Miamun 39

1 Gubuê garam Ismail uda Yosef ruêa Idzip ugu da Potifar irim nam ntsuman da ribarangan da iyu Yosef isu gan mamaê guman utaê angu. Potifar igi isu gudzun i king Idzip garaman singaari muntida sib i arangan. 2 Yawe irut Yosef, da gum santan Yosef nangan mingêa garam gudzunggan ungaran iwaê ngarubini bingan angu. 3 Potifar itsangan da isruê gin ibi Yawe irut Yosef da inang nam santan Yosef nangan iwaê ngarubini angu, 4 ibinigi da nugun inuf nidzun angu i Yosef da itaga arangan isu i gan garam guman mpada tayangê arangan ungaran mpruêan da arangan nanggan santan. 5 Mingêa gubuê aru Potifar tanginda arangan mpada tayangê i nam santan igi da fadan, da Yawe ifinti Potifar nanggan santan, mingêa ungaran da gan guman wasaê, i wain iruê Yosef. 6 Ibinigi da Potifar itangin Yosef impa tayangê arangan nanggan santan. Da maran wafur nan mangan i nida yaba i nanggan santan igi mangan u, imaê, da bitsintaê nam gadan arangan gadan angu. Yosef igi iyingê garam mara urun da maran bini angu. 7 Gubuê fain fada sib da Potifar fininggan iyafi un nidzun angu i Yosef da ini binaê, “Dzi ni u badan da agi gingêan." 8 Da bitsintaê Yosef ibugin da ini, “U tsangan sib wa! Dzi garam gudzunggangê itangin dzi i mpada tayangê arangan ungaran da gan nanggan santan, da maran wafur i nam mangan u. 9 Manga wasu gudzun tsiraê ibi dzi imingê ungar aruani u, imaê. Dzi garam gudzunggangê wapaê dzi i nam mangan u, da bitsintaê agu angu, i wain arangan fininggan agu. Da dzi nabu nang sanab asub maisan igi nabianungê? Nigi bungê abi nam maisan tsiraê bingan dzi nangan da Anutu." 10 Da sagat igi rurim udzung da Yosef maiê maiê i ruta arangan gingêan, da bitsintaê Yosef ibugin da wasu uts da arangan. 11 Gubuê mangan da Yosef yatangê ungar wasaê i nanga guman da garam gum mangan wampai nigi u. 12 Potifar fininggan impung arangan ngarukui gan ufiak da ini rutin, “Waba da agi gingê!” Da bitsintaê Yosef isagruê ngarukui gan rai imingê arangan banginggan da irunt iwaê sinungê ungar. 13 Gubuê arangan tsanganda ngarukui rungê mingêa arangan banginggan da Yosef runta waêan, 14 da arangan inuê garam guman da ini, “Agam watsangan garam Hibru araga. Dzi gabunggangê iyu garam araga iba agi ungarangê i rima rini miaê tsiraê da agi. Arangan yatangê ba i arimpa dzi, da dzi rim ungaê. 15 Da gubuê arangan ringanta i dzi rima ungaê, da itiri ngarukui gan rai iruê da dzi, da irunt iwaê biaê manaê." 16 Potifar fininggan rugif ngarukui igi ragun isangê gabunggan bawaêan. 17 Da arangan ifis i nan ibiani da gabunggan, “Mamaê gum utaê Hibru aru agu uda bada agi ungarangê ugu yatangê ungar da dzi i nanga asub i dzi. 18 Da dzi rim ungaê da arangan itiri ngarukui gan rai iruê da dzi da irunt iwaê manaê." 19 Gubuê Yosef garam tsiraê gan Potifar ringanta i fininggan nanggan fisa i Yosef nanggan nanga rutin da nugun itsakia tsiraê bingan angu. 20 Da irim Yosef i karabus imingê ungar karabus king rima garam nanga asub in ugu. Da bitsintaê Yosef mpada karabus, 21 da Yawe irut arangan da inang bini gin da inang garam mpada tayangê ungar karabus igi maran yari nidzun angu i Yosef. 22 Ibinigi da garam arigi itangin Yosef i mpada tayangê gum da garam karabus santan. 23 Garam mpada tayangê ungar karabus igi maran wafur i tsuwara gum Yosef nangan u, wain ibi Yawe irut arangan da irim arangan sib i nanga nam santan waêa bini.