga gin ani." 26 Yuda isruê gin da ini, “Arangan wanang asub u; dzi su asub. Arangan inang sanab igi i dzi warim arangan da narunggangê Sela ibi dzi nidan.” Da Yuda watip irut igingê u. 27 Tamar gubuê gan nanga i apingêan da mamaê marub bampungê imingê arangan wangun wasaê. 28 Gubuê aru arangan apingêan igi da mamaê narun mangan yintsi bangin imungê ba. Da sagat rima sib idzur fufuai biê i arangan bangin da ini, “Mamaê narun aruani isu miamun." 29 Da bitsintaê mamaê narun igi itip intsruk bangin yatangê ifan da gan rainggan isu miamun i waêa ba, da sagat rima sib ini, “U brang gudzum i muantsi da u waê ba.” Da ifaringê arangan binganggan Perets (wainggan ibi ‘brangêa muantsi i waêan’). 30 Ida rainggan udzuda fufuai biê i bangin ugu iwaê yatsungê arangan ba. Da ifaringê arangan binganggan Tsera (wainggan ibi ‘dzadzaniangan’).