MATHAYI 20

1 «Mukuma, Kipfumu kya mazilu kifwanakani hanga: mutu mosi, pfumu wa kilanga waÌlubuka muna suka-suka kusanda basadi kikuma kya kilanga kyandi kya vinu. 2 Amana waÌyukana yi basadi mu fwalanga dimosi muna kilumbu amana waÌbatuma mu kilanga kyandi kya vinu. 3 WaÌlubuka hika mu tangwa dya vwa dya suka, wumoni bahika bakala kuna zandu bakonda kisalu. 4 Kwena batu bana wuzimbudi: “Alwenda benu phi muna kilanga kya vinu, amana yiluheka lufutu luna lufwani." 5 Bawu benda kwakuna. WaÌlubuka hika mu tangwa dya tsinzi, yi mu tangwa dya tatu dya masikidika, wusadi phila mosi. 6 Amana mu tangwa dya tanu dya masikidika, buna kaÌlubuka, waÌwana hika bakwawu bakala batelama hana, amana wubazimbwadi: “Kikuma kya biki luwheniki kilumbu kya muthu konda kisalu?" 7 Bamuzimbwadini: “Kikuma heku mutu wutubongi mu kisalu.” Yandi wubazimbwadi: “Ndenu lwenda benu phi mu kilanga kya vinu." 8 «Kuma buna kwaÌyila, pfumu wa kilanga kya vinu wuzimbudi kwena kaphita kandi: “Tela basadi amana wabafuta lufutu lwa bawu. WayaÌndikila kwena bana batsuka yi kuna kwa bana batheti." 9 Amana buna bisa bana baÌyandika mu tangwa dya tanu dya masikidika, baÌtambula kosu mutu fwalanga dimosi. 10 Amana buna bisa bana batheti, bakala banza ni bataÌmbula kuluta, kaasi batambudi, bawu phi, fwalanga dimosi kosu mutu. 11 Buna baÌtambula, baÌyandika mu kubokuta kikuma kya pfumu wa kilanga 12 yi kuzonzaka: “Baba bisiki batsuka, tangwa dimosi lwesi basadini, amana wubafuti kitesu kimosi yi betu tuhyombidi kilumbu kyosu yi mwini wutuwhidi!" 13 Kaasi yandi mu kuvutula kwena mosi wa bawu, wuzimbudi: “Mukwetu, yikuhangiku mbi; tuyukanikiku yi meni kikuma kya fwalanga dimosi? 14 Tambula kina kyenina kya ngeyi amana ndawenda. Yukani nzodi yihana, kwena wuna wenina watsuka, kitesu kimosi yi ngeyi, mana matadi meni-meni. 15 Yeku yi hamu dya kusadila mbongu zama bwosu nzodini? Kondilo kikudi-kudi wungyukidi kikuma kya buna yenina mutu wa mboti?" 16 Ihana ni, baÌtekila bakaÌla batsuka amana batsuka bakaÌla batheti.» 17 Bwosu kakala tombuka ku Yelusalemi, Yesu waÌbanata ku phungamu balonguki kumi yi bodi amana muna nzila, wubazimbwadi: 18 «Talenu, ku Yelusalemi tubati tombuka; Mwana wa mutu bamuÌlambula kwena mbuta wa banganga Nzambi yi balongi ba mitsiku. Ndola ya lufwa bamuÌzengila 19 amana bamuÌlambula kwena baphani, ndangu bamuseya, bamuzyatula, bamukhoka hana kitakani. Amana mu kilumbu kya tatu, kafuÌtumuka.» 20 Hanga ngudi wa bana ba Zebeteya waÌbwesuka kwena Yesu yi bana bandi ba bayakala amana waÌfukama ndangu kamulomba kima kimosi. 21 Amana yandi wumuzimbwadi: «Biki wuzodini?» Mukhetu waÌmuzimbwala: «Zonza ni bana bama baba bodi bazakala mosi kuna kitata kyaku, amana mosi ku kimama kyaku muna Kipfumu kyaku.» 22 Amana Yesu mu kuvutula, wuzimbudi: «Lwisiku zaya mambu mana lwisi lomba. LwaleÌnda kunwa mbungu yina yinwa meni?» Bawu bamuzimbwadini: «Twalenda.» 23 Yandi wubazimbwadi: «Mbungu yama lwanwaÌya. Kaasi kuzakala ku kitata kyama yi ku kimama kyama, ka meni ku yihana muswa; kaasi bizika byenina kikuma kya babana kayidikilabya Tata wama.» 24 Bakwawu bana kumi, ha baÌyuka bwabuna, hanga babayukidi khabu baphangi bana bawu bodi. 25 Amana Yesu waÌbatela boosu wubazimbwadi: «Luzayi ni malemba ma makanda bisi yala hana thandu ya batu hanga bapfumu, amana bambuta bisi songila kwena bakwawu hamu dya bawu. 26 BwakaÌlaku buna ha kati dya benu, kaasi wuna wazoÌla, ha kati dya benu, kukituka mbuta, kakaÌla musadi wenu, 27 amana wuna wazoÌla kukala watheti mu kati dya benu kakala muhika wenu: 28 Bwosu Mwana wa mutu, yandi kiÌsaku ndangu bamusadila, kaasi kikuma kya kusadila yi kulambula luzingu lwandi mu phila ya kukatula batu balawu mu kihika.» 29 Buna baÌlubuka mu Yediko, mulumba-lumba wa batu waÌmulanda. 30 Amana baphofu bodi bazakala kuna kabeta ka nzila, buna baÌyuka ni Yesu kakala luta, baÌkalunga mu kuzonza: «Tuyukila kyadi, Pfumu, Mwana wa Tavidi!» 31 Amana mulumba-lumba wa batu waÌyandika kubakandikisa ndangu badibata, kaasi bawu baÌkalunga hika ngolu: «Tuyukila kyadi, Pfumu, Mwana wa Tavidi!» 32 Amana Yesu buna kaÌtelama, waÌbatela amana waÌbahyula: «Biki luzodi ni yilusadila?» 33 Bamuzimbwadini: «Pfumu, mesu metu matemuka!» 34 Amana yi kyadi kya lawu, Yesu waÌbasimba muna mesu; muna mbala mosi, baÌyandika kumona hika, amana baÌmulanda.