YOWANI 14

1 Yesu wuzimbudi hika kwena balonguki bandi: «Mbundu yenu yivwalanganaku. Kwikilenu mwena Nzambi, khwikilenu phi mwena meni. 2 Muna nzu ya Tata wama, bizika byalawu byeninamwa; wadi lo, khanibwoku luzimbwala ni yendi luyidikila kizika kimosi. 3 Amana yuka ni yendi luyidikila kizika, yikwisa vutwakisa mu kulubonga, lwakala ha kabeta ka meni, ndangu hana yikaÌla meni, benu phi lwakala hakana. 4 Amana luzayi nzila ya kuma kuna mbati kwenda meni.» 5 Tomasi wumuzimbwadini: «Pfumu, tuzayiku keti kubiki wubati kwenda. Abweti twalenda zayilaya nzila?» 6 Yesu wumuzimbwadini: «Meni yenina nzila, kyedika yi luzingu. Ka mutu ku wakwiÌsa kwena Tata konda kuhitila kwena meni. 7 Honi lwanzaya meni, lwamuÌzaya phi Tata wama. Tuka lelu lumuzayini amana lumumoni kedi.» 8 Fidiphu wumuzimbwadini: «Pfumu, tusongila Tata, amana bwabuna butufwani.» 9 Yesu wumuvutwadini: «Thama-thama yina yisi kala yi benu, abweti Fidiphu ngeyi, wisiku nzayila? Wuna wumboni meni, wumoni phi Tata. Abweti ngeyi wufwani kuzimbula: “Tusongila Tata”? 10 Wubatiku kwikila ni meni yenina mwena Tata, amana Tata kenina mwena meni? Ndinga zina yisi luzimbwala, zisiku tuka kwena meni-meni, kaasi Tata yandi wisi zingila mwena meni, yandi phi wisi lungisa mihangu myandi. 11 Khwikilenu tangwa yisi luzimbwala ni meni yenina mwena Tata, amana Tata kenina mwena meni. Kondilo kwikilenu ata kikuma kya myawu meni mihangu. 12 Mu kyedika yibatibwa luzimbwala: wuna wakwiÌkila mwena meni, yandi phi kahaÌnga mihangu mina mbati hanga meni. KahaÌngamya hika mya lawu kuluta mina mbati hanga meni. Kikuma meni yendi kwena Tata. 13 Amana moosu mana lwaloÌmba mu khumbu ya meni, yisaÌlama, ndangu, muna nzila ya Mwana, bamukembisa Tata. 14 Yuka ni lwandomba kima mu khumbu yama, meni yisaÌlakya.» 15 «Yuka ni lwisi nzola, lwaluÌnda mitsiku myama. 16 Meni yiloÌmba kwena Tata ni kaluheka Muhombi wahika, ndangu kakalaka yi benu bilumbu byosu; 17 Kitembu kya kyedika wuna balendaku mu kutambula kwena batu ba tsi, kikuma bamumoniku, bamuzayiku phi. Kaasi benu, lumuzayini, kikuma kisi zingila hana kati dya benu amana kakaÌdiki mwena benu. 18 YiluÌsisaku batsona; yikwiÌsa hika kwena benu. 19 Ka thama ku, batu ba tsi bamboÌnaku hika, kaasi benu, lwamboÌna hika, kikuma meni mbati zinga, benu phi lwaziÌnga. 20 Muna kilumbu meni kina, lwabaÌkisa ni meni yenina mwena Tata wama bwosu lwenina benu mwena meni amana meni mwena benu. 21 «Wuna wenina yi mitsiku myama, wisimya lunda phi, yandi wuna wisi nzola. Kinga wuna wisi nzola meni, Tata wama phi kamuÌzola; meni phi yimuÌzola amana yidiÌmonikisa kwena yandi.» 22 Yutasi, heku ni Yutasi sikadyoti, wumuhyudini: «Pfumu, abweti ni wadimonikisa lwesi kwena betu, kaasi kwena batu ba tsi loni?» 23 Yesu wumuvutwadini: «Yuka ni mutu wisi nzola, kaluÌnda ndinga yama. Tata wama phi kamuÌzola, amana twakwiÌsa kwena yandi, twaziÌngila mwena yandi. 24 Wuna kanzodiku, kisiku lunda phi ndinga zama. Amana ndinga yina lubati yuka yeku ya meni, kaasi ya Tata wuna waÌthuma. 25 Yiluzimbwadini bwabuna bwosu yenina yenu hika. 26 Kaasi Kitembu Kyatoma, Muhombi wuna katuÌma Tata mu khumbu ya meni, yandi waluÌlonga moosu, amana kaluÌyubulula mambu moosu mana yiluzimbwadikini.» 27 «Yilusisidini ngemba; yiluhekini ngemba yama. Meni yiluhekiku mu phila ya batu ba tsi. Luvumukaku mbundu, lubangaku phi. 28 LwaÌyuka mana yiÌluzimbwala: “Yendini amana yikwiÌsa kwena benu”. Wadi lwanzolaka, wadi lukasangwala mu kuyuka ni yendini kwena Tata, mukuma Tata kenina wambuta kuluta meni. 29 Buthwena, yiluzimbwadini mambu mana buna khaku kedi malungila; ndangu ha makwisa lungila, lwakwikila. 30 YizoÌnzaku hika lawu yi benu, mukuma pfumu wa tsi yayi, wekina kwisa. Keku keti kima kimosi mwena meni; 31 kaasi ndangu batu ba tsi bazaya ni yisi muzola Tata amana yisi hanga mana kaÌtsenda Tata. Telamenu, tukatukenu homa haka!»