Hebreos 10

1 Gun leey ni Moisees nañ gal nu na tub sheñ de coz rishli. Coz zeê, ndeê de coz nap nu cyid par lo. Tees leey zeê, ndeê walab ub lañ, sinu sheñ ziêl ñi. Nunu nu nac leey zeê, de ñaên la rbic dey de gun lo Ãgyoozh. Tees rila wac gyicy nap leey zeê de mbecy nu gyechaê lom nu nac gun nu rniiñ nu cuic dey, 2 gun benu ñgyecy cyi de mbecy nu driib zily Ãgyoozh nu nac gun zeê, orzeê wat lo dey nu nac ñii. Nunu checa dey nu cuic yu gun. 3 Tees de gun zeê ricy ñi nu de ñaên la yezaê lagy de mbecy de cyiy. 4 Gun reñ tor nu reñ chiib rila wac zaê loñ cyi mbecy. 5 Ndeê nu ornu Crisht biid mi gyishlombecy ii, orzeê nam rab mi Ãgyoozh: Ru walagy ru nu cut mbecy bañcyug lor. Ni walagy ru nu cuic dey gun lor, sinu bzu lily ru cuerp ne̱. 6 Ni wagyuê lagy ru nu rbic mbecy gun par nu gyaê lo cyi dey. 7 Orzeê ya̱ mne̱e̱ lom: “Ãgyoozh, ii zu̱ par nu gyicya̱ gal nu rlagy ru. Ii zu̱ par nu gyicya̱ gal nu bi cañ lo gyicy nir nu gyicya̱”, mne̱e̱, na Jesuuz. 8 Nu loga la mniim nu Ãgyoozh walagy mi de gun nu rbic mbecy. Walagy mi de bañcyug nu rbic dey lom. Walagy mi de bañcyug nu rcaa dey gyi par nu gyaê lo cyi dey. Ni wagyedzuê lagy mi de nu ndeê. Ni mniim mas rbic dey dela gun zeê gal nu rnii leey. 9 Orzeê niga mnii Crisht lo Ãgyoozh: “Ãgyoozh, ii zu̱ par nu gyicya̱ gal nu rlagy ru”, nam. Orzeê Ãgyoozh bzu chum mod nu briic dey gun gulas. Orzeê bzu nap mi tuubaê mod cub. Mod zeê, ndeê mod ni gun ornu briic Jesuuz ub mi. 10 Como Jesucrisht bicy mi gal nu rlagy Ãgyoozh, orzeê byaê lo dela cyi den nu nac nu tub tir ziêl briic mi cuerp nim par tub gun lo Ãgyoozh. 11 Na dela uz nu zu riiñ lo Ãgyoozh de dzi la zu dey lom, nunu zaab rbic la dey laab laab ziêl gun zeê lo Ãgyoozh. Tees gun zeê rila wac zaê loñ de cyi. 12 Zeê Crisht tub zi gun briic mi par cyi den. Nunu gun zeê cyiiñ ñi tub la. Gazeê nu gusub mi par yaa bee Ãgyoozh. 13 Zeê zub mi na nu rbez mi gashtal ornu gyicy Ãgyoozh nu gyub ic mi de losaê yuum. 14 Nu nac tub zi gun bzu nap mi de mbecy tub la, de yu nu bi byaê lo dela cyi. 15 Nunu Espiriit Yon ni Ãgyoozh rbic mi nu gad lagy den laab niê ziêl coz. Nu loga la nam: 16 Shuaan der nam: Ni mod za trat nu gyicy du̱ de mbecy Israeel. Ornu shuub dzi zeê, ya̱ gyicya̱ nu caa ic dey de riidz nu rne̱e̱. Gyicya̱ nu gad lagy dey ñi nañ lardooy, na Shuaan der, na Espiriit Yon ni Ãgyoozh. 17 Orzeê gazeê nu nam: Orzeê wayezaê gaê lagya̱ de cyi dey. Wayezaê gaê lagya̱ nu shiñ bicy dey, nam. 18 Orzeê ornu Ãgyoozh gyicy sulagy mi de cyi mbecy, orzeê walagyaêñ gun par nu zaê loñ de cyi dey. 19 Ndeê nu der bicy na, na gac nu wadzib lagy la den nu chan zeê nu yon zir par deê zir lugaar nu nac nu pshuu reñ Jesuuz. 20 Mi zeê bicy mi nu gad tub mod par nu ded den roê negy zeê nu chuê den lo nu loo la gal lo Ãgyoozh. Mod zeê, ndeê tub mod cub. Ndeê tub mod nu rbic gyel mbañ nu nac cuerp ni Jesuuz. 21 Gun Jesuuz nac mi tub uz lily ni den. Mi zeê zum riiñ nu riib ic mi nañ yuê ni Ãgyoozh. 22 Orzeê rlagy ñi nu gyechaê den lo Ãgyoozh, nunu gac den tub mbecy nu sac gyel rguu nañ lardoo. Nunu ornu gyechaê den lom, orzeê gyicy cup na consuel lom. Tees bicy caacy mi lardoo den, gun orzeê wat lo den nu nac cyin. Nunu bicy caacy mi cuerp ni den nu nis cacy nu bzu nis den. 23 Orzeê rlagy ñi nu gzu fert den nu nac de coz ni Crisht nu rzeña lagy den. Rlagy ñi nu cueê nu gyicy cyup ic den, gun Ãgyoozh segur la gyicy yac mi de coz nu mniim nu gyicy mi. 24 Tub ga la den rlagy ñi nu rush den shcab nu nac losaên ben a wad tub mod nu locyuub na dey par nu ca zir yu losaêy, nunu par nu locyuub na dey nu gyicy yu de coz nap. 25 Nunu walagy ñi nu checa den nu gyatublaazh na gal nu ricy la be mbecy. Lugaar nu checa den, rlagy ñi nu gric zir den baloor ni losaên. Nunu briic zir der baloor ni dey como rad lagy der nu bi rgaab shuub dzi nu cyid Shuaan den. 26 Gun sac reñaê gun par nu zaê loñ cyi den benu zaab gyicy nap la den cyi despuees ornu bi guê lo den de coz rishli. 27 Gun benu ni gyicy den, orzeê se tub zi la mod nu gac, ndeê nu dzib den nu gzac den lo cashtig ily ni Ãgyoozh, nunu gzac den lo gyi ily nu nit lo de losaê yuum. 28 Na benu tub mbecy zay contr ni leey ni Moisees, nunu benu yuê tub cyup chon teshtig nu rniiy nu bzaac yu nu ni bicy yu, orzeê washni lagy dey yu, sinu nii dey nu gat yu. 29 Benu ni, orzeê dzi zir cashtig ily gad ni mbecy nu rzuub yaa Iêñ Ãgyoozh. Dzi zir cashtig ily gad ni mbecy nu rgüii naañ lo reñ mi, reñ nu bzu nap trat nu bicy nu byacaacy yu. Dzi zir cashtig ily gad ni mbecy nu rnii zi ni Espiriit Yon ni Ãgyoozh, biñ nu nap ricy nu de ub na. 30 Gun rad lagy den nu Shuaan den nam: “Ndeê cuen ne̱ ya̱ nu rica̱ cashtig. Ya̱ naca̱ biñ nu gyabic i yu nu shiñ ricy”, nam. Nunu rniiñ tuubaê seê nu nam: “Shuaan der ri beem ni de mbecy nim”, nam. 31 ¡Dzi ga coz ily nu gyet lag den yaa Ãgyoozh mbañ! 32 Orzeê pcaa ic der mod nu bzac der gulas. Na bi gud lagy der de coz ni Ãgyoozh, orzeê gugyee der nu gzac zir zañ lo coz. 33 Yuê mbecy lat der nu lo rgüii la zigy mbecy mnii zi mbecy ni dey, nunu shiñ bicy nu dey yu. Yuê gaê mbecy lat der nu nac nuy de mbecy nu ni mod bzac zi zeê. 34 Orzeê gushni lagy der de yu nu ri pres. Nunu ornu rboo mbecy suu der, orzeê gugyee der, nunu gucyit lagy der, gun rad lagy der nu gyibaa yuê coz nap zir ni der, coz nu rila waded ni. 35 Orzeê cueê gac der mbecy dzidz, gun orzeê gyad tub i der nu tonaê la coz ily nu nac nu ricy cup der baloor. 36 Rlagy ñi nu gagye der, gun orzeê gyicy der gal nu rlagy Ãgyoozh, nunu gyash yaa der de coz nu mniim nu segur la cuic mi ni der. 37 Gun de riidz nim rniiñ: Se ñuu zi zi tiem par nu cyid biñ nu rlagy ñi nu cyid. Wayicy gul lagy mi. 38 Orzeê Ãgyoozh nam: Tees de yu nu byanap lo̱ cui mbañ dey nu nac nu ricy cup dey consuel lo̱. Tees benu ca nay gyaê ich yu, orzeê wadzeel reña̱y, na Ãgyoozh, rniiñ. 39 Par de ub na a̱ê nac den mbecy nu gyaê ich. Ni a̱ê nac den mbecy nu cha lo cashtig. Sinu nac den mbecy nu ricy cup consuel lom, mbecy nu gruu mbañ.