ZABURU 26

1 Zaburuna Daud. E KAWASANA OPU, ewaakaaku roonamo kudhadhi i nuncana kakatena totona incaku. Iaku kuparacaea i KAWASANA OPU tee inda kusindoli. 2 Parakisaaku, e KAWASANA OPU, tee ucobaaku, ujimea o baatiniku tee ngangarandaku. 3 Satotuuna, kaasimu molagina dhaangia i aroaku, tee kudhadhi i nuncana kabanaramu. 4 Iaku inda kuuncura tee mia pande gau-gau, atawa kuposabhangka tee mia munaafiki. 5 Iaku kubanci poromusakaana mia mopewauna kadhaki, tee kumendeu kuuncura tee mia mokodosa. 6 Iaku kubhanui limaku to tandana inda kusala, kasiimpo kubulilingi tampana tunuana kurubanimu, e KAWASANA OPU, 7 to kulaguaka manga kabhanti kasukuru to Aulataʼala tee suara makaa, tee kupetulatulaaka bhari-bharia pewaumu inda momentela. 8 E KAWASANA OPU, iaku kumaasiakea o bhanua mbooresamu, tampana kamuliangimu amboore. 9 Bholi uala inyawaku mboomo uala inyawana manga mia mokodosa, tee bholi uala dhadhiku mboomo uala dhadhina pande pekamatena mia. 10 I nuncana limana dhaangia tee haejati madhaki, tee i lima kaanana atarima doina kasogo. 11 Maka iaku bhekudhadhi tee kakatena totona incaku. Pasalaamatiaku tee umaasiakaaku. 12 Sii-sii kuʼamanimo minaaka i bhari-bharia balaa, sumaimo iaku bhekupuji KAWASANA OPU i nuncana poromusakaana uumatina.