Yaburin Sora 24

1 Dawudaa bɛtina. Alatala nan gbee bɔxɔn nun ayi seene birin na e nun dunuɲa nun muxun naxanye birin dɔxi a yi. 2 Amasɔtɔ a tan nan bɔxɔn dɔxi igen tagi. A yi a dɔxɔ igene fari. 3 Nde lan a te Alatala geyaan fari? Nde tiyɛ a yire sariɲanxini? 4 Naxanye sariɲan e kɛwanle nun e sɔndɔmɛne yi, naxanye mi suxurene batuma, xanamu naxanye mi e kɔlɔma wuleni, 5 Alatala ne barakama nɛn. Marakisi Tiina Ala yoon fima e ma nɛn. 6 Muxu sifani itoe nan Ala fenma, naxanye Yaxubaa Ala yɛtagin fenma. Bɛti xuini te. 7 Yinna dɛɛne xa rabi fefe, dɛ fonne xa rabi mumɛ, nanara Manga Binyen soɛ. 8 Nde Manga Binyeni ito ra? Alatala na a ra fangamaan nun sɛnbɛmana! Alatala na a ra naxan sɛnbɛn gbo yɛngɛni. 9 Yinna dɛɛne xa rabi fefe, dɛ fonne xa rabi mumɛ, nanara Manga Binyen soɛ. 10 Nde Manga Binyeni ito ra? Alatala Sɛnbɛn Birin Kanna, a tan nan manga binyen na. Bɛti xuini te.