Romanos 8

1 Enzeêe ye bee bene enu nzeli arquiê Jesucristo la zecaê bee bene zeêe castiyaê Diose. Bee bene enu la nehuañiaê lunú necha neca sino que rlaênalla nú huañilla tucu nú niarquiê Espíritu Santo nú huañilla. 2 Xne lunú rnibiyaê Espíritu Santo nú nzu cuna liaêahua lunú neca tucu necatseêlaêahua cuna Jesucristo la nibiyaê dula luaêahua, nu leêca la yalaêahua castiyaê Diose. 3 Lunú necaêahua bene lá aca ley ariêi elietsa luaêahua, ley nú udeteê Diose lu Moisés. Pero nee uriêi Diose lunú né aca ley cuaê ariêi. Liêinu uxeêlanu Lliêñinu lu iliulabe quieê xi neca tucu bene para nú ungutinu equie stulaêahua, nu scua udixiunu equie cuendaê stulaêahua para nú lecaê xunga nibiyaê dula luaêahua. 4 Nee nehuañiêlaêahua lu Diose xi neca tucu bene enu sucuê ley, xne la nehuañiaêahua tucu nú niarquiêtsiaêahua sino que nehuañiaêahua tucu nú rnibiyaê Espíritu Santo. 5 Bee bene enu nehuañitsia lunú neca elliebacuê, rriêitsialla elliebacuê nú riêilla lunú niarquiêtsialla. Pero bee bene enu nehuañi tucu nú rnibiyaê Espíritu Santo, máse nzucululla nú riêilla lunú rnibiyaê Espíritu Santo nú riêilla. 6 Nu lunú nzuculu bene nú rriêitsialla lunú necha neca, che nzeêta castiya nú zecalla, pero chenu nzucutsialu bene nú rriêilla tucunú rnibiyaê Espíritu Santo che rluêcu bene elunehuañi lu Diose nu la chenu arquiêlla. 7 Bee bene enu nzuculutsia nú huañi tucu nú niarquiêtsia, liêibeei necabeei enu la zucuê nú rni Diose equie nú la niarquiêbeei nibiyaê Diose lubeei nu leêca la acabeei riêibeei tucu nú niarquiênu. 8 Enzeêe bee bene enu nehuañi tucu nú niarquiêtsia, la yuê arquiê Diose xa rriêibee nzeêe. 9 Pero liêihua la nehuañihua lunú necatsia elliebacuêhua, sino que liêihua nehuañihua tucu nú rnibiyaê Espíritu Santo, tunu neli nú nehuañihua cuna Espíritu Santoê Diose, xne bene enu la nzu Espíritu Santo cuna liêi laca nzeêe beneê Jesucristo. 10 Pero tunu nehuañilahua cuna Jesucristo, lecaxi riêi mase nú unitilu dula liêihua. Nu nee nehuañilahua cuna Espíritu Santo nu nebacuêla Diose liêihua nú la luêcuhua dula. 11 Nu tunu nehuañilahua cuna Espíritu Santoê Diose, liêinu enu uriêi nú uhuañi zeca Jesucristo lu eluti, che mase nú atihua, pero leêca riêi Diose nú huañi zeca cuerpoêhua lu eluti para nú luêcuhua elunehuañi equie cuendaê Espíritu Santo nú nehuañi cuna liêihua. 12 Enzeêe bee saêa enu nzeli arquiaêahua Jesucristo, la yala nú huañiaêahua tucu nú niarquiêtsiaêahua. 13 Xne tunu liêihua nehuañihua lunú niarquiêtsiahua, che rialahua castiyaêhua, pero tunu equie cuendaê Espíritu Santo nú nzu cuna liêihua utsanaê arquiêhua stulahua che luêcuhua elunehuañi nú la laxuaê lu Diose. 14 Xne yebee bene enu sela nú rnibiyaê Espíritu Santoê Diose lu, liêibeella neca beella lliêñi Diose. 15 Xne lá yucuhua Espíritu Santo para nú lliquihua, xi xiqui tucu bene patronêlla sino que equie cuendaê Espíritu Santo necalahua lliêñi Diose nu equie cuendaê Espíritu cuaê rniaêahua lu Diose: “¡Paêahua!" 16 Nu leêca equie cuendaê Espíritu Santo quieê nediyaêahua nú siêahua nú necaêlaêahua lliêñi Diose. 17 Nu lunú necaêahua lliêñi Diose rialaêahua herencia nú liquiê Diose tucu nú riala Jesucristo, tunu neli nú riquiaêahua nú nehuana zeêcaêahua tucu nú ulleêcanu che nuê modo riñaêahua liñibe elu nzucunu. 18 Nediya nzeêcaa nú liaxi nú nehuana seêcaêahua nee, luquela nú seca eluxene nú atiaêahua liñibe. 19 Nu hasta yebeenú urecheê Diose, chiquiê nzuquiene nú alaê uriñala bichia nú acachee nú tineca bee lliêñi Diose. 20 Xne iliulabe uchiñii lubeenú necha neca, pero lecaxi culpaêe, sino que Diose uzela nú ungae scua. Nu nee nzuquietsia iliulabe, 21 nú laêane lu beenú necha neca nuêlue, nu naa zecae tucu nú ñia nae chenu apenatsia uquixiee, tucu nú leêca laêa bee beneê Diose lubee nú necha neca nuê lu iliulabequieê. 22 Nu diquila nú nzuquie iliulabe nú riña bichia zeêe, liaêahua nediyaêahua nú chiquiê nehuana seca iliulabe xi seca tucu unaêa enu ala enduê. 23 Nu la necane nú iliulabetsia seca scua sino que leêca nuaêahua enu nchiñi Espíritu Santo arquiê xi neca tucu seña lunú liquiê Diose luaêahua. Nu chiquiê nehuana seêcaêahua diquila nú nelluaquieêahua nú riña bichia nú acachee nú necaêahua lliêñi Diose, bichia chenu cheêenu cuerpoêahua nu liquiênu stucu nú necuqui. 24 Nediyaêahua nú scua acane nu nucuaê nzuculuaêahua nú aca equie nú nzeli arquiaêahua nú utsilaêalaêahua, liêihua nediyaêhua nú tunu lunú nelluaquieêahua nú aca ungalane, leca xiquie nú lluaquieêlaêahuane. 25 Pero tunu nelluaquieêahua nú aca lunú lascaê aca, che layala nú llacaêahua lluaquieêahua nú acane. 26 Nu leêca Espíritu Santo riêi elietsa luaêahua chenu la riaêahua beyaê xneca riaêahua, xne nuê chenu lacaêahua nacuaêahua lu Diose tucu nú rialane. Nu chenu la riaêahua beyaê xneca niaêahua lu Diose lunú niarquiaêahua niaêahua, pero Espíritu Santo nediyaê xa rriaêahua elliebacuê, che liêinu see arquiênu rnacuênu lu Diose lu cuendaêahua. 27 Nu Diose, liêinu enu nuêlu arquiê bee bene, nediyaênu xi rnacuê Espíritu Santo lunu lu cuendaêahua. Xne chenu rnacuê Espíritu Santo equie cuendaê bee beneê Diose, liêinu rnacuênu lu cuendaê bee bene tucu nú niarquiê Diose. 28 Liaêahua nediyaêahua nú ye nú seêcaêahua lu iliulabequie, zibiêi luaêahua, liaêahua enu seêcaêahua Diose liaêahua enu uriêi caso stichiaênu para nú riaêahua tucu nú niarquiênu. 29 Nu hasta huaêtu nediyaêlaê Diose ti bee enu chili arquiê liêinu, nu ucañinu liêibeella para nú huañi beella, nu acabeella xi neca lliêñinu Jesucristo, para nú Jesucristo aca enu nibiyaê lu ye bee bene enu neca lliêñi Diose. 30 Xne ye bee bene enu nediyaê Diose nú chili arquiê liêinu, ucañinu liêibeella nu ubixianu beella para nú aca beella bee beneênu, nu uluêcu cuendanu beella nú la luêcubeella dula, nu uninu nú deteênu eluxene lubeella liñibe. 31 Nee nú nediyaêlaêahua yebee nucuaê lecaxi riêi mase nú rriêi cundra bee bene liaêahua, Diose riêi elietsa luaêahua. 32 Necaa Diose lliêñinu unguti equie cuendaê stulaêahua. Nu tunu uliquiênu lliêñinu unguti equie stulaêahua. ¿Xaquie nú la liquiênu ye beenú liquiênu luaêahua equie cuendaê lliêñinu? 33 ¿Ti aca xanabitsi lu cuendaêahua nú necaêahua bene enu rluêcu dula ante Diose? Xne leêca liêinu ubacuênu liaêahua nú la luêcuaêahua dula. 34 Lecati aca ni nú rialaêahua castiya, xne Jesucristo neca enu unguti para nú udixiunu equie cuendaê stulaêahua, nu la neca nucuaêtsia sino que leêca uhuañi zecanu lu eluti, nu nee nzucunu cueêtse Diose chube rnacuênu lu Diose lu cuendaêahua. 35 Nu tucu nú seca Jesucristo liaêahua lecati riêi ana huachuu liaêahua lunu. Pero niê nú nehuana nzu arquiaêahua, urre nú nehuana seêcaêahua, urre lunú xi rriêinuu bee bene liaêahua, urre nú rliaênaêahua, urre nú leca xucuaêahua, urre nú xiquiaêahua, urre lu eluti, lecaxi nú huachuu liaêahua lunu. 36 Lu ichiê Stichiaê Diose rni: Equie nú necaru bee lliêñilu, ye yeêe nzuquie eluti liêiru, rriêinu bee bene liêiru xi rriêinu beei bee sanchi enu nzula nú ati. 37 Pero niê tucu bee nucuaê la riêi ana luaêahua xne rriêi Jesucristo elietsa luaêahua, liêinu enu seca liaêahua. 38 Nediya nzeêcaa nu niê eluti, nu niê elunehuañi, nu niê bee ángele, nu niê bee benechiquiê, nu niê beelá bee enu rluêcu nú rnibiyaê, nu niê lunú reca, urre lunú aca, 39 urre lunú nzeêta enza liñibe, urre liñi yuu, niê tucue nu niê stucu lunú urecheê Diose, lecaxi nu lecati aca huachuu liaêahua lu elusecaê Diose equie cuendaê Jesucristo.