YOWANI 9

1 Yesu kaÌkala mu kuhita, wumoni mutu mosi waÌkala phofu tukidila ku lubutuku lwandi. 2 Balonguki bandi bamuhyudini: «Mulongi, nati waÌhola disumu ndangu mutu yandu kakituka phofu: yandi ho bibuti byandi?» 3 Yesu wubavutwadini: «Heku ni yandi holo bibuti byandi baÌhola disumu. KaÌbutukila bwabuna ndangu mihangu mya Nzambi myamonikina mwena yandi. 4 Buna kwenina mwini, bwabuna tufwani mu kusala bisalu bya wuna waÌthuma. Phipha yekina bwa, heku mutu wufwani mu kuhanga muhangu wumosi. 5 Mu tangwa dina yenina ha tsi, yenina mwini wa tsi.» 6 Buna kaÌzonza bwabuna, waÌlokula metya hana tsi amana waÌyidika thoba yi metya mandi; kunima waÌkusa thoba meni zina muna mesu ma phofu 7 amana wumuzimbwadini: «Ndawenda disukula kuna kiziba kya Silowe.» -Disongidila ni «Kituma.» - Phofu wenda disukula mbunzu kwakuna; tangwa kaÌvutukisa, kakala mona! 8 Batu bana kaÌbandakana bawu yi bana bakala mumona theti buna kakala lomba bima kwena batu bakala zimbula: «Ka yandi ku mutu wuna wisi zakala mu nzila mu kulomba bima?» 9 Bamosi bakala zimbula: «Yandi wuna.» Bahika bakala zimbula: «Loni, mutu wamufwana». Yandi-meni kakala zimbula: «Meni yandu.» 10 Amana bakala muzimbwala: «Abweti matemukini mesu maku?» 11 Yandi wubavutwadini: «Mutu wuna bisi tela Yesu kaÌyidikiki thoba, wukhusiza muna mesu amana wunzimbwadini: “Ndawenda disukula kuna Silowe.” Hangi yendi kwakuna amana yidisukudini, ngyandiki phi mu kumona!» 12 Bamuzimbwadini: «Kubiki kenina mutu meni yayina?» Yandi wuvutudini: «Nzayiku». 13 BaÌmunata mutu wuna waÌkala phofu kwena bafwadisi. 14 Kinga, kilumbu kya sabata kyaÌkala kyakina kaÌyidika Yesu thoba amana waÌmutemuna mesu. 15 Bafwadisi, bawu phi baÌmuhyula mutu wuna, keti bweti kaÌyandikila mu kumona. Yandi wubazimbwadini: «Kakhusikini thoba muna mesu, yidisukudini mbunzu amana mbonini.» 16 Ndambu ya bafwadisi bakala zimbula: «Mutu yandu kaÌtukaku kwena Nzambi, kikuma kazitisidyoku sabata.» Bahika bakala zimbula: «Abweti ni musumuki kafwani mu kusala bidimbu bya biphadi bya mutindu wuna?» Amana baÌdikabisa bawu yi bawu. 17 BaÌzimbula hika kwena phofu: «A ngeyi meni, biki wubati zimbula kikuma kya yandi wukutemunini mesu?» Yandi wuvutudini: «Mbikudi kenina.» 18 Bayuta baÌkwikilaku ni phofu kaÌkala amana mesu maÌmutemuka. Yihakana baÌtedisila bibuti byandi 19 amana babahyudini: «Yandi-wu mwana wenu wuna lwisi zimbula ni phofu kaÌbutuka? Amana bweti kayandikidini mu kumonina buthwena?» 20 Bibuti byandi bazimbudini: «Tuzayi ni mwana wetu kenina, kaÌbutuka phi phofu. 21 Kaasi tuzayiku keti khi phila kaÌtemwani mesu, amana nati wumutemuni mesu, betu, tuzayibwoku. Muhyulenu yandi meni; mbuta kenina mu kutendula mambu mandi!» 22 Kima baÌzonzila bwabuna bibuti byandi, kikuma kya bweya bwa Bayuta; mukuma Bayuta baÌyukana mu kukula, mu nzu ya kimvuka ya Bayuta, wuna wataÌmbwasa ni Yesu kenina Kidisitu. 23 Yihakana bibuti byandi baÌzimbwala: «Mbuta kenina, muhyulenu yandi meni!» 24 Bafwadisi bamutedi mbala ya zodi mutu wuna waÌkala phofu amana bamuzimbwadini: «Ngeyi hana khembu kwena Nzambi; Betu tuzayi ni mutu wuna kenina musumuki.» 25 Yandi wuvutudini: «Nzayiku yuka ni musumuki kenina. Kaasi kima kimosi nzayini: phofu khadikini, buthwena mbati mona.» 26 Bawu bamuzimbwadini: «Biki kaÌkuhangikini? Abweti kaÌkutemunima mesu?» 27 Yandi wubavutwadini: «YiÌluzimbwadiki kedi, kaasi luyukikiku. Kikuma kya biki lubati zodila mu kuyukilabwa hika? Benu phi luzodi ni lwakituka balonguki bandi?» 28 BaÌmutukwana amana bamuzimbwadini: «Ngeyi wenina mulonguki wa mutu wuna; betu thwenina balonguki ba Moyize. 29 Tuzayi ni Nzambi kwena Moyize kaÌzonzila; kaasi yandu-yandu, tuzayiku keti kubiki katukini!» 30 Mutu wuna wubavutwadini: «Taleti dyambu dya kuyituka: benu luzayiku keti kubiki katukini, kinga yandi wuthemunima mesu! 31 Tuzayi ni Nzambi kisiku yukila basumuki, kaasi yuka ni mutu wisi zitisa Nzambi, wisi sala phi luzolu lwandi, kisi muyukila. 32 Khaku kedi tuyuka keti mbala mosi mutu watemuna mesu ma mutu waÌbutuka phofu. 33 Wadi ni mutu yandi kaÌtukaku kwena Nzambi, wadi kakhaniku sala kima.» 34 Bamuvutwadini: «Ngeyi mutu ni mu masumu waÌbutukila ngeyi wosu, amana wuzodini ni watulonga?» Hanga bamulubudini mu nzu ya kimvuka ya Bayuta. 35 Yesu waÌyuka ni bafwadisi baÌmukukwasa mutu wuna. WaÌmutundakana amana wumuzimbwadini: «Ngeyi wubati kwikila mwena Mwana wa mutu?» 36 Wumuvutwadini: «Nati kenina, Pfumu, ndangu yikwikila mwena yandi?» 37 Yesu wumuzimbwadini: «Wubati mumona; yandina wubati kuzonzisa, yandi wuna.» 38 Hanga mutu wuna wuzimbudini: «Khwikidini, Pfumu.» Amana waÌfukama kuna thwala ya Yesu. 39 Amana Yesu wumuzimbwadini: «Meni, yisa mu tsi yayi kikuma kya pfundusu yimosi: ndangu bana bisiku mona, bamona, amana bana bisi mona bakituka baphofu.» 40 Kunima dya kuyuka bwabuna, ndambu ya bafwadisi bana baÌkala kumosi yi yandi bamuhyudini: «Betu phi baphofu thwenina?» 41 Yesu wubavutwadini: «Wadi lwaÌkala baphofu, wadi lweku yi disumu; kaasi buthwena lubati zimbula: “Tubati mona”, amana disumu dyenu disadini bwabuna.»