Miamun 37

1 Yakop impa intap Kanan, gamp arangan ramanggan mpada gin mungê ugu. 2 Yakop da narun rusan nanggan ibiani: Yosef mamaê faê, udzufan 17, irut rain rusan, Yakop finin rusan Bilha da Tsilpa narun rusan, impa tayangê gan dumpa gan da nuning gan. Da Yosef iba da ini rain rusan igi nanggan maisan nangan wasi da ribarangan ramanggan. 3 Israil maran yari nidzun angu i Yosef iyus narun rusan fain igi, wain ibi arangan ifufi da Yosef iwaê. Ibinigi da arangan itip ngarukui grigriê guntiê bini mangan da Yosef. 4 Da gubuê arangan rain rusan tsanganda bida ribarangan ramanggan irim wangun nidzun angu da arangan iyus ribarangan, da nugun iruaê i arangan da ifiê i nan angu rutin. 5 Gubuê mangan da Yosef ipuafub da ifis i nanggan puafuban da rain rusan. Da rain rusan ringantagin da nugun iruaê nidzun iyus i arangan. 6 Yosef ini da rain rusan ibiani, “Agam waringant i dzi nanggangê puafuban dzi tsangandan: 7 Dzi tsangan agi santan impruê ruangê udzuda wit punpun sangêa ruangê mingêa gum wasaê. Da gubuê agi udzudan da dzi gangê sung angu iraiê i ruan da imunti rururungan angu yab da agamam iba mingê iwafiê dzi gangê da irim antungê iruê rutin." 8 Da rain rusan ini binaê, “U maram mafur i suda king da mpada tayangê agai? Ma u mani suda gudzun i aga santan?” Ribarangan nugun iruaê nidzun angu i arangan da ibugin arangan i nanggan puafuban da gan nanggan fisagin. 9 Da arangan itip itsanga nam puafuban mangan da itip ifisin da rain rusan ini binaê, “Agam waringantin. Dzi tip itsanga nam puafuban mangan. Dzi tsanga gubuê da ukam da ngantam 11 idzaêa fagan da dzi." 10 Arangan ifis i nanggan puafuban igi da ramanggan da rain rusan. Da arangan ramanggan impiê arangan da ini, “U nanggam puafuban igi ibianungê? U mani rinanggam da dzi da raim rusam badan da idzaêa fagangê ruêa agu maram?" 11 Arangan rain rusan ifis i arangan, da bitsintaê arangan ramanggan maran ifur i nan ampi bingan iyus imingê i uwayantan i arangan nanggan puafuban igi. 12 Gubuê mangan Yosef rain rusan ifa Sekem sib i mpada tayangê ribarangan ramanggan dumpa gan, 13 da Israil ini da Yosef ibiani, “U raim rusam impa tayangê dumpa imingê uts da gamp Sekem. Da dzi ni u atsungêa raim rusam da tsanganda ribarangan.” Da Yosef ini, “Hai, ramangê. Dzi bungê afan i." 14 Da ini da arangan impruê ibiani, “Wafa tsanga raim ruas nanggan mpadan da mpada tayangê dumpa ibianungê. Watsanga sib da watip wau sisingê waba da dzi.” Ibinigi da Yakop itangin Yosef imingê bump Hibron ifan i arangan impa imingê nigi. Gubuê Yosef fawaê sib Sekem, 15 da garam mangan itsangan arangan yunga mingêa puatsi manaê igi bafadan da igutin, “U sau wai?" 16 Da arangan ini, “Dzi sau raingê rusangê. Da bida u tsanganda ribarangan gan fada gin da mpada tayangê dumpa gan gin, da isangê i u ntuangêa ribarangan gan mpada gin da dzi?" 17 Da garam igi ini arangan nifunggan mungaê ibiani, “Ribarangan itangin nani rai da ifa sib. Dzi ringant i ribarangan nida nan da ruan bida ani, ‘Agi fada Dotan.’” Ibinigi da Yosef yatsungê rain rusan da iwaê da ribarangan santan imingê Dotan. 18 Da bitsintaê gubuê ribarangan tsanganda Yosef fada ruguntiê i ribarangan da musa bawaêan, da yudzu nan i isa arangan funub. 19 Da ini da ruan ini binaê, “Ariê tsangan! Garam puafuba funub angu ugu iba. 20 Yaê! Agi isa arangan funub da tapuda ruêa ntsuf utaê ani mangan, da nani apu buman mangan igara arangan funub. Da agi natsanga i gan nanggan puafuban igi nakap nidzun nabianungê." 21 Gubuê Ruben ringanta i nan ribarangan tipan igi da yintsaê nan i rima arangan sib sinungê ribarangan banginggan da ini, “Agi anungê isa arangan funub u. 22 Agi runggangê anungê suda bangi biê. Watapu waruê ntsuf mpui riêa gin mingêa nam dadauntan ani, da anungê wayada arangan u.” Ruben ini nan ibinigi i maran ifur i rima arangan sib da tipa uda arangan maradzigin angu badan da ramanggan. 23 Ibinigi da gubuê Yosef bawaêan da rain rusan, da ribarangan impung arangan da igruê i gan ngarukui gan griêgriê guntiê bini igi sinungê 24 da iyu arangan ifan da itapu iruê ntsuf mpui riêa gin igi. 25 Ribarangan impruê ruan impai i nanga i gada nam, da iraiê i maran da itsangan garam Ismail ruta gan kamiran mingêa gamp Giliat bada i ruêa Idzip. Gan kamiran iyu nam bunump bida ani iyus: asam ma wasub wasub da gai gurun gaunt waêa bini. 26 Yuda ini da rain rusan ini binaê, “Bida agi isa rainggangê funub da buafira agi nanggangê suda bangi biê igi, da nigi nabu rim agi sib nabianungê? 27 Agi natangin arangan nafan da rib Ismail badan aga, nasu mamaê gum utaê angu, da agi anungê wayada bangingê i arangan mangan u. Nigi agi rainggangê, agi biê gangê rururungan.” Da rain rusan iyu nan igi iyab. 28 Da gubuê garam Midian suba nam bunump fain bawaêan da Yosef rain rusan yuntap i arangan iyab sinungê ntsuf da itangin arangan da garam Ismail igi (nida Midian gin). Da garam igi irim nam bunump 20 silva, barabin gan isangê 200 gram, da iyu arangan iruê Idzip. 29 Da gubuê Ruben batipa fada ntsuf da sauda Yosef wasi da wangun ibarabin nidzun angu da igari ngarukui gan. 30 Da arangan itip ifan da rain rusan da ini, “Ai! Yosef anungê rungê impa ntsuf aga u. Dzi nabu ni nan nabianungê?" 31 Ida ribarangan yis nuning mangan funub da iyu Yosef ngarukui gan da ifiru i biê. 32 Da ribarangan iyu ngarukui igi ifan da ramanggan. Da ini binaê, “Aga waê da ngarukui ani. Da watsangan. Mani u narunggam ngarukui gan ani ma imaê?" 33 Raman isruê gin da ini, “Hai, dzi narunggangê ngarukui gan arangan ani. Apu buman mangan igara arangan funub da itsiar fafarab da iga sib. O dzi narunggangê Yosef!" 34 Yakop nugun ibarabin nidzun angu i narunggan, ibinigi da igari ngarukui gan da yatsuf ngarukui ranga rutin, da irang i narunggan gubuê ampi bingan angu imingê ibinigi. 35 Arangan narun rusan marub da finam santan iba i yafada arangan wangun, da bitsintaê arangan ibugin da ini, “Imaê. Dzi bungê arang angu nabiani nasangê dzi tipa atsungêa narunggangê i garam mampan gampan.” Da Yakop irang imingê ibinigi angu. 36 Da gubuê arigi da rib Midian iyu Yosef ifa Idzip da itangin arangan da Potifar, garam suda gudzun i garam singaari muntida sib i King Farau, da arangan isu i gan mamaê guman utaê angu.