ZABURU 25

1 Zaburuna Daud. E KAWASANA OPU, i Ingkoomo kudoʼa! 2 E Aulataʼalaku, i Ingkoomo kuparacaea, maasangia inda kupotibhaaka kaea, tee bholi utaroakea manga musuku apotawaikiaku. 3 Bhari-bharia mia moharapuna i Ingkoo inda bheanamisi kaea, maka manga mia mohianatia inda tee sababuna bheanamisi kaea. 4 E KAWASANA OPU, paumbaakaaku manga dhalamu, adhariakaaku manga parintamu. 5 Bhawaaku kulingka i nuncana kabanaramu tee uadhariaku, roonamo Ingkoomo Aulataʼala mopasalaamatiaku, iaku kuantaantagiko saeoa. 6 E KAWASANA OPU, udhania rahumatimu tee kaasimu molagina roonamo bhari-bharia sumai adhaangiamo minaaka i zamani mangenge. 7 Dosa-dosa wakutuuna amangura dhadhiku, tee manga kasalaha ipewauku bholimo uudhania, tabeana udhaniaku apokana tee kaasimu molagina roonamo kalapena incamu, e KAWASANA OPU. 8 KAWASANA OPU sumai amalape tee amakate totona incana, sababuna Incia asusuaka dhala to manga mia mokodosa. 9 KAWASANA OPU akapalai mia inda mosombo i dhala mobanara, tee manga incia aadhariakea tee opea ipeeluna. 10 Bhari-bharia dhalana KAWASANA OPU abukeaka tee kaasi molagina tee amembali atoparacaea to mia mopengkenina i pojanjiana tee manga kaudhaniana. 11 E KAWASANA OPU, roonamo saromu amponia o kasalahaku moomini amaoge o kasalahaku sumai. 12 Incema mia momaekana i KAWASANA OPU? KAWASANA OPU bheasusuakea dhala to idhalikina. 13 Manga incia bheasadhaadhaa adhadhi amasanaa, tee manga siwuluna mokotinaurakaakana alamu. 14 KAWASANA OPU aposabhangka tee manga mia momaekaia, tee asusuaka o antona pojanjiana to manga incia. 15 Mataku sadhaadhaa atonto KAWASANA OPU, roonamo Incia bheapasalaamatiaku minaaka i balaa. 16 Tontoaku, tee umaasiakaaku, roonamo kumalino tee kutopisaki. 17 Pekalalesaia o ngangarandaku sii minaaka i kasukara, rambasakaaku minaaka i kanarakaaku. 18 Tilikia kanarakaaku tee kasukaraku, tee amponia bhari-bharia dhosaku. 19 Kamatea, tapanamo kabhari o musuku, tee manga incia abanciaku mpuu. 20 Jagania inyawaku tee pasalaamatiaku, bholi utaroakaaku kupotibhaaka kaea roonamo Ingkoo peulusaku. 21 Maasangia o kakatena totona incamu tee kajujurumu ajaganiaku, sababuna kuharapu i Ingkoo. 22 E Aulataʼala, tolosia manga miana Israel minaaka i bhari-bharia kasukarana!