San Lucas 2

1 Bee bichia zeêe, unibiyaê arre César Augusto nú sucu ichi ye bee bene iliulabe. 2 Nu bese rlu nú uzucu ichi bee bene che neca Cirenio gobernador lu iliu Siria. 3 Chequie ye bee bene rquiêña nú nza beella lachi beella para nú zucu ichi beella zeêe. 4 Enzeêe, uchiuêu José eyeche Nazaret, nú nchiñi lu iliu Galilea, nu uyalla lu iliu Judea eyeche Belén, elu ungula tuxie arre David, xne lubee familiê tuxie arre David nzeêta José. 5 Uya José eyeche Belén para nú zucu ichilla cuna María, enu nzula nú yuculla nu nuêla enduê xlaêcu María. 6 Chequie diqui nú nucuaêa beella eyeche Belén, uriña bichia nú ala enduê María. 7 Zeêe ungula enduê rluêlla liñi niê bee nañi nu utelalla tucu laquie liêinu nu chu udixiulla liêinu liñi tucu cajón elu riuêu nú racu bee nañi, xne lecaê luhuare elu yaêna beella liñi niêi elu riaêna bee bene. 8 Axu eyeche Belén zeêe nucuaêa chiucu chuna bene enu rriucu bee sanchi nu riaêna beella dañi rula cuna bee sanchi. 9 Che tuênatsia ulubeêlu tucu ángeleê Diose lubeella, nu uduêllieêe ellieêe Diose diqui abenchilaê beella, nu chiquiê ulliqui beella. 10 Nu uni ángele zeêe lubeella: âLa lliquihua, xne uriñayua tucu resuna nzeêca luhua, nu equie cuendaê resuna quieê tsu nzeêca arquiê ye bee bene. 11 Nee lachi David ungula tucu enu tsilaêa liêihua, necanu Cristo, enu rluêcu nú rnibiyaê. 12 Nu para nú chuluhua enduê quieê, llelaêhua liêinu liñi niêi bee nañi nebelanu tucu laquie nu nchiucuênu liñi tucu cajón elu riuêu nú racu bee nañi. 13 Hora zeêe ulubeêlu huaxilá bee ángele liñibe elu nzu ángele zeêe, nu rni bee ángele cuaê bedichiaê nzeêca lu Diose nú uni beenu: 14 ¡Cheêtsalá Diose enu nzucu liñibe! ¡Chuêu nú nzuxee lu iliulabe, para bee bene enu rriêi tucu nú riuê arquiênu! 15 Chequie chenu uquie bee ángele zeêe liñibe, bee bene enu rriucu bee sanchi zeêe uni beella lusaêbeella: âChaahua eyeche Belén, che biêyaêahua lunú unga zeêe tucu nú udixiuleêe Diose Pa liñibe luaêahua. 16 Nu yexetsia nzuebeella nu ullelaê beella María cuna José liñi niê bee nañi cuna enduê meê zeêe, nu nchiucuênu liñi tucu cajón elu riuêu nú racu bee nañi. 17 Chenu ulañiê beella nucuaê, uni beella lunú udixiuleêe ángele lubeella equie cuendaê enduê zeêe, 18 che uyanu arquiê ye bee bene enu ubeneê lunú uni bee bene enu rriucu bee sanchi. 19 Pero uducheêtsia María ye bee bedichiaê cuaê arquiêlla, cuna nú rriêilla elliebacuê lu cuendaê nucuaê. 20 Chequie chenu ubenchilaê bee bene enu rriucu bee sanchi chiquiê ñia nzu arquiê beella rdeteê beella cheêtsa lu Diose, cuna nú rni beella bedichiaê nzeêca lunu lu ye nú ulañiê beella cuna nú ubeneê beella, xne unga ye tucu nú udixiuleêe ángele lubeella. 21 Chenu uzaê xunu bichia nú ungula Jesuse uquie seña elu necachiênu, tucu nú rquie seña elu necachiê bee niyu enu neca bee bene Israel, nu uhualee beella liêinu Jesuse, tucu nú udixiuleêe ángele lu María ante nú chuêunu xlaêculla. 22 Chenu uzaê bee bichia nú uriêi María tucu nú rnibiyaê leyê Moisés nú rriêi bee unaêa chenu rala enduê beenchu, che unguyaê beella Jesuse liñi indu llene Jerusalén lu Diose Paa liñibe. 23 Uriêi beella scua, xne rni leyê Diose: “Ye bee enduê niyu enu neca enduê rlu necala beei para Diose." 24 Che uyayu beella uêna lu Diose tucu nú rnibiyaê leyê Diose, chiucu cuêcu urre chiucu paloma. 25 Tiembu zeêe uhuañi tucu bene eyeche Jerusalén enu lee Simeón. Ungalla tucu bene nzeêca, nu chiquiê rluêculla ulaêna lu Diose nzuquieella lañiêlla bene enu tsilaêa bee bene Israel. Nu nzu Espíritu Santo cuna liêilla, 26 equie cuendaê Espíritu Santo ungabiyaê Simeón nú la atiscaêlla hasta nú lañiêlla Cristo, enu xeêla Diose enu rluêcu nú rnibiyaê. 27 Leêca uduê Espíritu Santo arquiê Simeón nú uyalla liñi indu llene Jerusalén. Nu chenu uyanu paê Jesuse liêinu cuna naênu liêinu liñi indu zeêe para nú uya riêi beella tucu nú rnibiyaê leyê Moisés nú riêi bee bene, 28 che unaêtse Simeón Jesuse nu uchiêchilla liêinu nu unilla bedichiaê nzeêca lu Diose, nú unilla: 29 Diose Paa liñibe nuê modo zelalu nú atia lecaê xi chenuarquia nee, xne uzaêla lunú ucuaqui uênalu lua. 30 Nee si ulañilá bene enu tsilaêa liêiru nee, 31 liêinu necanu, enu uxeêlalu lu ye bee bene iliulabe, 32 Liêinu necanu xi neca ellieêe nú xaêla elliebacuê bee bene enu la neca bee bene Israel. Nu chiquiê aca neca equienu lubee beneêlu enu neca bee bene Israel. 33 Chiquiê uyanu arquiê José cuna María naê Jesuse chenu ubeneê beella lunú uni Simeón scua equie cuendaê Jesuse. 34 Chequie uriêi leêya Simeón beella, nu unilla lu María, naê Jesuse: âIxiuleêa lulu María nú utsula Diose enduê quieê, nú huaxi bee bene Israel la chili arquiê liêinu, nu leêca huaxi bee bene chili arquiê liêinu, nu uriñanu para nú zeteênu bee bene xa niarquiê Diose nú huañi beei, pero huaxi bee bene la yucu arquiê liêinu. 35 Nu scua riêinu beyaê xa neca elliebacuê cada tucua bee bene. Pero liêilu María xi neca chenu rdete tucu espada arquiê tucu bene scua tsiêlu chenu aca bee nucuaê. 36 Leêca liñi indu zeêe nzucu tucu unaêa enu neca profeta. Liêilla leella Ana, nu necalla xinchiuêcu Fanuel enu nzeêta lu familiê Aser, unguxulalla. Nu chiquiê nereêneêlla chenu uchialla nu uzucunulla niyuêlla achi lana, 37 nu ungala ochenta y cuatro lana nú uyaêna zaquilla. Niê tucu bichia la dete seella indu, ye bichia nzuculla liñi indu rnacuêlla lu Diose, nu rdeteêlla bichia nú la aculla equie nú rluêculla ulaêna lu Diose. 38 Chenu rdichiaênu María Simeón, hora zeêe uriña Ana, chenu ulaxu nú udeteêlla cheêtsa lu Diose uquixiella nú unilla equie cuendaê Jesuse lu ye bee bene enu nzuquie nú riña bene enu tsilaêa Jerusalén. 39 Chequie chenu ulaxu nú uriêi José cuna María lu ye nú rnibiyaê leyê Diose, ubenchilaê zeca beella lachi beella Nazaret nú nchiucuê lu iliu Galilea. 40 Diqui nú nzeêta ruêcu Jesuse, nze aca naaquinu cuna nú chiquiê reca elliebacuênu nu chiquiê uriêileêya Diose liêinu. 41 Zaêlana se José cuna María eliñi baxcu eyeche Jerusalén. 42 Chenu uzaê Jesuse chiêchiucu lana, uya ye beella Jerusalén, tucu nú neca costumbreê beella nú see beella eliñi baxcu zeêe. 43 Pero chenu ubenchilaê beella nú ulaxu eliñi zeêe, né riêi José cuna María beyaê nú uyaêna Jesuse Jerusalén. 44 Uriêi beella elliebacuê nú tia nzeêtanu leta bee bene, nu utsela beella tucu bichia lu inziu, pero chenu ucuaêna beella liêinu leta bee beneê beella, cuna leta bee bene enu nuêlu beella, 45 né llelaê beella liêinu leta bee bene zeêe. Che ubenchilaê zeca beella Jerusalén nze laêna beella liêinu. 46 Chenu udete chuna bichia ullelaê beella liêinu liñi indu llene Jerusalén, nzucunu leta bee ulaxcuela enu reca leyê Moisés, nu sucuê diacanu nú rni beella nu rdichiaênunu beella. 47 Che ye bee bene enu rieneê nú rninu, chiquiê uyanu arquiêbeella lunú chiquiê recanu, nu leêca nzenu arquiêbeella lunú xa ucuaquinu lubeella. 48 Chenu ulañiê José cuna María liêinu, uyanu arquiêbeella, nu uni María naênu lunu: âEndua, ¿xinu uriêilu scua? Paêlu cuna liêá chiquiê nzenu arquiêru rlaênaru liêilu. 49 Che ucuaqui Jesuse lubeella: â¿Xinu rlaênahua liêá? ¿Xieê la riêihua beyaê nú rquiêña nú riêá riñaê paa la? 50 Pero lá riêi beella beyaê xinu uninu scua. 51 Che ubenchilaênunu liêibeella eyeche Nazaret, nu uzucuênu ye nú rni beella, pero María naênu uducheêtsialla ye bee nucuaê arquiêlla. 52 Nu nzeêta ruêculá Jesuse cuna nú chiquiê nze aca elliebacuênu, nu ñia nzu arquiê Diose lunu. Leêca ñia nzu arquiê bee bene lunu.