LUKA 17

1 E ge tabara kaimeg giz daratagerare, kega, Umele uatabaruk lu uadatko: epe uaiai abele lu kemle! 2 Debele abi perege dimiri au baker sekerseker, a batauered gurim, adud dedkoli nerute kebile. 3 Ua uabim: ese mara le adud tonar marim, ma barditug; ese obazegeda ma abi idigiri. 4 Ese sefen gaber netate gerger adud tonar marim, pako sefen gaber netate marim egali, kega, Kaka obazegeda; ma abi idigiri. 5 Able kaimegiz gize Ople detagerda, “Ma keriba owatur ikai aukakale obai." 6 Ege Oplelut yabi daratagerda, “Ese waba owatur no kebile nagriwerteda able orwairorwair pe kebi mastad kep ikeredi, wa umele baker able au kelarkelar sipsip lu detagrare, “Ma mabu adem sipkem barbormur seplam a mabu bamordar ge gurge,” e ya wabi wadasrare. 7 Ese netat wabialam abra memegle wadawer, ei mara gedub wadirber; nerut kerkerge ei mara ebur wanaseserdlare, nade e taba dorgelam watakomer, nako ma abi detager, “Ma kei taba ge namri a lewer aro”? 8 Ma umerkak abi detager! Mai akai abi detager, “Ma kara lewer dirsir, a keubu ga akai mabu barsir, a kei tabakiamu taba kari sirnami nade yaka kara lewer arwer. Keuba ya ma mabra lewer ero." 9 Ma umerkak ya able memegle eswao ikai nalu ge e ikeri nalu ge mama abi aukaise detagri e waikeri. 10 E able orwairge wabidoge ikeredi. Nade wa gair lu ikereda ge wabi detagerda wa waikerda, wage bakaretwa, “Ki no memegle uridli. Ki no able dorge ikerda ge kerbi detagerda ki waikerda.” Iesude 10 Lepera Le Nadgirda mizmiz 17 nosik 11-19 11 Iesu digmer Ierusalemaem ege bakiamuda ge ikasereder Sameria ke irdireder a Galilaia ke irdireder. 12 Nade ge e ikasereder able utebem, ege 10 Lepera legize abi opdipita. Wige murizge tikweider 13 wige erer tabakri, “Iesuoi! Ople! Ma kerbi omarge dikerare!" 14 Nade ge Iesude yabi nardarda ege yabi daratagerda, “Wa bakiauare, wabu batomertare merkemem.” Wi nade ga gabge merkemem nakasir, wige bakeri sikak berda. 15 Netat yabialam tababu basmeri e akaida sikak baidari e takomeda tabakiamuda Iesuim aukaka aler Adi dispiri. 16 Able kimiar, e Samaria le dawer, tababu ikaida ge esigimeda Iesui opem a abi eswau ikaidari. 17 Iesude eudige abi ikaidari, “10 lepera le ge bakeri sikak berda; wader 9 pe nade uridli? 18 Nuluglam pe able suble no e takomedari Adi eswau waikai?" 19 Iesude eudige abi detagri, “Ma ekwei a bakiamu. Mama akaidari sikak baida ableglam mara owatur ikeredi. 20 Ege Faresaio giz ui abi itmerare, Na uar ge Ade ra baselaia uatabaruk? ege E uiabi daratagerare, kega, Ade ra baselaia nole uatabaruk erkep ge: 21 Nole le detager, kega, Dasmer, peike! a nerute, Ike! abelelam dasmer, Ade ra baselaia nagri uabi dog. 22 Ege E uiabi daratagerare, tabara kaimeg giz, Keubu gerger tabarki uaba lagelag erdali netate gerger Le la Uerem, a nole ardar kak. 23 A uader le giz, uiaba uabi detager, kega, Dasmer peiki! a nerute, Dasmer ike! uaba nole bakeamu, a nole armir kak: 24 Abelelam mokakalam ner be erperida nerute paikai kotor ge, a datki nerute paikai kotor ge; mokakalam gerger Le la Uerem. 25 Abkoreb kekiam gaire asiasi abim, a abele nosik uiaba abi dikaer. 26 Mokakalam Noa de ikerer abuar ge, abkoreb abele gerger Le la Uerem. 27 Uiaba erolare, a erelare, a kosker nasiplare, a bakedida abele kerker Noa nar ge barot, epe meg abger tabarki, ege uiaba uridili baum. 28 Mokakalam Lota de ikerer abuar ge; ui erolare, a erelare, a lu teraplare, a lu iritlare, a meta ikelare; 29 Abuar ge Lota dikaelu Sodoma, a ur a tei mokakalam irmer kotorlam ui ge baum: 30 Mokakalam, abele gerger ge ia Le la Uerem uatabaruk. 31 Ese le egimur meta tot ge abele gerger, abara lu muige meta ge, nolea uatabu uaeais: mokakalam le emeri sumez ge, nolea ko akomeret kak. 32 Uaba dikiapore Lota ra kosker. 33 Ese nerute le deraimer abara eded emeri mapodan, E dedkoli: ese nerute le dedkoli, E nagri debele. 34 Kaka uabi detagereda, kega, Abele ki, neisi le emeri netate sik; nerute le ais, a nerute no ikedi. 35 Neisi kosker edatimir; nerute kosker ais, a nerute no ikedi. 36 Neisi le emeri sumez ge; nerute le ais, a nerute no ikedi. 37 Ui ge abi detagerare, kega, Opole, nade ikeli? Ege E uiabi daratagerare, kega, Abele uteb nagri eud le la gem, gaire aeto etami.