2 Timoti 4

1 Timoti a tpêee, nmî Mî ngîma myenté Tpêoo Yesu Kédisu u ngîma, kópu ṉga ngmênînê tpapê. Dini ghi nêii ngê Yesu Kédisu wa a diyé, u pi ndîî ngê wa pyódu, wa kóté kalê nmo. Yélini mwiyé pwêoo dniye, wa kóté kalê té, yélini yi ngwo adnyi ya, wamye kóté kalê té. 2 Yi kópu u lêêê dîyêo u kópu dyuu pi knî ye chi tpapê. Kêomo tpile ṉga adnya a ngêaa, ó daadnya a ngêaa, ngmênê ye chi tpapê. Yélini dnyinté a nuwêo nyédi, chi wátiwáti dé. Yélini a dono nyédi, yi dono ye chi kwódukwódu dé. Yélini mbêaambêaa ngê maa pêuu a wee, chi wêdêwêdê kîgha dé, chi ndiye kîgha dé, m̱odo lêâmo lîmîlîmî ngê kîdangê ngêpa. 3 Ala ngwo dpodombiyêe chi dpodo, mu kópu u dîyêo mu dini ghi ngê yoo ndê kópu dyuu ka daadnyinêaa ngêaa, u yi yêe adî kwo, Knêaa kópu knî mêuu nmî nyêmî. Yi ngwo nêii knî yêoo yi nuu u kópu dé ye adnyi tpapê dé, vyîlo yi yéli ye adnyi ngêaa. 4 Nmî Mî u ndê kópu dyuu u wépi wa pwaa ngmê, wêêê danêmbum knî yi pêuu adnyi nuwêo. 5 Ngmênê yinté pini ngê nangmê pyódu. Dye ghi yintómu mbêaambêaa ngê chi nuwêo, dono cha a vyîmî dé, pi knî ye nmî Lémi u kópu dyuu chinêaa tpapê dé, ntênê pêuu chi dpodo. 6 A chóó a pêuu kópu ṉga ngmênînê tpapê. Pi knî yêoo tpile tpêoo kpêê ngê ntee dpî yé têoo, Chóó Lémi u ngwo dpî châpu ngmê, daa kêmakêma dyámê nînê kuwokuwo, yinté nêaa pyodopyodo, Chóó Lémi u pi u ngwo anî knî. 7 Mbêpê têdê dpodombiyêe noo mbêpê, dîpî kede wo, u ndê kópu dyuu dêoongê ngmópu. 8 A dpodo u pywuu ngê mbóó pêuu kîyedê têââtêââ nê, Chóó Lémi ka dêudêumbiyêe pi mbêaa ngê u ngwo anêuu pyódu. Kuwókuwó wéni ngê nmî Lémi ngê ntênê wa kóté kalê nmo, a pywuu u ngwo a ka wa a kê. Ngmênê daa a mo. Yélini yi kêii nmo têââtêââ, nmî pywuu dmi kwodonkwodo nmo wa a kê. 9 Timoti, u ya a nga a kwo, Lîmîlîmî ngê a ka dpo pwiyé. 10 Dimas ngê a kuwo noo, Tesalonika loo, mu kópu u dîyêo u nuwêo dyámê u kópu knî yi pêuu a kwo. Kîdesens Nkalásiya Wee u kwo loo, Taitas Dalîmesiya Wee u kwo loo. 11 Luukî mu ngmidi a pêuu ayedê têa. Mak amîmêaa dpo ngépi, u kêii nipi dpo lee cho, mu kópu u dîyêo a dpodo têdê yinê pîchoo ngêêpî nê. 12 Tikikas Epeso kînî dyêââ ngê. 13 Dini ghi nêii ngê Tîdówas nê kuwo ngê, a nkuwo kpîdî puku dmi péé Kapas u ngomo kêoo nê kuwo doo, u kwo dpo ngee dé, a ka dpo Åuwêo dé. A puku dmi nêii tpile tpêoo too pee ngê lêâmo tumo, yi yi dmi a nga mbêaambêaa ngê a kwo. 14 Pini nêii ngê nkéli chêêpî pee ngê tpile a lêâmolêâmo too, Aleksándê, a pi yono dyênê ngê. Nmî Lémi ngê ntââ u ngwo wa a vyêu. 15 Ṉga cha a vyuwo, kîngê dyênê ngi. Kópuni noo tpapê dé, dêudêumbiyêe doo u nuu u kópu ngê pyaa dniye, a ka doo a kwopwepe. 16 Dini ghi nêii ngê kada pini ngê mwiyé a kóté kalê noo, pi a nkîghêê dêpwongmê kwo, a pyipe knî yêoo a mo a kuwo noo. U ya a nga daa kwo, Nmî Mî ngê ntââ ye dpo vyêee ngê. 17 Pi a nkîghêê dêpwongmê kwo, ngmênê nmî Lémi a nkîghêê vyîlo yidoo kwo, yinê doo wêdêwêdê kîgha nê. U yi u ngwo doo kwo, Yélini daa Nju tpémi nê ngê a kópu dyuu ye vyi ngê, yi yéli yêoo nyêee yêe. Nmî Lémi ngê wodêpê ngee noo, ye a vyee têdê pî dyêââ noo, layóni knî yêoo pî ma noo. 18 Yi ngwo ntee a ngee noo, dono yintómu yi kêlê yinté amye dyé nê, kóó kêoo amî kaa nê. Yi kópu u lêêê dîyêo dye ghi yintómu u pi kmîmî koo, chedê ngê kîngê pyódu. Yinté choo ya. 19 Akwila cha Pîdisila ye a mbêaambêaa dpî yéni, Onésipódas mupwoknî ye a mbêaambêaa myoo yéni. 20 Edastas Kódin nê kuwo ngê, Tîdopimas Militas nê kuwo ngê, mu kópu u dîyêo doo a mbii. 21 Yópu ndîî u dye ghi ghêlî kêii kîngê dêii, u ngwo dpo pwiyé. Yupulas, Pudens, Lainas, yi pini pyile knî yi kêii nmî mbêaambêaa ṉga dpo dyêââ, nmî tîdê Kîlódiya ngê u mbêaambêaa ṉga myeda dyêââ. Yélini nmî Lémi ka alêii wunê kêlîmî té, yi mbêaambêaa ṉga myedê dyêââ ngmê. 22 Nmî Lémi ṉga choo a vyuwo, nmî Mî ngê choo a ngêêpî nmyo. Wu u dî.