1 PEDRO 4

1 Goḻguieá¹ gaá¹le, zha nactaa grë guieḻnë ne bded Jesús bdiizh me xtoḻ ne; nana sca, scaque to gdziebde to goḻcueeladz to gaá¹ to guieḻnë. Ib rquiin guieḻnë, sac zha ne no tib lo guieḻnë, rioguid zho grë ncuaaá¹e guá¹ctal xtoḻ zho, 2 zëëb rguib zho gban zho zigne racladz Dios. 3 Grëtaa ncuaaá¹e ndzinlid ne ruá¹ grëraa miech, goḻguiaaá¹ladza. Goḻguiaaá¹ladz zeeá¹e scataa ptsieelsa to zho, bzudz to, lega dowcho, lega gocho to nziu, haxta bionie to zha ne nacd tsieel to; bio to lo grë lni, bleynie to grë mdio. 4 Grë zha co, rieá¹ naa rlëë zho raá¹ zho rtsieelsadraa to zho lo grë ncuaaá¹e ndzinlid co, gane haxta rneenë zho to. 5 Per goḻsaan zho, beá¹que zha quizha zeeá¹e gacredz zho lo meá¹ ne guiaadguá¹ guieḻwxtis, gaḻ dze ne gdeed me miá¹e tsieguiaḻ tib tib miech, zigtaa zha mbana, zigtagaa zha ne gutlew. 6 Sac niicle zha ne gutlew, no zho gocnaá¹paa zho zha nac Xtiidz Dios zeeá¹e bzomban zho. Ible rquiinpaa Xtiidz me, sac zha ne rquiaadiaga, niicle ne zetaque zho, per nëz lo Dios mban zhiespíritu zho. 7 Zhile gdziá¹ gdze ne laa grë ncuaaá¹e rac lo guidzliu rii nitlo; goḻquix biini zaacse goḻban, tibaque goḻzodiidznie Dios. 8 Iá¹e goḻleynie grë zha ne nacgrë to, sac zeeá¹e nlipaa rleynie ne samiech ne, teḻ pe falt ne guá¹taa zho zrieelo cteed new zdoo ne. 9 Zha ne guiaad lidz to, goḻdeed zaatne cuëz zho; iá¹e goḻcuëzlo zho, guieedniede to zho. 10 Tib tib to bneedzse Dios tib guieḻbiini lo to. ¡Goḻquiina sca, goḻguá¹lsa xyudar zha ne nacgrë to! Ib ga rquiin guieḻbiini co bneedz mew lo to. 11 Zha ne rseed miech Xtiidz Dios, none gnee zhow zigne racladz me. Zha ne ruá¹gaa pe stib xtsiiá¹ Dios, ib yquiad zdoo zho none guá¹ zhow dib nacse guieḻndaan ne rdeed Dios lo zho. Ncuaaá¹e guá¹taa to, goḻtsienie guic to ne laaw guá¹ to par csaá¹non to lë Dios. Ga glu ne xtsiiá¹ Jesús quiayuá¹ to, meá¹ ndzon ne rnabey, meá¹ ne gdziá¹d dze gdzëë. Sca rieguiaḻa. 12 Bets, bzian, ne nligaa rleynie naa to. Goḻsoladz sca, teḻ pe guieḻnëtaa gaá¹ to porne no to xnëz Jesús, peet tsienied guic to, sac ib scale no gaca. 13 Mazd iá¹e goḻley; sac goá¹ ye Jesús sca goá¹ guieḻnë, ni scagaa nroob guieḻbley ne tso to gaḻ dze ne glu gaá¹le zha nactaa guieḻndzon ne rap me. 14 Zeeá¹e rgodee miech to, rquiaago zho to loxaque ne no to xnëz Jesús, nley goḻgac; wen zie to ga, sac goá¹ zhiEspíritu Dios nacnie to. 15 Guieḻtow sca csacsi miech to, teḻne bgaa to laa to beet, laa to wban, laa to bzëëb lo cuent ne rieguiaḻdraa to, pe stib guieḻntseeb ne noyuá¹ragaa to. 16 Saá¹gue teḻne rsacsi zho to loxaque ne no to xnëz Jesús, led guieḻtod ga. Laa ne ctoladz to, ¡goḻdeed xquizh lo Dios, sac goá¹ tib guieḻnzaac nroob bgaa to ngab to lo me! 17 Goḻgacnaá¹ gaá¹le, grëse ne ne nac ne zha ne ngab lo Dios, leá¹ dze rii laa ne csilo dziaá¹ guieḻnë. Nana, teḻne ye zha ne ngab lo me ted guieḻnë, ¿zha naczhe miá¹e ted grëraa zha ne nëd gliladz Xtiidz me, gaḻ dze ne laa me guá¹ guieḻwxtis? 18 Zigne zhobneeque lo Xtiidz me, zaatne rnee: “Niicle zha ne wenle nëz lo Diosa, nroobaque nac guieḻnë ne raá¹ zho haxta gdziá¹ dze ne ycaania me zho, ¿pe leḻgue grë zha ne dzigo racntseeb lo me?" 19 Gacxe nagoá¹ waa, niicle teḻ pe nactaa guieḻnë ne gnabey Dios ted to, tibaque goḻban zigne rnabey me, goḻsaá¹ xquieḻmban to ladznia me; sac goá¹ me nac meá¹ ne rneedz xquieḻmban to, ni mesi ib csaand me to.