YOWANI 10

1 Yesu wuzimbudini: «Mu kyedika yibatibwa luzimbwala: wuna wisiku kotila ku mwelu mu dinda dya mikoku, kaasi wisi kotila mu kuzanza kuma kwahika, yandi kenina mwifi yi ndwandwa. 2 Kaasi mutu wuna wisi kotila ku mwelu, kenina kalema ka mikoku. 3 Yandi bisi yafwadila mwelu kwena tsinzidi, mikoku myisi yuka ndinga yandi; kisi tela mikoku mya yandi-meni muna khumbu ya bawu amana wulubudimya ku phenza. 4 Buna kalubudimya myosu, yandi wuhitini kuna thwala ya myawu, mikoku mimulandini, kikuma mizayiya ndinga yandi. 5 Myalendaku landa munzenza ketibwe; myamuÌtina, kikuma mizayiku ndinga ya banzenza.» 6 Yesu waÌbaheka mbandu yina, kaasi bawu baÌbakulamoku mana kakala bazimbwala. 7 Yesu waÌbazimbwala hika: «Mu kyedika yibati luzimbwala: meni yenina mwelu wa mikoku. 8 Boosu bana bisa ku thwala meni benina befi yi bandwandwa; kaasi mikoku myaÌbayukilaku. 9 Meni yenina mwelu. Yuka ni mutu kakotila mwena meni, kahuÌluka; kakoÌta amana kaluÌbuka, kawaÌna phi phila za bukheti. 10 Mwifi kisi kwisila lwesi kikuma kya kuyiba, kuhonda yi kuzanga. Meni, yiÌsila ndangu batu bavwa luzingu amana bavwalwa lwa lawu-lawu. 11 Meni yenina kalema wabukheti. Kalema wabukheti kisi lambula luzingu lwandi kikuma kya mikoku myandi. 12 Wuna wisi sala lwesi kikuma kya mbongu, wuna wukondi vwa mikoku mya yandi meni keku musadi wakyedika; buna kamoÌna mbwa-ngongu, hanga sadi sisa mikoku, yandi wutini. Amana mbwa-ngongu kakwaÌta mikoku, wumwangimya. 13 Kikuma yandi mbongu kisi sadila, kisiku kala yi kiwayi kya mikoku. 14 Meni yenina kalema wabukheti. Nzayimya mikoku myama, amana mikoku myama phi minzayini, 15 bwosu buna kanzayi meni Tata, meni phi yimuzayini. Amana yisi lambula luzingu lwama kikuma kya mikoku myama. 16 Mvwini mikoku myahika, mina mikondi kala mu dinda dyadi. Mboti yihungulamya phi myamina ndangu bakobila, myayuÌka ndinga yama, amana myakiÌtuka kibuka kimosi yi muhungudi mosi. 17 Yuka ni Tata kisi nzola, kikuma meni mbati hana luzingu lwama, ndangu yitambulalwa hika. 18 Heku mutu wakhaÌtulalwa, kaasi meni-meni yisilwa hana muna luzolu lwama. Yenina yi hamu dya kuhanalwa yi kuvutwakilalwa hika. Kyakina kizila yiÌtambula kwena Tata.» 19 Ngyengu yaÌkota hika hana kati dya Bayuta kikuma kya ndinga meni zina. 20 Balawu hana kati dya bawu bakala zimbula: «Kitembu kya mbi kenina kyawu! Kilawu kenina! Biki lubati muyukila?» 21 Bahika bakala zimbula: «Ndaka zina zeku za kitembu kya mbi. Mutu wenina yi kitembu kyambi fwani kutemuna mesu ma phofu?» 22 Muna tangwa meni dina dya kyosi, mwamuna bakala ta mukinzi wa kusambula nzu ya Nzambi kuna Yelusalemi. 23 Yesu kakala kangala hana kyanzala kya nzu ya Nzambi, muna mbalanda yina bakala tela ni ya Solumoni. 24 Bayuta baÌmuzyeta, beka muzimbwala: «Yi kuna khi tangwa watusisa mu tsumbi? Yuka ni ngeyi wenina Kidisitu, tuzimbwala phwelele.» 25 Yesu wubavutwadini: «YiÌluzimbwadikibwa kedi, kaasi lukhwikidikiku. Mihangu myama mina yisi hanga mu khumbu ya Tata wama, myamina myisi thila kimbangi. 26 Kaasi yuka ni lubatiku khwikila, kikuma kya buna lweku mu kibuka kya mikoku myama. 27 Mikoku myama myisi yuka ndinga yama; meni nzayimya, amana myawu phi myisi ndanda. 28 Yisimya heka luzingu lwa mvula yi mvula, myatoÌtaku keti bweti amana heku mutu wakwisamya botula ha moku ma meni. 29 Bina kaÌpheka Tata bilutini byosu, amana heku mutu fwani kabotula kima ha moku ma Tata. 30 Tata yi meni thwenina kima kimosi.» 31 Bayuta baÌtonguna hika matadi ndangu bamuta. 32 Yesu wubazimbwadini: «Mihangu mya bukheti mya lawu yiÌlusongila, mina myaÌtuka kwena Tata. Kikuma kya khi muhangu, mukati kya myawu, lubati nzukwamina matadi?» 33 Bayuta bamuvutwadini: «Heku ni kikuma kya muhangu wabukheti twakuÌzukwaminina matadi, kaasi kikuma kya malewu maku kwena Nzambi: ngeyi mutu wenina, amana wubati dikitula Nzambi!» 34 Yesu wubavutwadini: «Muna mitsiku myenu, baÌsonikaku bwabu: “Meni yiÌzimbula: benu, banzambi lwenina ." 35 Bwabuna masonuku maÌbatedila banzambi, kwena batu babana baÌhitikaya ndinga ya Nzambi, amana masonuku malendaku mu kuzima. 36 Amana benu lwazimbulaka kwena wuna kaÌsola Tata, kaÌtuma phi ha tsi ni Nzambi wubati lewula? Kikuma kya buna nzimbudini ni Mwana wa Nzambi yenina? 37 Yuka ni yisiku sala mihangu mya Tata wama, lukhwikilaku. 38 Kaasi yuka ni mbatimya hanga ata lukhwikidiku meni, kwikilenu ata mu mihangu myamina; zayenu amana bakisenubwoku ni bwosu buna kenina Tata mwena meni, bwabuna yenina meni phi mwena Tata.» 39 BaÌsanda hika ni bamukwata, kaasi yandi waÌbatina. 40 Yesu waÌvutuka ku sambwa dikwawu dya Yolutani, hana sabu dina kaÌkala botikila theti Yowani, amana waÌnangina kwakuna. 41 Batu lawu bisa kwena yandi, beka zimbula: «Yowani kaÌsalaku keti kidimbu kya kiphadi kimosi, kaasi moosu mana kaÌzimbula Yowani kikuma kya mutu yandu menina ma kyedika.» 42 Amana hahana, batu balawu baÌkwikila mwena yandi.