1 Corintios 4

1 De ru rlagy ñi nu gyicy der de̱ ya̱ par mbecy nu ricy de coz nu rlagy Crisht. Rlagy ñi nu gyicy der de̱ ya̱ par mbecy nu bdugyi riiñ nu shaal de̱ de riidz nu gal na rbic Ãgyoozh nu gad lagy de mbecy. 2 Tub coz rlagy ñi nu gyicy yu zu riiñ. Rlagy ñi nu gyicy paay nu patro̱o̱ niy. 3 Zeê ya̱ wagyicy cuena̱ mas rsaê lagy der lo̱ ti nap ricya̱. Niê ziêl wagyicy cuena̱ la ziêl coz nu rsaê lagy mbecy lo̱. Mas ya̱, wagyicy cupa̱ consuel lo shcab ni uba̱. 4 Ya̱ rze̱e̱ nu se la la coz bicya̱ rze̱e̱, tees walab nu nac ndeê gruu caacya̱, gun Shuaan den, mi zeê gniim ti yuê falt ne̱. 5 Orzeê ndeê nu walagy ñi nu gnii der ti yuê falt ni losaêr, lat nu lez den gashtal shuub la dzi nu cyid Shuaan den tuubaê tir. Orzeê mi zeê gyicy caacy mi de coz nu ricy mbecy dze ga. Nunu shaal mi de coz nu rnii too mbecy nañ lardooy. Orzeê Ãgyoozh gyabic mi gyel mbecy ni tub ga la dey gal nu yad ñi. 6 Der bicy na, ya̱ rne̱e̱ dela coz ii lo der par nu locyuuba̱ der. Ya̱ bzata̱ Apolos nu uba̱ par nu gad lagy der lac mod gyicy nur losaêr. Tub ziêl mod nu gyicy nu der dey. Gal mod nu rnii de riidz ni Ãgyoozh, ni mod rlagy ñi. Ni tub la der walagy ñi nu cui der mbecy nu ricy riiñ ni Ãgyoozh. Cueê gyicy zily der tub yu. Zeê tuubaêy gyicy gyidz der yu. 7 ¿Cyu bicy nu byalily zir der par lo deê zir mbecy? Wagad lagy der ni tub la coz. Nomaas rad lagy der de coz nu briic Ãgyoozh nu gad lagy der. Orzeê benu rad lagy der coz nu briic Ãgyoozh ziêl, orzeê ¿lagu dzi ricy der gyel leê nir gal nu ricy mbecy nu ricy cup coz nu walab coz nu guud leew la? 8 Che rzii der nu bi ricy cup gyel la der dela coz ni Crisht nu rlagy ñi ni der, rziir. De ru na der gal nu na mbecy guaniêñ, rziir. Nunu byac der gal nu na rey, rzii der, mas de̱ ya̱ se laê la sac de̱. Dzi ga nap benu gyac der rey, gun orzeê de̱ ya̱ gyacaê de̱ rey tublaazh la nu de ru. 9 Ya̱ rze̱e̱ nu Ãgyoozh bicy mi nu rlyu nu de̱ ya̱ nu deê zir de aposht nu blaazh la gal ich la zab de̱. Rabee de̱ gal nu rabee tub pres nu bi zuu la nu gat lo rgüii la dela mbecy nu yuê gyishlombecy: tant de anc nunu tant de mbecy. 10 De mbecy rzii dey nu de̱ ya̱ nac de̱ mbecy ton par nu nac Crisht. Zeê de ru rzii dey nu dzi lily na shcab ni der par de coz ni Crisht. De̱ ya̱ wacyiiñ de̱, tees de ru dzi cyiiñ der rzii dey. De mbecy rca lagy dey lo de ru, tees lo de̱ ya̱ waca lagy dey. 11 Mas gashtal dzi na yuê tiem nu ran de̱, nunu yuê tiem nu rbigy de̱ nis, nunu yuê tiem ni shab de̱ wagad. Yuê tiem nu shiñ ricy nu mbecy de̱ ya̱. Nunu yuê tiem nu wagad yuê cyiiñ de̱. 12 Nunu tonaê la fert ricy de̱ riiñ nu ya̱a̱ de̱ par nu gad nu da̱w de̱. Ornu mbecy rzaa lagy dey ne̱ de̱, orzeê rdiñ de̱ lo Ãgyoozh nu nap gyicy num dey. Ornu mbecy rsheed ziy de̱, orzeê ragye̱e̱ la̱ de̱ lo dey. 13 Ornu mbecy rnii ziy ne̱ de̱, orzeê nap la rne̱e̱ du̱ de̱ yu. Par lo de mbecy na de̱ gal nu na toop. Nunu gashtal dzi na, na de̱ gal nu na toop. Na de̱ gal nu na de nu guê bid nu yuê gyishlombecy. 14 Ya̱ zeeda̱ gyicy ii lo der walab nu gyicya̱ nu gat lo der, sinu par nu do̱o̱ rishlo der, como de ru na der gal nu na tub iêñ ya̱ nu dzi rca̱. 15 Gun mas tii miily mbecy yuêy nu rlyuuy de coz ni Crisht ni der, tees tub zi uz der zu, gun ya̱ byaca̱ uz der nu nac Jesucrisht, gun laab ya̱ byapa̱ mne̱e̱ lo der de riidz nu sac nim. 16 Ndeê nu rnishba̱a̱ lo der nu gyicy der gal nu ricy ya̱. 17 Nunu ndeê nu zuu neza̱ Timoteo cyid yu lo der. Yu zeê nay gal na tub iêñ ya̱, gun bicya̱ nu fert zir ricy cup yu consuel lo Shuaan den. Nunu tonaê la rca̱ yu. Nunu tonaê la la ricy paay. Yu zeê gyicy yu nu gyezaê lagy der lac mod rlagy ñi nu chuê de mbecy nu ricy cup consuel lo Crisht. Niiy de coz nu rlyu̱u̱ lat de mbecy ni Crisht dela lugaar zeê nu rdeda̱. 18 Gun yuê mbecy lat der nu tonaê la byaleêy. Rsaê lagy dey nu rila wayap güi̱i̱ der. 19 Tees benu Shuaan den rlagy mi, orzeê ya̱ yap gyiily la̱ nu yap güi̱i̱ ga̱ê der. Gazeê nu gad lagya̱ la ñuu coz rac ricy de mbecy leê zeê. Walab tub lo ziêl de coz nu rnii dey. 20 Gun lat de mbecy nu riib ic Ãgyoozh, walab nu riidz ziêl rnii dey, sinu coz ily ricy dey nu nac mi. 21 Ornu yap güi̱i̱ der, ¿ca na coz rlagy der? ¿A rlagy der nu rica̱ cashtig ni der, uti rlagy der nu ca̱ der, nunu nap gyicy du̱ der?