Mark 10

1 Yesu Capernaum i voterei ma i nae au Judiya ma Waira Jordan i damani da au tupo gheha au maramatanei. Patara maghamaghauhi hi nememei ma tauna ivi haraharamana, me marana ghaeghaena i kaukauweiya nanaêarena. 2 Pharisee ghehauhihi hi ghohei da tauna hita rau-dadani ma yamna aubaina hivi taravirevirei, “Raugagayo e maêamaêae bo eêegha da rava awana inavi aihabei?" 3 Yesu i pari-beyehi, “Moses ana Raugagayo aiwaêi i riwei?" 4 Tauhi hi riwei, “Moses ana raugagayo i riwa da oroto viaihaba pepana ina girumi da awana ina verei ma muriyai hinavi aihabei." 5 Yesu tauhi i pari-beyehi, ipa “Moses raugagayona i terei aubaina taumi horami hi pota. 6 Wate ona notai da au karena maranaina God rava i kauwehi, ‘Tauna i kauwehi da oroto ma wavine. 7 Ma yamna aubaina, oroto amana ma ayona inavo terehi ma awana maiteni hinavi tagogi 8 ma wavine maiteni hina maêae,’ da tauhi tupuwa tagogi, egha ruwagha me au naona. 9 God ivi tagogiyeta, egha ayaêi inavi yamonei." 10 Muriyai hi wanavira meyehi au numa ma weêi kauwana aubaina, Yesu ana tauvotaghotagho Yesu hi rau-bayadei. 11 Yesu i pari-beyei ipa, “Mepa da oroto awana ivi aihabei ma wavine ghehauna i ravaghi, yamna awana wadubona ivi gobuêani." 12 Ma mepa da nanaêarena wavine awana ivi aihabei ma oroto ghehauna i ravaghi, yamna awana wadubona ivi gobuêani. 13 Rava ghehauhi rowarowa hi neiyai da Yesu itavi ahiahinihi ma ana Tauvotaghotagho ravahi hi pari-vivighaehi. 14 Maranaina Yesu wei kauwana i inanai, i rau-amoghaighai ma ana Tauvotaghotagho i riwehi, “Rowarowa ona voterehi da hina nei awariêu, egha onavi ghaehi aubaina God ana vibadana yamna rava aubaihi me we rowarowahi nanaêarehi. 15 A ririwana kauwemi, aiyaêi ravana God ana vibadana egha ina vaini, me tevera haburuna, tauna egha God ana au vibadana ina rui. 16 Ma rowarowa i taravainihi au naona, urana au koyahi i terehi ma i raupari ma ivi ahiahinihi." 17 Yesu ivo mahiri da i naenae, oroto i ruba awarina ma au naona i raudune ma i riwa ipa, “Tauviharaharamana vinuwavaivainana, aiwaêi ana kauwei da yawahana ahiêahina anavi buderiyei?" 18 Ma Yesu i pari-beyei ipa, “Aiwaêi aubaina, Taêu uvi kauwa vinuwavaivaineu? God tauna ava vinuwavaivainana. 19 Tam God ana raugagayo u haramanei: ‘Egha mavi hiraghena, egha awam mavi gobuani, egha ma danene, egha mavi wavu moru, egha moruwei ma danane, Amam ma Ayom mavi virehi.’" 20 Ivi heghana meyei ipa, “Tauviharaharamana, haburuêuwei da marina, weêi raugagayohi a votaghotaghopahi." 21 Yesu tauna i inanai ma ivi nuwavainei ma i riwei, “Kauwa tagogi ava egha uta kaukauwei. Ma nae me da am mahura anataputapuna ma gimarehi ma manena, rava viyamoyamonahi ma verehi, God, tam, au mara inavi maihem. Ma ma nememeêi da ma votaghotaghou." 22 Ma maranaina oroto weêi i nonori, i nao hariri ma ana nuwaboyana i nae, aubaina tauna rava mahumahurana. 23 Yesu i inana viravira ma ana tauvotaghotagho i riwehi, “I piripiri guratana da rava mahumahurana we au dobuna, God ana au vibadana ina rui." 24 Tauvotaghotagho, riwana hi buêuwei, maranai Yesu wenanaêarena i babani ma Yesu i riwana meyehi, “Natunatuêu, i piripiri guratana da mahura ravana God ana au vibadana ina rui. 25 Ma egha ita piripiri da ghamoghamo ghaeghaena wavana kamel, i ghoma au matana ina rui wate i piripiri da i piripiri kauwa da mahura ravana, ana yawahana God ina verei ma God tauna inavi badei." 26 Tauvotaghotagho ahi nota i hamoêa ma tauhi ava inavi tarapiri ipa, “mepa da nanaêarena apo aiyaêi yawahana maemaenonowana ina vaini?" 27 Yesu inanahi ma i riwa, “Rava auwarihi wei kauwana i piripiri, Ma God awarina eêegha; God awarina aiwaêi anatapuna yamna anina ava." 28 Peter, tauna i riwei, “Ma inanai, tauêai menanaêarena? Aêi purapura a voterehi ma tam avotaghotaghom." 29 Yesu i pari-beyei, “A ririwana kauwemi, aiyaêi da ana numa, varevarehina, novunovuna, ayona, amana, natunatuna, ana debagau inavo terehi, taêu ma riwa ahiêahina aubaina, 30 tauna ana maiha ina raêata vavahagha maraina tauna weka emaêamaêae. Tauna ana numa, varevarehina, novunovuna, ayoyona, natunatuna, ana debagau, anatapuhi hina magha. Rava maiteni hina rau-iviêapoapoeyehi; ma mara au murina yawahana maemae vavahaghana ina vaini. 31 Wate maghamaghauhi hevi vinao, hinavi muri ma hevivi muri hinavi nao." 32 Yesu ma ana tauvotaghotagho etenaêiyei hi ghaeghae au Jerusalem ma Yesu etanai i raveraveni ana tauvotaghotagho hivi nuwanaina aiwai aubaina da tauna eta i rave raveni, patara ghehauhi hivivi muri tagho maitehi hi rovo kauwa. Tauna, Aposel 12 i taravainariyehi ma aiwaêi kauwana ina tuputupuwa awarina, dededena ivi kareni. 33 Ma tauna tauhi i riwehi, “Ona haramanei da tauta ta ghaeghae au Jerusalem, yamna Rava Natuna ina am verenei, pirisi ghaeghaehi ma raugagayo tauvi haraharamanahi auwarihi ma tauhi tauna ana hiraghe hinavi aninei ma eteni ravahi a warihi hina am verenei. 34 Tauhi hinavi diboghi, hina hovai, hina kwapui ma hinavi hiragheni ma mara au vitonuina inavo mahirime." 35 James ma John, Zebedi natunatuna, hi nei Yesu awarina ma hivi baghai, “Tauviharaharamana, a ghoheghohei da aiwaêi anavi vibaghaiya ma kauwei." 36 Ma i riwehi, “Aiwaêi o ghoheghohei da aubaimi ana kauwei?" 37 Tauhi hi pari-beyana hipa, “Ma vianineêai da tauai tagogi au ahuohohim au mara, tam maitem ana tughura ma ghehauna au ahukehakehaum ina tughura am au boruma." 38 Yesu i riwehi, ipa, “Taumi egha ota haramaneêi aiwaêi ovivi baghei, Taumi hini viyara keyakana a umeêumeiya apo moina ona uêmeêi? Ma babataito a bababataitoweiya apo moina ona babataitowei?" 39 Tauhi hi pari-beyana hipa, “Tauai apo ana ghohai” Yesu i riwehi ipa, “Keyaka aêumeêuêmeiya ona uêmeêi ma babataito a bababataitoweiya ona babataitowei, 40 ma au ahuohohiêu ma au ahukehakehaêu tughurana, ghutana taêu egha atavivi badei ma wei gabuhi yamna tauna ivo kaukauwei tauhi ayaivoi da hivo kaukauwa aubaihi." 41 Maranaina Aposel 10, weêi dedena hi nonori, tauhi hi rau-amoghaighai James ma John auwarihi. 42 Yesu tauhi ivi tagogiyana meyehi ma i riwehi, “Taumi aêu rava ona haramanei da eteni ravahi ahi babada hivi riwapana kauwa, yamna aubaina da rava au gabaurihi he rau-iviêapoêapoeyehi. 43 Ma taumi awarimi apo egha nanaêarena. Aiyaêi ana ghohana da au poumi inavi bada, yamna inavi taunoya, 44 ma tauna aiyaêi i ghoheghohei da ina teregheêetana meyei yamna inavi taunoya, anatapumi aubaimi. 45 Tau Rava Natuna, egha ata nei da onavi taunoyei eêegha da tau ana vitaunoya ma au yawahana ana amverenei rava maghamaghauhi ahi yawahana gimara meyanana aubaina." 46 Tauhi hi nei au Jericho. Ma marainana, Yesu ma ana tauvotaghotagho ma patara ghehauhi maitehi Jericho hi hopuhopu tawanei, Mataêapoapoe Bartimaeus Timaeus natuna, etanai au ririvana i tughutughura ma ivivi gigimana. 47 Ma maranaina i nonori da Yesu Nasaretei i naenae, tauna i garara, “Yesu, David natuna, ma rau-nuwaêapoêapoyeêu." 48 Patara hi pari-ghahiyei da ita genuwana ma eêegha da tauna i garara guraguratana, “David natuna, ma rau-nuwaêapoêapoyeêu." 49 Yesu i tumahiri ma i riwehi, “Ona ghoreiyaêi” Anina ma mataêapoapoe hi ghorei, “Mavi nuwa ahiahi ma ma vomahiri Tauna e ghoreghorem." 50 Puru i tawananaiyei ma ivi hauhepa ma i nei Yesu awarina. 51 Yesu i rau-bayadei, “Aiwaêi ana ghohai aubaim?” Mata apoapoe ipa, “Tauviharaharamana, a ghohei da ana inana." 52 Ma Yesu i pari-beyei, “Ma nae, am vitumaghana, ivi yawahanim.” Ma maratagogi i inana ma ivo taghoi.