2 Corintios 6

1 Enzeêe scua tucu nú rriêiru riñaê Diose, nacuêru luhua nú la tsanaê arquiêhua lunú neca nzeêca uriêi Diose luhua, xne tunu sanaê arquiêhuane lecaxi zibiêi para liêihua che. 2 Xne lu ichiê Stichiaê Diose nequie: Chenu uriña bichia nú uriêi casua liêilu, uriêi casua liêilu; nu chenu uriña bichia nú tsilaêalu utsilaêalu. Nu liêiru rniru luhua nú nee uriñala bichia zeêe para liêihua, uriñala bichia nú tsilaêa Diose liêihua. 3 Liêiru la riêiru nú necha neca nú caa nú la chili arquiê bee bene Jesucristo, nu lecaxi nú necha neca rriêiru para nú la nibee bene nú liêiru la riêiru tucu nú seteêru bee bene. 4 Sino que ye lunú rriêiru, rriêirune para nú lubeêru lubee bene nú sibiêru lu Diose nu rriquiêru lunú seêcaru sia nú nehuana seêcaru, lunú xi seêcalaêchaêru, nu nehuana nzu arquiêru, 5 nu riñi bee bene liêiru. Nu uduê bee bene liêiru niêcuê, nu uricuyaa bee bene equieru, nu ullacaêru equie riñaê nú rriêiru nu ungucha xcalaêru, nu uliaênaêru. 6 Nu leêca ulubeêru lubee bene nú sibiêru lu Diose equie nú nehuañiru tucu nú necane, equie nú nediyaêru tanú neli neca, nu equie nú rluêcu arquiêru nu rriêi nzeêcaru lubee bene, equie nú nzu Espíritu Santo cuna liêiru, nu equie nú seêcaru bee bene, 7 equie nú rniru nú neli neca, equie nú rriêi Diose elietsa luru, equie nú rniru bezeteê lubee bene, nu equie nú recanuêru liêiru cuna Stichiaê Diose. 8 Nuê chenu rluêcu bee bene ulaêna luru nu leêca nuê chenu riqui chiêquiê bee bene liêiru. Nu leêca nuê chenu rni beella bedichiaê nzeêca lu cuendaêru, nu leêca nuê chenu seêta beella liêiru. Nu nuê chenu la chili arquiê beella nú rniru, añinzuca nú rniru nú neli neca. 9 Nuê chenu rriêibeei luru xi neca nú la chulu beei liêiru, añinzuca nú nuêlubeei liêiru. Nu leêca seca beei nú nze atilaru, pero lascaê atiru, pero añinzuca nú uzeteêcheêbeei liêiru pero lá utibeei liêiru. 10 Añinzuca nú nehuana seêcaru, pero rlubeêru nú ñia nzu arquiêru, añinzuca nú seêcaru elitsi pero por liêiru huaxi bee bene neca xene ante Diose, nu mase nú lecali xi rluêcuru lu iliulabe quieê, pero lecaxi riêi falta liêiru. 11 Bee saêa enu nzeli arquiaêahua Jesucristo eyeche corintios, unilaru ye nú uniru luhua nu lecaxi utsacuê arquiêru luhua equie nú chiquiê seêcaru liêihua. 12 Liêiru seêcaru liêihua, pero liêihua lleênatsia secahua liêiru. 13 Pero liêá nia luhua xi rni tucu uzana lubee lliêñilla: Uzecahua liêiru tucu nú seêcaru liêihua. 14 La aca tucunecatsehua cuna bee bene enu la chili arquiê Diose, xne la neca elliebacuê bee bene enu nzenala inziuê Diose tucu nú neca elliebacuê bee bene enu la chenala inziuê Diose. Xne leca modo yeteê ellieêe cuna nú necabe. 15 Liêihua nediyaêhua nu la neca tucunecatse Jesucristo cuna bezeêlu, nu leêca scua leca modo aca tucu necatse bee bene enu nzeli arquiê Jesucristo cuna bee bene enu la chili arquiê Jesucristo. 16 Urene neca bee bene enu nzeli arquiê Diose Pa liñibe luquela bee bene enu nzeli arquiê bee enu laca diose, xne liaêahua enu nzeli arquiê Diose enu nehuañi, liaêahua necaêahua induênu, scua tucu nú nequie tucu parte lu ichiê stichiaênu elu rni: Liêá huañia cuna liêibeella nu tsua cuna liêibeella catse elu nucuaêa beella. Liêá aca Dioseê beella, nu liêibeella aca beella bee benea. 17 Nu leêca rni lu ichiê Stichiaê Diose: La riêihua beenú necha neca rriêi bee bene, uchiuêu chuhua lubee nucuaê. La riêihua beenú necha neca. Para nú yucuaêa liêihua, 18 Nu che acaa Paêhua, nu liêihua acahua bee llianaêa nu xinchiuêcua, scua rni Paêahua Diose, liêinu enu rluêcu ye poder.