Apocalipsis 3

1 ‘Nee uquieêe bee bedichiaê nú xeêlalu lu bene enu rnibiyaê lubee benea enu nucuaêa eyeche Sardis. Uquieêe: “Liêinu enu nzu cuna achi Espírituê Diose nu nzenenu achi belaa, Liêinu rninu luhua: Liêá nediyaa luye nú rriêihua. Mase nú lubee bene liêihua nehuañihua, pero para lua neca xi neca nú ungutilahua. 2 Enzeêe netsiñia ucuaêahua. Nu ucuaênahua nu la nitiluli lu lleêna nú nuêluhua, xne liêá rlañia nú la riêihua tucu nú necane ante Paêahua Diose. 3 Ulluêcuê arquiêhua bedichiaê nú ubeneêlaêhua nu ungalahua, nu scua uriêihua, nu ucheêehua arquiêhua lunú necha rriêihua. Xne tunu la nucuaêa tsiñiahua che zecahua xi neca chenu tuênatsia rriña tucu huanaê, scua tuênatsia zecahua castiya. 4 Pero eyeche Sardis zeêe nucuaêa chiucu chuna bee bene enu lecaxi naa nu la luêcu dula, nu liêibeella utu beella laquie niquichi cuna liêá che chenzenu beella liêá xne scua riala nú acane. 5 Bee bene enu riêi ana lu dula scua utu beella laquie niquichi, nu la chilaa nombreê beella lu libro elu nzucu ichi nombreê bee bene enu luêcu elunehuañi nú la laxu liñibe. Nu ante Diose nu ante bee ángeleênu nia nú neca beella bee benea. 6 Bee bene enu niarquiê yeneê, uyeneêhua lunú rni Espíritu Santo lubee bene enu neca bee benea." 7 ‘Nee uquieêe bee bedichiaê nú xeêlalu lu bene enu rnibiyaê lubee benea eyeche Filadelfia: “Uquieêe liêinu enu la luêcu dula nu liêinu enu rni nú neli neca nu rluêcu poder tucu nú uluêcu arre David poder, liêitsianu rluêcunu poder para nú xaêlanu tucu inziu nú lecati aca tsacuê, urre tsacuê tucu inziu nú lecati aca xaêla liêinu rninu luhua: 8 Liêá nediya luye nú rriêihua. Nu uxaêlala tucu inziu para nú ixiuleêehua stichiaêa lubee bene sin nú caa bee bene nú riêihua scua, xne mase nú la luêcuhua huaxi elurnibiyaê pero sucuêhua stichiaêa, nu leca bichia nú ucachiêhua nú necahua bee benea. 9 Nu liêá xeêla liêihua lubee bene enu nequichiaê enu neca bee bene Israel, nu rni nú neca bee beneê Diose, nu bee beneê bezeêlu beei nu riêá nú yeêtabeei tsulliqui beei luhua che riêi beei beyaê nú xneca seêca liêihua. 10 Nu scua tucu nú uriquiêhua nú uzucuêhua stichiaêa nu lá tsanaê arquiêhuane, leêca scua riêiucua liêihua chenu riña bichia nú nehuana zeca yebee bene lu iliulabe, nú aca xi neca tucu prueba para ye bee bene iliulabe. 11 La leaê nú nzela zeca lu iliulabe stucu bese. La tsanaê arquiêhua lunú recahua equie cuendaê Diose para nú la atiê stucu bene lunú rialahua. 12 Bene enu riêi ana lu dula liêá riêá nú atiêlla tucu luhuare liñi indu liñibe elu nzucu Diose, zeêe huañili nzeêe. Nu tucu parte cuerpoê nzeêe quieêa nombreê Pa Diose, nu nombrea nú necuqui neca, nu nombreê eyecheê Diose nú lee Jerusalén nú necuqui neca nu nzeêtae enza liñibe elu nzucu Diose. 13 Bee bene enu niarquiê yeneê uyeneêhua lunú rni Espíritu Santo lubee bene enu neca bee benea." 14 ‘Nee uquieêe bee bedichiaê nú xeêlalu lu bene enu rnibiyaê lubee benea enu nucuaêa eyeche Laodicea: “Uquieêe, Liêinu enu saêalu stichiaê, Liêinu enu uriêi ye lunú riala riêinu, Liêinu enu rni nú neli neca, Liêinu enu nzula cuna Diose ante nú quixie iliulabe, liêinu rninu luhua: 15 Liêá nediyaa ye nú rriêihua. La cuaênahua nú neli chenalahua inziua, pero leêca lá tsanaê arquiêhuane, alaê nú neli chenalahuane, ¡urre tucutse bese chiecuê arquiêhuane! 16 Pero liêihua necahua xi neca inza lleêe, niê nú aca nelene nu niê nú aca nucuae, scua tucu nú chu ruahua inza lleêe zeêe ruêuhua, scua la yuê arquia liêihua. 17 Liêihua rnihua nú necahua bene xene, ye nú rluêcuhua nu lecaxi zeca laêchaêhua. Pero la riêihua beyaê nú lecaxi luêcuhua nu necahua bene elitsí, nu lecaxi sibiêhua, nu niê nú utuhua la luêcuhua, nu necahua xi neca enu nequieêlu ante lua. 18 Enzeêe nia luhua, tucu nú sii bene puro oro, scua ulaênahua nú luêcuhua ye elietsaa, para nú acahua xene ante lua. Nu tucu nú si bene laquie niquichi rutulla para nú aca achee nú lecaxi nalla, scua ucheêehua arquiêhua para nú tsacuêhua elu netuêhua che aca achee nú lecaxi nahua ante lua. Nu leêca scua tucu nú sii bene cuanaê nú riuêu iêculu bene para nú lañiê nzeêcaêlla, scua uriêihua para nú luêcuhua poder nú rluêcua para nú yaêla elliebacuêhua nu lañiêhua xneca nehuañihua. 19 Liêá rnia lubee bene enu seêcaa, nu rquiêyaê beella rriêá. Enzeêe uduêhua ana arquiêhua, nu ucheêehua arquiêhua lunú necha nehuañihua. 20 Uluêcu cuendahua nú liêá rixia liêihua, scua tucu nú rixia tucu bene ruêu puerta niêi stucu bene. Nzuquietsia biêya ti riêi caso Liêá. Tucu nú seneê tucu bene stucu bene para nú chuêu nzeêe niêlla nu acu junto beella. Nu bene enu riêi caso Liêá, Liêá nzua cuna nzeêe, nu bene zeêe nzu cuna Liêá. 21 Nu bene enu riêi ana lu dula, Liêá zela nú zucu nzeêe cueêtsea elu rnibiyaêa, tucu nú uzucuaêa cueêtse Diose Pa liñibe elu rnibiyaênu chenu uriêá ana lu dula. 22 Bee bene enu niarquiê yeneê uyeneêhua lunú rni Espíritu Santo lubee bene enu neca bee benea."