Hebreos 5
TBL1 Yebee bene enu reca uleêya enu máse rnibiyaê lu beelá bee uleêya, Diose rcañi liêilla leta bee bene para nú nacuêlla lu Diose equie cuendaê bee bene, nu yalla rdeteê cuenda bee bene uêna para nú deteêllae lu Diose cuna bee nañi enu rquiêña nú ati equie cuendaê stula bee bene. 2 Nu lunú neca uleêya cuaê bene nediyaêlla lunú xa seca bee bene. Enzeêe rluêculla paciencia bee bene enu la riêibeyaê lunú rriêi, nu cuna bee bene enu rriêi dula ana lu. 3 Nu lunú leêca nuê chenu rriêi uleêyacuaê dula enzeêe leêca riñilla tucu nañi xi neca uêna lu Diose equie cuendaê stulalla, tucu nú rriêilla lu cuendaê stula bee bene. 4 Nu lecati enu aca eêcu uleêya enu máse rnibiyaê lubeelá bee uleêya lunú niarquiêtsialla sino que Diose neca enu rcañi liêilla tucu nú ucañinu Aarón. 5 Leêca scua unga lu cuendaê Jesucristo, lá ninu nú a acanu uleêya enu máse neca equie luaêahua, sino que Diose ucañi liêinu chenu uni Diose: Liêilu necalu lliêñia, nu desde nee lubea lubee bene nú liêilu necalu lliêñia. 6 Leêca rni stucu luguare lu ichiê Stichiaê Diose equie cuendaênu: Liêilu necalu uleêya diqui tiembu, tucu nú unga Melquisedec uleêya. 7 Chenu ubeêta Jesucristo lu iliulabe quieê, chiquiê ungunaênu nu juerte unacuênu lu Diose enu reca tsilaêa liêinu lu eluti. Che uriêi caso Diose liêinu nu uriêi Diose elietsaênu para nú tsalunu Stichiaê Diose. 8 Mase nú lliêñi Diose necanu pero uzucuênu nú rni Diose mase nú nehuana ulleêcanu. 9 Nu lunú neli uriêinu tucu nú niarquiê Diose nú riêinu, enzeêe equie cuendaê liêinu leca xunga laxu nú silaêa Diose bee bene enu sucuê nú rninu. 10 Nu Diose neca enu ucañi liêinu para nú acanu uleêya enu máse neca equie tucu nú unga Melquisedec uleêya enu unga neca equie. 11 Huaxiscaêlá nú rquiêña nia luhua equie cuendaê bee nucuaê, pero chiquiê neriñaê nú ixiuleêa luhua xa niarquia equie nú chabeê rriêihua beyaê. 12 Huaêtulila nuêluhua Stichiaê Diose, neequie hasta rialala nú seteêlahua bee bene Stichiaê Diose pero liêihua rquiêñiascaêhua enu zeteê zeca liêihua Stichiaê Diose nú ungalahua. Liêihua secahua xi seca tucu enduê meê enu rueê puro chiê enu lacascaê acu ye nú acu. 13 Nu yebee enu neca xi neca enduêmeê enu rueê chiê la aca bee nzeêe riêi nzeêca bee nzeêe beyaê xi rni Stichiaê Diose. 14 Pero bee bene enu másela rriêi beyaê Stichiaê Diose, liêibeella neca beella xi neca bee enu racula ye nú racu. Xne rriêilabeella beyaê tá nú neca nzeêca nu ta nú necha neca.