Gálatas 6

1 Bee saêa enu nzeli arquiaêahua Jesucristo, nia luhua nú tunu tucu bee saêahua rriêi dula ana lu, liêihua enu másela nzutaê arquiê lu Stichiaê Diose rquiêña nú nihua lulla pero niê nzeêcahua lulla. Nu uriêihua beyaê nú leêca nuê modo nú riêi dula ana luhua. 2 Uriêihua elietsa lubee saêhua lu xitse beenú nehuana seca beella che scua sucuêhua lunú rnibiyaê Jesucristo nú riêihua. 3 Tunu nuê enu seca nú reca ye nú reca nu lecaxi reca, che leêcatsia liêilla sequienulla liêilla. 4 Cada tucuhua riêihua beyaê tunu neli nú nehuañihua tucu nú niarquiê Diose nú huañihua. Nu tunu nehuañi nzeêcahua liêitsiahua llilaêhua luhuare nú riêihua elliebacuê nú nehuañi nzeêcalahua luquela beelá bee bene. 5 Xne cada tucuaêahua rquiêña nú biêyaêahua lunú xneca nehuañiaêahua. 6 Titse bene enu seteê Stichiaê Diose rquiêña nú riêilla elietsa lu bene enu seteê liêilla lu xitse nú rquiêñalla. 7 La zequienuhua leêcatsia liêihua, xne leca modo nú itanu bene Diose xne ye beenú rduê ni bene enzeêe riêi bene ulaêcu. 8 Tunu nehuañitsia bene lunú necha neca rriêi bene elliebacuê. Riña bichia nú zecalla castiya, pero bene enu nehuañi tucu nú rnibiyaê Espíritu Santo, equie cuendaê Espíritu Santo luêculla elu nehuañi nú leca xunga laxu ante Diose. 9 La llacaêahua riaêahua nú neca nzeêca. Xne tunu la llacaêahua, che riña bichia nú atiaêahua nú riala atiaêahua. 10 Enzeêe chenu nuê modo nú riaêahua elietsa lubee bene rquiêña nú riaêahuane, nu máse rquiêña nú riaêahua elietsa lubee saêahua enu nzeli arquiê Jesucristo. 11 Biêyacuruhua xi llene bee letraquieê rquieêá luhua nu liêi eêcua rquieêene. 12 Bee bene enu rriêi juerza liêihua nú quie seña nú rquie bee bene Israel liêihua rriêi beei scua para nú yaêna nzeêca beei ante bee bene nu la niarquiêbeei nú nehuana zeca beei equie nú nzeli arquiêbeei Jesucristo. 13 Pero niê bee bene enu nequie seña cuaê la riêibeei tucu nú rni ley. Niarquiêtsiabeei nú quie señacuaê liêihua para nú aca nelliñabeei nú uriêilabeei ana luhua nú quie señacuaê liêihua. 14 Pero liêá leca xi stucu nú aca nelliñaa, necatsiae equie cuendaê nú unguti Jesucristo. Nu equie cuendaê nú ungutinu lu cruse utsaênalá ye nú nechá neca nuê lu iliulabe quieê, nu para bee nucuaê neca xi neca nú ungutilá. 15 Xne chenu neca tucu necatsela bene cuna Jesucristo lecaxi zibiê tunu nequie seña bene urre la nequie seña bene. Lunú mase neca equie neca nú ucheêela nú xneca nehuañi bene. 16 Nu bee bene enu nzenalala inziuê Jesucristo, Diose huaêa arquiê bee nzeêe nu riêinu nú nzuxe arquiê beella cuna yebeelá bee bene enu neli neca bee beneê Diose. 17 Desde nee la niaê arquia nú zucuê llianaláhua arquia. Xne bee beyaê nú nuyaa cuerpoa rlubeê nú necaa apóstolê Jesucristo. 18 Bee saêa enu nzeli arquiaêahua Jesucristo, liêinu riêinu nú cha nzeêca lu cuendaê yehua. Amén.