Colosenses 3
TBL1 Enzeêe nee lunú rluêculahua elunehuañi nú necuqui neca cuna Jesucristo, ucuaênahua nú riêihua elliebacuê lu cuendaê beenú nuê liñibe elu nzucu Jesucrito cueêtse Diose chube. 2 La riêihua elliebacuê beenú nuêtsia lu iliulabe, máse uriêihua elliebacuê beenú nuê liñibe, 3 xne neca xi neca nú ungutilahua lu cuendaê nú nuê lu iliulabe nu rluêculahua elu nehuañi nú necuqui neca equie cuendaê Jesucristo, lu Diose. 4 Nu chenu riña Jesucristo, liêinu enu rliquiê elunehuañi luaêahua, leêca nuhua yalahua nú huañihua cuna liêinu elurnibiyaênu. 5 Nee, utsanaêhua ye beenú necha neca nuê lu iliulabe quieê. La riêihua bee eluhuexe niê beenú lecaxi zibiê, niê bee elliebacuê nú necha neca, niê beenú necha neca nú riuêu ana arquiêhua rriêihua, leêca la cuaênahua nú riêihua elu neyiê nú luêcuhua huaxi beenú luêcuhua xne nucuaê neca xi neca nú rluêcuhua ulaêna lunú la neca Diose. 6 Nu equie cuendaê bee nucuaê nzeêta castiyaê Diose nú zeca bee bene enu la zucuê nú rninu, 7 nu saê beenú necha neca cuaê uriêihua ante nú chuluhua Jesucristo. 8 Pero nee utsanaêhua ye beenú necha neca. La aca nelachi nzu arquiêhua, la leehua lubee saêhua, nu la riêihua beenú necha neca lubee saêhua, la zeêtahua bee saêhua, nu la nihua bee bedichiaê chiêquiê. 9 La nihua eluquichiaê lubee saêhua, xne la nehuañiaêhua tucu nú uhuañihua huaêtu chenu uriêihua beenú necha neca. 10 Xne ucheêela Diose xa nehuañihua, necalahua xi neca tucu bene cuqui equie nú lleênaa lleênaa nze acahua tucu nú niarquiê Diose nú acahua para nú chulu nzeêcahua Diose, liêinu enu urecheê liaêahua. 11 Nu chenu uyalila arquiê bee bene Jesucristo lecaxi riêi lunú ti neca beella, tunu neca beella bee bene Israel urre la neca beella bee bene Israel nu tunu nequiee seña nú rquiee bee bene Israel liêibeella, urre la nequiee seña cuaê liêibeella, tunu necabeella bee bene rene nu tunu necabeella bene ixi nu tunu necabeella enu neiqui lu stucu bene urre la necabeella enu neiqui. Pero lunú máse seca nú chili arquiê bee bene Jesucristo, liêinu enu rnibiyaê nu nzu cuna yeêahua. 12 Diose seca liêihua, enzeêe ucañinu liêihua para nú acahua bee beneênu. Enzeêe uhuaêa arquiêhua bee bene, aca nzeêcahua nu la aca nelachihua. La aca nelliñahua, utsuquie arquiêhua bee saêahua. 13 Uriquiêhua bee saêhua, nu uriêihua perdona liêibeella tunu nuê xi rriêibeella luhua. Tucu nú uriêi Jesucristo perdona liêihua leêca esquie uriêihua perdona bee bene. 14 Lu cuendaê yeene máse rquiêña nú seca bee bene saêlla. Nu eluseca cuaê neca nú rriêi elietsa para nú huañi bee bene nú neca tucu necatse beella. 15 Utsanaêhua nú nibiyaê Jesucristo luhua para nú luêcuhua nú nzuxe arquiêhua xne para nucuaê ucañi Diose liêihua para nú aca tucu necatsehua lubee saêhua equie cuendaê Jesucristo, nu udeêtehua cheêtsa lunu equie cuendaê nucuaê. 16 Chiquiê uduêequiehua bee stichiaê Jesucristo. Uzeêteêhua bee saêhua nu uniêhua bezeteê lubeella tucu nú rialane. Diquinuê arquiêhua udeêteêhua cheêtsa lu Diose, cuna bee canto cuna bee salmos nú cuna bee canto nú neca para liêinu. 17 Ye beenú rriêihua urre rnihua, rluti ulluêcu arquiêhua Jesucristo enu rnibiyaê luaêahua nu equie cuendaê liêinu deteêahua cheêtsa lu Paêahua Diose. 18 Liêihua bee unaêa enu nechiala, uzuêcuêhua nú rni bee niyuêhua xne scua riala nú riêi bee bene enu nzeli arquiê Jesucristo. 19 Nu leêca esquie liêihua bee niyu enu nechiala, uzecahua bee unaêahua nu la xitse riêinuhua liêibeella. 20 Leêca esquie liêihua bee enduê, lu yeene uzuêcuêhua nú rni bee paêahua cuna nú rni bee naêhua, xne scua riuê arquiê Diose nú riêihua. 21 Nu leêca esquie liêihua bee paa cuna bee naa, la detehua lunú rriêinuhua bee enduêhua para nú la laca quieebeei lunú rriêinuhua beei. 22 Liêihua bee enu rriêi riñaê bee bene, uzuêcuêhua ye nú rni bee bene enu rriêihua riñaêlu lu iliulabequieê. La riêitsiahua nucuaê chenu riêyatsia beella luhua para nú yaêna nzeêcahua lubeella, uriêihua riñaêbeella diquinuê arquiêhua equie nú rlucuhua ulaêna lu Jesucristo. 23 Tatse beenú riêihua, uriêihuane diquinuê arquiêhua. Uriêihua nucuaê xi neca nú sibiêhua lu Jesucristo, nu la zibiêhua lubee bene. 24 Xne liêihua nediyaêhua nú scua yucuhua lunú liquiê Jesucristo enu rnibiyaê, equie nú sibiêhua lunu. 25 Pero bee bene enu rriêi nú necha neca, liêibeei yalabeei castiya lunú necha neca uriêibeei, xne tucutse rriêi Diose elu usticiaênu lubee bene.