Mukanda wa zodi kwena Thimoti 2THIMOTI 4

1 Yikusikidikisi ku thwala ya Nzambi yi ku thwala ya Kidisitu Yesu, wuna wabaÌfundisa batu ba moyu yi bamvumbi, yikulombibwa muna zina dya kudimonikisa kwa Kidisitu yi Kipfumu kyandi: 2 samuna Ndinga ya Nzambi, ata muna tangwa dya bukheti keti dya kakalakanu; bakwikisa, bakaya ho loni baheka kikesa, wabalongaka yi sipha dya mbundu dyosu. 3 Mukuma, tangwa dibati kwisa batu bazoÌlaku kuyuka malongi ma kyedika, kaasi balaÌnda tsambu za lutu lwa bawu amana badiÌhana kwena balongi ba lawu babaÌsamwana mana bisi zola kuyuka. 4 BaphaÌta matu ma bawu ndangu bayukaku kyedika, bahuÌkumuka ku bingana-ngana. 5 Kaasi ngeyi, dikenga mu mambu moosu, tambwasa munyanga, mwangisa Musamu wa Bukheti, lungisa buna bufwanini kisalu kyaku. 6 Kwena meni, beka zola ni bandambula kimenga amana tangwa dyama dya kusisa tsi dilungi. 7 Ndwaniki muzingu wa bukheti, thudini ku tsuka ya thinu, tsimbididilwa lukwikilu. 8 Amana buthwena, mukhonzi wa masonga baÌtswekilawa: Pfumu, zusi wa masonga, kapheÌkawa kilumbu meni kyakina, amana ka kwena meni ku lwesi, kaasi yi kwena babana boosu bisi zola kudimonikisa kwandi. 9 Sya ngolu wisa ngwana tswatsu. 10 Kikuma Temasi waÌthina, mudyambu dya lungongu lwa mambu ma buthwena ma tsi yayi; wendi ku Tesalonika; Khelesasi kakweÌnda ku Ngalatiya, amana Titi kakweÌnda ku Talamati . 11 Luka lwesi yenina yandi. Munata Malaku amana wisa yandi, mukuma mupfunu wa lawu yenina yandi kikuma kya kisalu. 12 Yimutumikini Tisiki ku Efesu. 13 Ha wakwiÌsa, wandatina kazaka kana tsitsiki ku Tholowasi kwena Kadiphusu; amana wandatina phi mikanda, theti-theti mikanda mina baÌyidikila yi mikanda mya bambisi. 14 Lekizandi wuna wenina mbembu, mbi ya lawu kaÌphanga; Pfumu kamuvutwala bwosu bwenina mihangu myandi . 15 Dikenga kwena yandi, ngeyi phi, mukuma kaÌzolazoku keti koma ndinga zetu. 16 Tangwa yiÌsamba mbala ya theti ha baÌpfunda, yiÌmonaku mutu waÌtsadisa: batu boosu baÌndosila. Yambula Nzambi kabatangilamoku! 17 Kaasi Pfumu waÌngyakidila amana waÌpheka ngolu zilutini, ndangu, muna nzila ya meni, Musamu wa Buketi basamunawa buna bufwani amana baba bakondi kala Bayuta boosu bayukawa. Amana waÌphulula ku munwa wa thambu. 18 Pfumu kaphuÌlula hika ku kosu kisalu kya mbi amana kakhoÌtisa konda kifu muna Kipfumu kyandi kya mazilu. Khembu yakala kwena yandi mvula yi mvula! Abwabuna! 19 Muheka mboti Phisikila yi Akilasi, yi nzu ya Onezifodi. 20 Elasiti wusadiki ku Khoditu, amana yimusisikini Thofimi wabela kuna Mile. 21 Sya ngolu wisa buna khaniku kedi disa tangwa dya kyosi kya ngolu. Ebulusu, Phundesi, Dinusi, Koloti yi baphangi boosu mboti bakuhekini. 22 Pfumu kakala yi kitembu kya ngeyi. Khenda za Nzambi zakala yi benu!