Yaburin Sora 25

1 Dawuda gbeena. Alatala, n bata i maxandi n niin birin na. 2 N ma Ala, n yigin saxi i tan nan yi. N nama yagi. I nama tin n yaxune yi n nɔ, e sɛwa. 3 Naxan na a xaxili ti i ra, na kanna mi yarabima mumɛ! Koni naxanye yanfan soma, ne yagin sɔtɔma nɛn. 4 Alatala, kiraan yita n na, i xa n xaran i ya kiraan ma. 5 N xa sigan ti i ya ɲɔndini, n xaran. Amasɔtɔ n nakisima Ala nan i tan na. N xaxili tixi i ra fɛriɲɛn gbɛn! 6 Alatala, i xaxili lu i ya kininkininna nun hinanna xɔn bayo e yi na xabu a fɔlɔni. 7 I nama i miri n ma foningeya yulubine nun matandine ma! N suxu i ya hinanni, amasɔtɔ i fan, Alatala. 8 Alatala fan, a mɔn tinxin, nanara a yulubi kanne xaranma a kirane ma. 9 Naxan a yɛtɛ magodoma, a a sariyan nabirama na ma. A mɔn a xaranma a sagoon na nɛn. 10 Naxanye a layirin maxadine suxi, Alatala hinan, a mɔn lannayaan nabama ne nan xa kiin birin yi. 11 Alatala, n hakɛne mafelu i xinla a fe ra, amasɔtɔ a gbo. 12 Nde gaxuma Alatala yɛɛ ra? A kiraan yitama na kanna ra a lan a xa sigan ti naxan xɔn. 13 Na kanna sabatima nɛn a siimayani, bɔxɔn yi findi a diine kɛɛn na. 14 Alatala a wundone makɛnɛnma nɛn a yɛɛ ragaxu muxune xa. A a layirin yitama e ra nɛn. 15 N yɛɛn tixi Alatala ra waxatin birin, bayo a tan nan n natangama suxu yalaan ma. 16 Ala, yandi, kininkinin n ma amasɔtɔ n kedenna na a ra, n tɔrɔxi. 17 Nii yifɔrɛn bata n yili, n namini na tɔrɔni. 18 I miri n ma tɔrɔne nun n ma sɔxɔlɛne ma, i yi n ma yulubine xafari. 19 A mato, n yaxune wuya, e n naɲaxuxi kati! 20 N niin nakantan, i yi n xunba. N nama yarabi, amasɔtɔ n bata n luxun i yi. 21 N ma fɛtareyaan nun tinxinyaan xa n kantan amasɔtɔ n xaxili tixi i tan nan na. 22 Ala, i xa Isirayila xunba a tɔrɔne birin yii!