Tito 3

1 Elluêculu arquiê bee beneê Jesucristo nú riêi beella nú rni gobierno cuna lunú rni bee usticia, cuna nú zucuê beella nú rni bee bene, cuna nú nzu arquiêbeella riêi beella lu ye nú neca nzeêca. 2 Nú la zeêta beella bee bene, nú la cuaêna beella xuu, nú aca lleêna arquiêbeella, nú aca nzeêca beella lu ye bee bene. 3 Liaêahua uyuêu bee bichia nú uriaêahua tucu nú niarquiêtsiaêahua, nu unga nziti arquiaêahua, unzeêahua inziu nú necha neca, uriêitsiaêahua tucu nú niarquiêtsiaêahua cuna tucu nú necatsia elliebacuaêahua. Uriaêahua puro nú la neca nzeêca, cuna nú uye arquiaêahua cuna nú uhuana arquiaêahua bee bene nu uhuana arquiê bee bene liaêahua. 4 Pero chenu uriña bichia nú ulubeê Paêahua Diose enu utsilaêa liaêahua nú ñia nzeêcanu, cuna nú secanu bee bene. 5 Liêinu utsilaêanu liaêahua, la necane equie nú uriaêahua nú neca nzeêca, uriêinu scua equie nú uhuaêa arquiênu liaêahua. Liêinu uhuanu ye bee dula nú rluêcuaêahua nu scua necaêahua xi neca bene cuqui lunu, nu equie cuendaê Espíritu Santo rluêcuaêahua elunehuañi nú necuqui neca cuna liêinu. 6 Nu equie cuendaê Jesucristo enu utsilaêa liaêahua, chiquiê uliquiê Diose Espirítu Santo luaêahua. 7 Nu lunú ñia neca nzeêcanu nebacuêlanu liaêahua nú la luêcuaêahua dula, scua liquiênu luaêahua nú huañi liêahua liñibe nú nelluaêa quieêahua. 8 Neli neca bedichiaê cuaê. Enzeêe niarquia nú uquia tixiuleêelá ye bee bedichiaê cuaê lubee bene enu uchilila arquiê Diose para nú cuaêna beella nú riêi beella nú neca nzeêca. Nu bee nucuaê chiquiê neca equiee nu sibiêi para lu ye bee bene. 9 Pero la riêilu caso beenú lecaxi zibiê rni bee bene, nu la riêilu caso stichiaê bee bene enu máse nzenu arquiê nú ti unga bee beneê beei huaêtu. Leêca la riêilu caso bee bene enu rni xuu lubee saê equie cuendaê leyê Moisés, xne la neca equie bee nucuaê, nu lecaxi zibiê bee nucuaê. 10 Tunu nuêhua enu rriêi nú rleêe saê bee beneê Jesucristo, uniê lulla tucu bese urre chiucu bese nu tunu la zucuêlla stichiaêlu, uhualla letahua. 11 Xne liêilu nediyaêlu nú saê bee benecuaê utsanaê arquiêla beei lunú neli neca, nu leêca liêitsia beei rnitilu beei liêibeei equie cuendaê stulabeei. 12 Chenu xeêlaa Artemas, urre Tíquico elu nzuculu, uriêi juerza nú yeêta biêyalu liêá eyeche Nicópolis, xne zeêe uduê arquia nú detea tiembu nú nucuá. 13 Leêca uriêi elietsa lu Apolos cuna lu licenciado Zenas lu ye nú recalu udeêteê lu ye nú secalaêchaê beella para nú cheriêibeella seidu inziuê beella para nú lecaxi zecalaêchaê beella. 14 Leêca bee saêahua enu nzeli arquiê Jesucristo rquiêña nú aca beella riêi beella nú neca nzeêca, nu riêi beella elietsa lubee bene chenu nuê nú secalaêchaê beei para nú sibiê lunú nehuañi beella lu iliulabe quieê. 15 Ye bee bene enu nucuaêa cuna liêá xeêla beella saludo lulu. Leêca uriêi saludar bee saêahua enu seca liaêahua equie nú tucutse nzeli arquiaêahua Jesucristo. Diose riêi nú cha nzeêca lu cuendaê yehua. Amén.