MATHAYI 18

1 Muna tangwa meni dina, balonguki baÌbwesuka kwena Yesu mu kuzimbula: «Nati si wenina mbuta wa mukwandi mu Kipfumu kya mazilu?» 2 Hanga wutedi mwana mosi, waÌmusya hana kati dya bawu, 3 amana wuzimbudi: «Mu kyedika yiluzimbwadi, yukani lusobiku, amana lwakituka hanga bana, lwakoÌtamwoku mu Kipfumu kya mazilu. 4 Disongidila, wosu wuna wadiÌkulumuna hanga mwana yandu, kakaÌla mbuta wa mukwandi mu Kipfumu kya mazilu. 5 Amana wosu wuna wuyambi mwana mosi mu khumbu ya meni, meni kayambini. 6 «Amana wuna wuhukumuni mosi wa bana bakhunda baba bisi kwikila mwena meni, bulungi kwena yandi bamuzitikila kalunga tadi hana tsingu amana bamudibula muna dingu dya yanga dya mbuta. 7 Khi kyadi kwena tsi kikuma kya bisinza, mu kyedika, bwalendaku salama ni kukalaku mambu mana misi sumuna; kaasi kyadi kwena wuna kyaluÌbwakila kisinza! 8 Amana yukani koku dyaku holo kulu dyaku dyakusumunaka, bukunadya amana losadya ku kyana yi ngeyi; bulungi kwena ngeyi wakota mu luzingu yi koku dimosi holo kulu dimosi, ka mboti ku ni wakala yi malu modi holo moku modi amana bakulosa ku mbawu ya mvula yi mvula. 9 Amana yuka ni disu dyaku dyakusumunaka, lokuladya amana losadya ku kyana yi ngeyi; bulungi kwena ngeyi wakota mu luzingu lwakonda tsuka yi disu dimosi, ka mboti ku ni wakala kwaku yi mesu modi amana bakulosa ku bilungi.» 10 «Talenu, lulewulaku mosi wa bana bakhunda baba; mukuma yiluzimbwadi ni banzyo ba bawu muna mazilu bisi tala kosu tangwa mbunzu ya Tata wama wuna wenina mu mazilu. 11 [Mukuma Mwana wa mutu kisa hulula bana baÌtota.] 12 «Abweti lwisi banza? Yukani mutu mosi kavwa mikoku khama, amana mosi muna kati dya myawu katota, kasiÌsaku makumi vwa yi vwa muna mongu ndangu kenda sanda wuna waÌtota? 13 Amana yuka ni kasengumunawa, mu kyedika, yiluzimbwadi, kasaÌngwala kikuma kya wawu kuluta makumi vwa yi vwa ma mina myakonda tota. 14 Phila mosi, lweku luzolu lwa Tata wenu wuna wenina muna mazilu, ni mosi mu kati dya baleki baba katota.» 15 «Yukani phangi waku kasumuka [kwena ngeyi], ndawenda, mumona, kalenu benu boodi lwesi. Yukani kakuyukila, wumunungini phangi waku. 16 Kaasi yukani kayukiku, bonga hika mutu mosi kondilo boodi ha kimosi yi ngeyi, ndangu mu ndinga ya bambangi boodi kondilo batatu dyambu dyosu dyayilama." 17 Kaasi yukani kabwisa kubayukila, zimbula ku Dibundu; amana yuka ni kabwisa phi kuyukila Dibundu, kakala kikuma kya ngeyi hanga muphakanu yi kalaki ka phaku. 18 «Mu kyedika, yiluzimbwadi, moosu mana lwakaÌsa ha tsi makaÌsama ku zilu, amana moosu mana lwakuÌtumuna ha tsi makuÌtumuka ku zilu. 19 «Mu kyedika, yiluzimbwadi hika ni yuka boodi ha kati dya benu bayukana, ha tsi haha, mu kulomba kyosu kima, kyakina kabaÌheka Tata wama wenina mu mazilu. 20 Mukuma hana henina bodi holo batatu bakhundakana mu khumbu yama, meni yenina hana kati dya bawu.» 21 Hanga buna kaÌbwesuka Phetelu wumuzimbwadi: «Pfumu, mbala kwa pfwani kulolula kwena phangi wama yandu wuphangi mbi, amana yimuÌlolula tii yi kuna mbala tsambwadi?» 22 Yesu wumuzimbwadi: «Yikuzimbwadiku ni yi kuna mbala tsambwadi, kaasi yi kuna mbala makumi tsambwadi yi tsambwadi. 23 Ihana ni, Kipfumu kya mazilu kifwanakani yi kyamvu mosi waÌzola kutala mambu ma pfuka zandi kwena basadi bandi. 24 Amana buna kaÌyandika mu kusalabwa, bisa munatina mosi waÌfwana kufuta mafunda yi mafunda ma mbongu. 25 Bwosu kakalaku yi kima kya kufuta, pfumu wandi waÌhana muswa ndangu bamutekisa yandi yi mukhetu wandi yi bana bandi yi bima byosu bina kaÌkala byawu, ndangu bafuta pfuka yandi. 26 Musadi waÌbwa muna malu mandi amana waÌfukama kuna thwala yandi mu kuzonza: “Sipha mbundu pfumu, kikuma kya meni, yikufuta pfuka yosu!" 27 Kiwayi kyaÌmukwata pfumu wa musadi wuna, waÌmusula kenda amana waÌmuyambwadilaya pfuka. 28 Mu kulubuka, musadi wuna baÌtundakana yi mosi wa banduku ba kisalu wuna wafwana kumufuta mbongu za khunda. Musadi waÌmukwata, amana waÌyandika mu kumukama hana dinga mu kuzimbula: “Futa pfuka yama!" 29 Hanga nduku wa kisalu wubwi muna malu mandi, kakala mubokwadila: “Sipha mbundu kikuma kya meni, yikufuta!" 30 Kaasi yandi kaÌzolaku; wenda mutimbula mu boloku, yi kuna kafuÌtila pfuka yina. 31 Mu kumona mana mabwa, banduku bandi ba kisalu kyadi kyaÌbakwata lawu; hanga bendi menika kwena pfumu wa bawu mosu mana maÌluta. 32 Hanga pfumu wumutedisi amana wumuzimbwadi: “Musadi wa mbi! Yikuyambwadidiki pfuka yaku kikuma wumbokwadidiki; 33 wulungikiku, ngeyi phi kuyukila nduku waku wa kisalu kiwayi, bwosu yikuyukidiki phi ngeyi kiwayi?" 34 Amana pfumu wandi, mu khabu, waÌmulambula mu boloku tii yi kuna kafuÌtila byosu bina kaÌfwana mu kufuta.» 35 «Yi bwabuna phi Tata wama wenina ku zilu kaluÌhanga yukani mosi-mosi wa benu kaloludiku kwena phangi wandi yi mbundu yandi yosu.»