Luka 20

1 Suku moja, Insa paakiwafunda wanu na paakereza Habari Ngema nNyumba Takatifu, wakilawirira nomo wakulungwa wa dini, wanlimu wa shariya, pamoja na walongozi, 2 wakimwambira, wakamba: “Tambire, uwe evi vinuâvi kwankutenda na mamulaka a nani? Eya mamulakaâya akupere nani?" 3 Insa akiwajibu, akamba: “Sambi, nomi novyo nukudairini kinu. Nambireni: 4 Yahaya paakiwoza wanu, akitenda javyo kwa mamulaka a Mwenyezimungu au a wanadamu?" 5 Ewo wakingira kukaidiyana, wakamba: “Tikinjibu kuwa ‘a Mwenyezimungu’, iye atidairi: ‘Umwe kutowa kunkubali Yahaya sababuni?’ 6 Fala, tikamba kuwa ‘a wanadamu’, wanu piya watipanja na mawe, konta wakikubali kuwa Yahaya nabii wakweli." 7 Basi, mwinshoni wakinjibu javi: “Atijiwa." 8 Insa akijibu: “Basi, nomi novyo sukwambirani mwanyewe mamulaka anitendesa evi vinuâvi." 9 Sambi, Insa akanza kuwasowerera wanu eci kinyumeâci javi: “Mwananlume mmoja kavyala muti wake wakupa uva, akitula rani na warimi wamojawapo, ikisa akisafiri suku nyingi zawenye. 10 Paufikire wakati wa kutokota uva, iye kantuma ntumisi ka warimi kure ipate wakampe fungu ra mwenye wake ire. Fala warimi ware wakimwibiya, wakinludisa makono-waka. 11 Ikisa, mwanyewe masamba ire akintuma ntumisi mwengine, neye novyo wakimwibiya, wakimwanziri, wakinludisa makono-waka. 12 Mwanyewe masamba ire akintuma ntumisi watatu, fala warimi ware neyo novyo wakinlumiza, wakintuwisa. 13 Basi, mwanyewe masamba ire akisowera kimoyomoyo akamba: ‘Sambi, nisaka kutendaja? Hã, nijiwa! Nimpereka mwanangu wanimpenda pakulu. Dalili wakuka kumwinshimu!’ 14 Fala warimi ware pawammonire mwana ire, wakisowera watupu-watupu: ‘Epa kankuja mwenyé haki yakuriti masambaâya! Tukeni timulaye, iratiâyo iwe yetu ofwe!’ 15 Basi, wakinlavira panja ya masamba are, wakimulaya.” Ikisa Insa akiwadairi: “Mwenyé masamba ire warimi ware awatendaja? 16 Iye akuja, awapoteza warimiâwo, na masambaâyo awemisira wanu wengine.” Wanu ware pawasikire javire, wamba: “Visikune javyo! “ 17 Fala iye kawanang’aniza wanu ware rungu-rungu, ikisa kawadairi javi: “Sambi eya Mandikoâya javi: ‘Riwe rawakatare wajengi ndi rilawirire kuwa riwe maalumu’, mana ake kinani? “ 18 Insa akizidi kusowera: “Agwiríra onse eri riweâri akuwa kipande-kipande. Warisaka kungwirira eri riweâri, asaika-saikanga atenda ufu. “ 19 Wanlimu wa shariya na wakulungwa wa dini pawasikire kinyume cire, wakisaka wanfunge Insa kwa mpunde noure, konta wejiwa kuwa Insa kankuwasutumu ewoâpo , fala wakiwopa wanu ware. 20 Kwa javyo, wanlimu wa shariya na wakulungwa wa dini wakintunza Insa sana-sana. Ewo wawapereka wapererezi wamojawapo wakiritula kuwa wanu wakweli. Wakisakula wammonerere kamba iye asowera kinu cakunkoresa ipate wampereke ka guvinadoru, mwenyé uwezo na mamulaka. 21 Ndimana wakindairi, wakamba: “Mwanlimu, tukwijiwa kuwa piya vyausowera na vyaufunda vyakweli, wala aulamula kwa kunang’aniza munu caari, ila kwankufunda kamili njira ya Mwenyezimungu. 22 Sambi, tambire kinu kimoja: Ofwe tijuzi au atijuzi kunripa nsoko Kaisari ?" 23 Fala Insa nakwijiwa ujanja wawo ure, akiwambira: 24 “Nolotereni jarajara moja. Ewu usoâwu na eya mandikoâya vyanani?” Ewo wakijibu: “Vya Kaisari." 25 Iye akiwambira: “Basi, vinu vya Kaisari, mpeni Kaisari. Vinu vya Mwenyezimungu, mpeni Mwenyezimungu." 26 Kweli, awapatire mbere ya wanu kunkoresa Insa na majibu ake. Kwasa javyo, washanga na majibu ake are, wakinyamala vii. 27 Ikisa, wakinfika karibu Masaduseu wamojawapo, ware wakatála kuwa kuwapo kufufuka ka wafwi. 28 Ewo wakindairi Insa javi: “Mwanlimu, Musa katandikira eya mandikoâya javi: ikiwa munu kafwa, kamwasa nkawake saapongore naye wana, nduye marehemu ajuzi amwingire manyumba nankweli ire, filihali apongola naye rilunga rikolo. 29 Sambi, wákiwapo wana saba wawa mmoja na mama mmoja. Ntanzi kalomba, kafwa saapongore naye mwana. 30 Nduye wapiri, 31 na watatu, neyo novyo wantwala muka ire, wanlomba awapongore naye mwana. Woâsaba ware piya wanlomba awapongore naye wana, wafwa. 32 Mwinshoni, mwanamuka ire neye novyo akifwa. 33 Basi, suku ya kufufuka, mwanamuka ire akuja kuwa muka wa nani? Kamana woâsaba ware wanlomba muka mmoja noire!" 34 Insa akiwajibu: “Duniyaâyi wanu walomba na walombiwa. 35 Fala waturiwe ubora kupata enzi zisaka kuja pawaja kufufuka ka wafwi, ewo awaja kulomba wala kulombiwa. 36 Kweli, awaja kufwa tena, konta wakuja kuwa kamba malaika. Ewo wana wa Mwenyezimungu kamana wafufuriwa ka wafwi. 37 Kuhusu mwaha wa kuwa wafwi wakuja kufufuriwa, anta na Musa wawenye kakikisha novyo paasowere kuhusu muti ukikorera. Iye kamwita Mola zina ra ‘Nlungu wa Iburahima, wa Izaki, na wa Yankubu.’ 38 Basi, iye siyo Nlungu wa wafwi, ila Nlungu wa wanu wari hai. Kwake iye, wanu piya wawa hai." 39 Ikisa wanlimu wengine wa shariya wakimwambira Insa: “Mwanlimu, kusowera sana!" 40 Bandi ya evi, awerepo munu wakurimba moyo kundairi Insa kinu. 41 Ikisa Insa akiwadairi: “Wanu wakwamba mwaja kuwa Almasihi ujukulu wa Daudi? 42 Kamana Daudi mwanyewe ndi ambire nkitabu ca Zaburi : ‘Mola kamwambira Mwenye wangu : Ikala nkono nriro wangu 43 mpaka niwature maaduwi wako wawe sini kamba gogo rakwirika maulu ako.’ 44 Ona, ikiwa Daudi Almasihi kamwita ‘Mwenye’, namunani vyaawa upande wa ujukulu wake? “ 45 Wanu piya pawakinsikiriza, Insa akisowera na wanafunzi wake, akiwambira javi: 46 “More-more na wanlimu wa shariya! Kuwajibu kupita wakenenda wavarire sana-sana na kukomaziwa kwa inshima mmaluwanja. Watondola kwikala mahala mwa swifa nsinagoga na mmajambo. 47 Fala wawewiranga manankweli vinu vyawo, na watendanga siyasa yakulebela duwa zakurepa. Basi, ewo wakuja kuhukumiwa pakulu futi!"