MIHANGU 7

1 Mbuta wa banganga Nzambi wuzimbudi: «Buna babati zimbula kikuma kya ngeyi, bwa kyedika bwenina?» 2 Kitsyeni waÌvutula: «Baphangi bama yi batata bama hinikinenu! Nzambi wa khembu kaÌdimonikisa kwena Bulahami, tata wetu, tangwa kaÌkala ku Mezophotamiya, hana khaku kenda zakala ku Halani, 3 amana kaÌmuzimbwala: “Katuka ku tsi yaku yi kikanda kyaku, awenda ku tsi yina yikuÌsongila." 4 Hanga wulubuki mu tsi ya bisi Kaditeni, wendi kala ku Halani. Kwakuna, kunima lufwa lwa tata wandi, Nzambi wamuhitisa mu tsi yayi lwisi kala buthwena. 5 KaÌmuhekaku keti kuvwa kumosi muna tsi meni yina, keti mafu ma kuthetika bitambi; kaasi kaÌsila ni kamuÌhekama mafu yi kwena batekulu bandi kinga, muna tangwa meni dina, kaÌkalaku kedi yi mwana. 6 Nzambi kaÌzonza bwabu: “Kanda dyandi dyakaÌdila mu kinzenza mu tsi ya kinzenza, bakwaÌtadya mu kihika amana banyoÌkunadya mu mvula khama ya. 7 Kaasi muna tsi yina yabaÌkwata mu kihika, meni yifuÌndisaya, ku manima ma bwabuna, baluÌbuka amana bakwata tsambila ha kati dya homa haha." 8 Kunima Nzambi waÌta bulunda yi Bulahami, amana mukhanda wenina kidimbu kya kuyukana; yihana kabutila Yizaki amana waÌmuyotisa mukhanda mu kilumbu kya nana; bwabuna kaÌhanga Yizaki kwena Yakobi, amana Yakobi phi kwena bana bandi kumi yi bodi, bakhaka ba bikanda byetu. 9 Bakhaka betu, bana ba Yakobi, baÌmuyukila kiphala phangi wa bawu Yozefu amana baÌmutekisa ndangu bamunata ku Ngiphiti. Kaasi Nzambi kaÌkala kumosi yi yandi; 10 amana waÌmutabula mu biwayi byandi kyosu, waÌmuheka phi khenda yi mudimu ku thwala Fwalawo kyamvu wa Ngiphiti, wuna waÌmuyadika pfumu mu Ngiphiti yi muna nzu yandi yosu . 11 Hanga nzala yifwebuki lawu mu Ngiphiti yosu yi muna tsi ya Kanana. Kiwayi lawu kyaÌkala, amana bakhaka betu bakalaku mona keti kima kya kudya. 12 Yakobi, buna kayuka ni ngenza za bule zaÌkala mu Ngiphiti, waÌtuma bakhaka betu mu mbala ya theti. 13 Amana mu mbala ya zodi , Yozefu waÌdizayikisa kwena baphangi bandi, kisina kya Yozefu phi kyaÌzayakana kwena Fwalawo. 14 Kunima Yozefu waÌtuma benda musanda tata wandi Yakobi yi kikanda kyandi kyosu; batu makumi tsambwadi yi tanu baÌkala. 15 Yakobi waÌkulumuka ku Ngiphiti. Yi kwakuna kaÌfwila yandi yi bakhaka betu. 16 BaÌbanata ku Sikemi amana baÌbazika muna mazyamu mana kaÌsumba Bulahami yi mbongu kwena bana ba Amoni kuna Sikemi . 17 «Bwosu dyakala bwesuka tangwa dya lusilu luna kaÌsila Nzambi kwena Bulahami, kanda dyaÌvula lawu mu Ngiphiti, 18 yi kuna tangwa dina kisa yadila kyamvu wahika, mu Ngiphiti, wuna wakonda muzaya Yozefu. 19 Kyamvu meni wuna kakala huna kanda dyetu mu mayedi mambi, waÌbanyokuna bakhaka betu, waÌbadindamisa mu kulosa bana ba bawu ba lubutu ndangu bazingaku. 20 Muna tangwa meni dina yi mwamuna kaÌbutuka Moyize, wuna waÌkala kitoku ku mesu ma Nzambi. KaÌtsatsuka ngonda tatu muna nzu ya tata wandi. 21 Buna baÌmuyanika, mwana ndumba wa Fwalawo waÌmutonguna, amana waÌmutsasa phi hanga mwana wandi. 22 Moyize katsasukila muna mudimu wosu za bisi Ngiphiti. KaÌkala yi hamu dya kuzonza yi muna mihangu myandi. 23 Buna kalungisa mvula makumaya, waÌbonga lukanu lwa kwenda kinda biwutu byandi, bisi kiseledi. 24 Buna kaÌmona mutu mosi bakala yangisa, Moyize waÌmunwanina amana waÌvutula mbela ya mutu wuna baÌnwanisa; waÌmuhondyanga mwisi Ngiphiti. 25 Kabanza ni biwutu byandi babaÌkula ni Nzambi wuzodi kabaheka luhulusu mu nzila ya yandi; kaasi baÌbakulabwoku. 26 Kilumbu kyalanda, waÌdimonikisa kwena bana baÌkala nwana, wuzodi ni kavutula ngemba ha kati kya bawu mu kuzimbula: “Lwenina baphangi, biki lubati nwanina benu yi benu?" 27 Kaasi wuna wakala yangisa mukwawu, hanga wumununguni Moyize amana wuzimbudi: “Nati wukusi pfumu yi zusi kwena betu? 28 Wuzodi waphonda bwosu wuhondiki mukolu mwisi Ngiphiti?" 29 Buna kaÌyuka bwabuna, Moyize watina, wenda mu kinzenza muna tsi ya Madyani. Kwakuna, wabuta bana ba bayakala bodi. 30 «Buna zalunga mvula makumaya, wanzyo mosi waÌmumonikina, muna nganga yina ya mongu wa Sinayi, muna muleku wa mbawu hana kivunza. 31 Mu kumona bwabuna, Moyize waÌyituka kikuma kya mbona mesu yina. Amana bwosu kakala bwesuka mu kutala, ndinga ya Pfumu yaÌyukalakana: 32 “Meni yenina Nzambi wa bakhaka baku, Bulahami, Yizaki yi Yakobi”. Moyize kuna yi tsula, kaÌlendaku mu kutala. 33 Pfumu wumuzimbwadi: “Womuna tsabatu zaku, mukuma homa haka wutelamiki, mena mafu matoma. 34 Mboni phasi za kanda dyama dyenina mu Ngiphiti, ngyuki bibimu bya bawu, khulumukini ndangu yibahulula. Buthwena awisa, yikuÌtuma ku Ngiphiti." 35 «Moyize yandu baÌsuwangana, mu kuzimbula: “Nati wukuyadikini pfumu yi zusi?”, yandi wuna kaÌtuma Nzambi hanga pfumu yi muhuludi , mu lusadisu lwa wanzyo wuna waÌmulubwakila ha kivunza kya mbawu. 36 Yandi waÌbalubula, waÌsala phi biphadi yi bidimbu bya phila yi phila mu tsi ya Ngiphiti, ku yanga dya Kabengi yi mu nganga, mu mvula makumaya. 37 Moyize meni wuna waÌzimbula kwena bisi Kiseledi: “Nzambi kaluÌhitika hana kati dya baphangi benu, mbikudi mosi hanga meni. 38 Mu lukutakanu, yandi waÌkala hakimosi yi wanzyo wuna wakala muzonzila ha mongu wa Sinayi yi bakhaka betu; kaÌtambula ndinga za luzingu ndangu katuhekaza. 39 Bakhaka betu baÌbwisa kumulemvukila; kaasi baÌmusuwangana, yi sunga dya kuvutuka ku Ngiphiti. 40 Bazimbudi kwena Loni: “Tuyidikila banzambi bana bakala kwenda ku thwala betu, mukuma Moyize meni wawuna waÌtulubula mu tsi ya Ngiphiti, tuzayiku mana mamubwidi." 41 Muna bilumbu meni bina, baÌhala nzambi wa kiteki kya mwana wa ngombi, baÌmunatina phi mukhayilu wumosi amana baÌta mukinzi yi kihangwa kya moku ma bawu. 42 Kaasi Nzambi waÌbafwila kunda, waÌbayambula ni bafukamina bihangwa bya ku zilu, bwosu baÌsonika mu mikanda mya bambikudi: “Kanda dya Kiseledi, kwena meni lwaÌtambika bibulu yi makabu mahika mu mvula makumaya muna nganga? 43 Loni, kaasi sombolu dya nzambi wenu wa kiteki Moloki lwaÌzangula yi katumbwa ka nzambi wenu wa kiteki Lefwani , bifwanisu meni bina lwaÌhala mu kubafukamina. Ihana ni yisenda ni balunata kyana kuluta mbanza ya Babiloni."» 44 «Muna nganga, bakhaka betu, baÌkala yi sombolu dya kimbangi, hanga dina kaÌsongila Nzambi wuna waÌzonza kwena Moyize ni kayidika, bwosu kifwanisu kina kaÌmona. 45 Sombolu meni dina baÌhanadya kwena bakhaka betu bana baÌlanda ku manima yi Yosuwe baÌkotisadya muna tsi ya makanda mana kaÌkukwasa Nzambi ku thwala ya bawu. DyaÌsala hana tii yi kuna tangwa dya Tavidi. 46 Tavidi waÌmona khenda za Nzambi amana waÌlomba homa hamosi ndangu katungila nzu kikuma kya Nzambi wa Yakobi. 47 Kaasi Salomoni waÌmutungisila nzu. 48 Kaasi Kahungu kisiku zingila mu nzu zina baÌtunga mu moku ma batu. Bwosu kazonza mbikudi: 49 “Zilu dyenina kiti kya luyalu lwama, amana mafu menina kidyatilu kya bitambi byama. Khi nzu lwathuÌngila, kaÌzimbula Pfumu, holo khi homa pfwani yileÌmbwila? 50 Ka koku dyama ku dyaÌhanga mana moosu?" 51 «Benu batu ba mutwa ngolu yi mbundu za matadi yi bizika matu, lwisi bwisa kaka Kitembu Kyatoma! Lwenina hanga bakhaka benu. 52 Khi mbikudi baÌkonda nyokuna bakhaka benu? BaÌhonda bana batekila samuna kukwisa kwa mutu wa masonga; wuna lwalambudi, buthwena, benu amana lumuhondi. 53 Benu lwaÌtambula mitsiku mina baÌluheka banzyo kaasi, lwaÌzitisamyoku!» 54 Buna bayuka mambu mana, bafunga khabu yi kukwekisaka menu kikuma kya Kitsyeni. 55 Kaasi yandi, wabasa yi Kitembu kyatoma, buna katala ku zilu, waÌmona khembu ya Nzambi; amana Yesu watelama kuna koku dya kitata dya Nzambi. 56 Wuzimbudi: «Mbati mona zilu dya kukangula yi Mwana wa mutu watelema kuna koku dya kitata dya Nzambi.» 57 Hanga bakalungi ngolu, baziki matu ma bawu, boosu bamubwidi; 58 baÌmubulumuna ku phenza ya mbanza amana baÌyandika kumuta matadi. Bambangi baÌsisa miledi mya bawu kwena ngunza mosi, bakala tela Sawulu ndangu kasimbululakamya. 59 Kuna yi kumutimbwalaka matadi, Kitsyeni kakala lombila mu kuzimbula: «Pfumu Yesu, yamba moya wama!» 60 Kunima waÌbwa muna makungulu amana waÌkalunga: «Pfumu, wubafutisaku disumu dyadi!» Buna kaÌzimbula bwabuna, waÌtabula.