ACTS 5

WBT

‹ Chapter 4 ACTS — All Chapters Chapter 6 ›

1 Kaina�a daonaiora Ananias kia�o u�uu. Udaiaro uu Sapphira kia�o. Ĩaipan kapam pataan puraata mishidainao ati�o nii. Uruu idi ĩbuutan pa�amazadati, na�iki ĩselliinuz. 2 Mazan Ananias na�iki udaiaro bauda�apatan panyukunuu aonaa kizi ĩtaan ipai daunuuda�u wuru�u puraataz. Udauna�an Ananias makon naa apostlenao di�iti, utaan naa wuru�u puraataz ipai�o kawan mishi. 3 Sariapa Peter kian u�ati, “Ananias, kandii nii pukashaapan Satan kaiwaan pugaru? Satan aipan ati pubuutan puraata pu�idiwau nii, wuru di�iki�i puraata taa-kariwaiz pu�ati puamazadati winipinaa nii. Kandii nii putiwaan pumariidan Kaimana�o Doronaa? 4 Pusellian ua�ii wuru�u amazadaz, pu�idiwau wuru�u, na�iki pusellian dauna�anazu, pu�idiwau padamata wuru�u puraataz. Mazan kandii ni�i naa mooko wuru�u pusha�apatanuz aimaakan kaikapa�a naa manawunu�u? Aonaa waunao mani wuru�u pumariidaniaz, mazan putiwaan pumariidautan Tominkaru pa�an." 5 Ananias abatan idi Peter paradan na�apa, sariapa udorauta�akan, na�iki umawaka�akan naa. Aizii pidannao, tukapainao na�iki abatainao kida kuwai Ananias mawakan dau�u, tuukii, tuukii ĩtarian. 6 Sariapa daonaioranao wa�atin, na�iki ĩbazoobatan naa unanaa kamicha mada idi. Udauna�an ĩna�akan naazu na�iki ĩdida�ana�akan naa uruu. 7 Tomunu�iki zaa uruu dauna�an, Ananias daiaro kaawa�akan naa apostlenao ida�ati, aonaa oaitapan wuru�u paudaiaru mawakanuz. 8 Sariapa Peter kian o�ati, “Pukowaada õ�ati, patumaaka�o wuru�u di�oraz puraata�a? Kaikapauda�u�o wuru�u uamazadati kawinipinaata-kaoaz?” “Oo, na�apa�o wuru�u,” okian u�ati. 9 Uruu idi Peter kian o�ati, “Kandii nii pugaru na�iki pudaiaru tiwaa-kidapan Tominkaru Doronaa? U�itiiman aona�o nii Tominkaru aitapan? Puabata! Kaikin iki�i naa daonaioranao didankainao pudaiaru wa�atini�i. Aizii pugaru�o ni�i naa kapam ĩdida�an." 10 Sariapa odorauta�akan na�iki omawaka�akan naa kapam. Aizii daonaioranao kaawan padidanaka-kizi iki Ananias, ĩtukapan udaiaro mawaka�aka�a naa kapam. Uruu idi ĩna�akan naa onanaa na�iki ĩdidan naazo paudaiaru dazaba�a. 11 Uruu idi tuukii mishidainao, Jerusalem iainaouz tarian. Na�iki tuukii kapam ba�orainao pidannao kida tarian, ĩabatan idi wuru�u ĩmawakanuz na�apa. 12 Tominkaru ma�ozakan ida�an, apostlenao sha�apata umanawun kida�o aimaakan pidannao awun za�a, aona�oraz turuu pidan sha�apatan. Mapuda da�i mishidainao baokopainpauzon Solomon�s Porch di�ii, Tominkaru Dapu ia�oraz. 13 Mazan mamishida-kainao pidannao, tuukii ĩtarian pakaawan mishidainao ida�ati, mazan upu�u ĩnaudapan wuru�u ĩsha�apaapanii kidaz aimaakan, na�iki ipai ĩparadan kaiman ĩdau�an. 14 Mazan una�apan pu�u iriba daonaioranao na�iki zunnao mishidan naa Naobanai Jesus. Uruu idi baokopa�a naa ĩbaokopatinan kiwiini�o mishidainao tuma. 15 Apostlenao sha�apaapan idi umanawun kida�o aimaakan, sariapa pidannao na�akan karinainao pairibannao, na�iki ĩmuudan ĩdyaun dunapo daawa an, pada�awupa-kizi baara�a kida. Aizii Peter dobatan an na�an ĩdazaba an, ĩaipan udikin dobatan ĩpaawa an, ĩkakuda kizi. 16 Iriba pidannao kasaba�ukinan apostlenao ida�ati, wa�atiinaouz donoi sodi kida di�iki, wuru�u Jerusalem dazaba an kida�oraz wiizainao. Ĩna�akan karinainao, na�iki oia�o doronai zaamatapaniinao kida, na�iki ipai ĩrinaa kida so�ota-kao ĩ�ai. 17 Aizii Umanawunu�o Faadaa na�iki uminka�unao, wuru�u Sadduceenaouz, tuukii ĩkashauzin apostlenao ati. 18 Uruu idi ĩzaamatan ĩdyaun, na�iki ĩtaraa-kidan naa ĩdyaun. 19 Mazan uruu aiwaka�an, angel, Tominkaru di�iki�o da�atan taraa-kizai paniinomizinaa kida ĩ�ati, na�iki ukodita-kida�akan naa ĩdyaun. Ukian ĩ�ati, 20 “Umako Tominkaru Dapu iti, ukowaada kizi pidannao ati wuru dau�a�a pa�ina�oraz naa mashaapa-karu." 21 Apostlenao izo�ati Angel paradan. Ishawaka zii amazada, ĩnao mako�oka�a naa Tominkaru Dapu iti. Na�ia�a naa koshan ĩtominapatin-kidan pidannao. Aizii Umanawunu�o Faadaa baokopatinan naa paminka�unao tuma, na�iki ĩdapadan naa ipai kootowapa-kidauzonao pidannao miitiniapa-kizai iti. Udauna�an ĩdyuudan naa pidannao taraa-kizai iti, ĩnanaka kizi�i naa apostlenao pa�ida�ati. 22 Mazan dyuuda-kariwainao kaawan taraa-kizai iti, aonaa ĩikodan apostlenao na�ii, uruu idi ĩkiwa�akan naa powaa iti. Ĩkaawan, sariapa ĩkian kootowapa-kidauzonao pidannao ati, 23 “Wakaawan taraa-kizai iti waikoda ipai paniinom kida dadaradinapa pa�idiwaru, na�iki watchmantapainao taraa-kizai, ipai ĩkadishitapan paniinom kawana�ati kida. Mazan wamorotan taraa-kizai nazo iti, aonaa waikodan pidannao na�ii." 24 Faadaanao zowaunaanao, na�iki kazowautapa�o watchmantapainao Tominkaru Dapu abatan idi wuru�u ĩkowaaz, tuukii ĩdi�itinpan. 25 Upu�a�a naa pidan kaawa�akan, kakuwaapa�ana�o ĩ�ida�ati. Ukian ĩ�ati, “Uabata õkuwaa! Tawuru�u daonaioranao utaraa-kidaniinaouz, kaini�ia�a naa ĩdyaun Tominkaru Dapu ii, ĩtominapatin-kidan naa pidannao." 26 Sariapa watchmantapainnao zowaunaa makon paminka�unao tuma, ĩna�anan wuru�u apostlenaouz, ĩkootowapa-kida�azon ĩdyaun. Mazan kaiman ĩzaamatan ĩdyaun, usha�apanum kau�an tuukii ĩtarian wunao aia�a abatapainao kidaz ĩkowaa. Ĩzauda-kidan pazowii-kao paboo-kao ida�an kuba idi, apostlenao dikin ii. 27 Apostlenao kaawa-kida-kao dauna�an, ĩkadishita-kida-kaoa�a naa kootowapa-kidauzonao pidannao kanaapu ati. Na�iki Umanawunu�o Faadaa kian naa ĩ�ati kaikapa�a: 28 “Tuukii sha�atii wakakinaowan unao, wakii sha�atii ‘aona�a naa waaipan powa�a utominapa-kidan pidannao Jesus dau�u.’ Mazan upu�u zii utominapatin-kidan pidannao. Aizii ipai�i naa Jerusalem ii aka ukuwaa iribainan. Na�iki ipai ukowaadan pidannao ati, waunao wuru�u zowii-kida�oraz Jesus." 29 Sariapa Peter na�iki ba�oran apostlenao kian, kaikapa�a: “Waizo�atin nii soo Tominkaru paradan, mazan pidan paradan, aona�o nii waizo�atin. 30 Tominkaru, wadokozu-daunnao mishidauzoniaz, uruu kadishita-kidanii Jesus pamawaka-kizi iki, unao zowii-kidaniaz na�iki utauka-kidaniaz cross di�iti. 31 Mazan Tominkaru zaamatan na�iki umuudan uruu padiwa�ora antanapu, umanawunu�o Naobanai nii, kazannaata�o nii ipai pidannao. Na�iki uruu ida�an kizi waunao Israelitenao tanawatinan wa�oian ai, na�iki uruu ida�an kizi wa�oian mainaabata-kao wa�ai. 32 Mishi�o wuru�u kuwaiz, waunao waaitapa na�iki watukapa uruu kakupa. Uruu idi�o wakakuwaatinan udau�u. Na�iki Kaimana�o Doronaa, Tominkaru taaniaz ipai mishidainao kawana�ati, uruu kapam kainaabata�o pidannao ati mishi�o wuru�u kuwai Jesus dau�u kida�oraz." 33 Kootowapa-kidauzonao pidannao abatan idi wuru�u ĩparadanuz kaikapa�a, tuukii ĩto�ora�akan. Ĩaipan naa apostlenao zowiaka-kao 34 Mazan kaina�a pidan Phariseenao bii iki�o, Gamaliel kia�o u�uu, na�iki uruu tiichaapauzo Moses kakinaorii dau�u. Ipai pidannao naudapan uruu. Sariapa ukadishitan na�iki udyuudan apostlenao kodita-kida-kao zii miitiniapa-kizai iki. 35 Udauna�an ukian naa ipai kootowapa-kidauzonao pidannao ati, “�iribannao Israelitenao, uabata õparadan. Udi�itinapa zii shoman kiwiin usha�apatan ua�ii di�oraz daonaioranaou�u. 36 Kotua�a naa na�apa sha�atii tawuru�u Theudas kaawauzonuz. Uruu dono udakotinpan umanawunu�o pidan nii, na�iki iriba sha�atii uzaamatan papidanannao nii. Uikoda 400 pidannao zaamatinan u�idi�iti. Mazan bauda�apa kamoo uzowii-kao, uruu idi ipai upidanannao makoobi�iinan, atii na�apa karikaonan ĩmainaabatinan. 37 “Uruu dauna�an Judas, Galilee Baara san, uaipan pamizaataakapan Rome sannao tuma, ĩsaadapan dono ipai pidannao uu. Iriba sha�atii uzaamatauzon papidanannao nii. Mazan na�apa koshan uzowii-kao. Aizii upidanannao, ipai ĩmakoobi�iinan kapam. 38 “Ukau�an õkia�azon u�ati, wunao dau�ana�a di�oraz pidannaou�u, aonaa umashaata�ana�a ĩdyaun pakaudin-kizi ai. Umuuda mishi�oraiman ĩdyaun, marii ĩmakon. Aizii ĩsha�apaapan an wuru�u aimaakan kidaz paaipan kawana�ati karikaonan, na�apa�o nii kapam ĩmainaabatinan. 39 Mazan aizii umishiin an mishi ĩsha�apaapan wuru�u aimaakan kidaz Tominkaru aipan kawana�ati, aona�o nii uka�iitan umashaatan ĩdyaun. Na�iki utarubai-tinpan ni�i naa Tominkaru ati,” ukian ĩ�ati. 40 Sariapa mishi uparadan na�apatan ĩnyukunuu. Udauna�an ĩdapadan naa apostlenao powa�a ati koshan, na�iki ĩba�izii-kidan naa ĩdyaun. Ĩba�izii-kao dauna�an kootowapa-kidauzonao pidannao kakinaowan naa ĩdyaun tuukii. “Aonaa waaipan ukakuwaatinan powa�a Jesus dau�u,” ĩkian apostlenao ati, mazan ĩmuuda�akan naa ĩdyaun. 41 Uruu idi apostlenao kodita�akan naa kootowapa-kidauzonao pidannao bii iki, tuukii ĩkonaukian. Usha�apanum kau�an ĩaitapa Tominkaru wuru�u kashaapa�oraz ĩantamikita-kao Jesus dikin ii. 42 Ipai kamoo apostlenao tominapa-kidan pidannao, na�iki ĩkowaadapan Kaimana�o Kuwai Tominkaru Dapu ii, na�iki ĩdapu kawana�ati kida. Ĩkowaadapan ĩ�ati, mishi�o wuru�u Jesus, uruu Christ.

‹ Chapter 4 ACTS — All Chapters Chapter 6 ›

ACTS 5

Cite / Share This Page