LUKA 16

1 Ege E tabara kaimeg giz daratagerare, Nerute lu giz, E nagri memeg le, E sirdam; Ege E abi etomelu, E dedkoli abara lu. 2 Ege E abi dabger, kega, Nalu lu kaka mari asoli? ma natomer abele lu ma sirdameri; abelelam kaka umer kak ma memeg le sirdam. 3 Abele memeg le lut E dikiapor muige abara nerkep ge, Nalu lu ka akerer, abelelam kara opole E kari adem abele dorgelam memeg le sirdamelam? Kaka umer kak daiue; kaka sirip damosi. 4 Kaka umele abele lu kaka ikeli, iaueakai ese E kari adem abele dorgelam, a uiaba ko kari nagared uiaba utebem. 5 Ege E mer tigri nerute leem, a nerute leem, uiaba uridili nagri lu uiaba opole; E nerute le detager, Naket lu mari dog kara opole la? 6 E abi detager, kega, Paita uakaisu netate handed. Ege E abi detager, kega, Ma erpei mabara jauali, ma dudum emeri, ma detar fifite. 7 Ege E nerute le detager, Naket lu mari dog? E detaut, kega, Saito kori netate handed. Ege E abi detager, Ma erpei mara jauali, ma detar eiti. 8 Ege abara opole desperer abele memeg le, abara tonar nole barkak, abelelam E au pardar: abelelam geseb le E aule dikiapor uiaba nosik tumem datki le. 9 Kaka uabi detagereda, Abele mamona nole barkak tonar uabim, iaueakai uaba tebud keubu uabi tegaret uiaba meta niai karem. 10 Ese le ageakar kebi lu, E ko ageakar au lu: Ese le nole barkak tonar kebi lu, E ko nolea barkak tonar au lu. 11 Ese uaba nole ageakar, abele mamona nole barkak tonar, nete le uabi ikuar abele lu giz kar asesered? 12 Ese uaba nole ageakar subele la lu, nete le uabi ikuar uaba lu? 13 Memeg le umer kak dorge ikeli uiabim neisi opole: abelelam E derar nerute le, E omare nerute le; epe nerute, E maike nerute le, a dituaki nerute le. Uaba umer kak Ade ra memeg le, pako mamona. 14 Ege Faresaio giz aserare gaire lu uridili, uiaba lu lag; a uiaba abi negneg. 15 E uiabi daratagerare, kega, Uaba tonar no bes barkak le la opem; epe Ade umele dikiapore uaba nerkep: abelelam ese debe lu le la opem, E adud Ade ra opem. 16 Abele gelar giz pako perofeta bakedida Ioane: ditimedelu natomertare Ade ra baselaia ge, a gaire le batumu. 17 Kotor a gesep sobkak uaeseamu, Ade ra gelar giz nolea nerute mog uar uaeseamu. 18 Ese nerute le dituak abara kosker, a isipi nerute, E eruam: ese nerute le isipi abele kosker, abara kimiar dituak, E eruam. 19 Netat kerkerge lugizkem le wadali, e gair kerkerge au bakirbakir debe wali wetkili. E gair gergerge sererserer wadali. Abra gair debelu wadaragri. 20 Nerut kimiar abra nei waditkeredi Lazaro e nole bakirkak wadali. Badgize abra gem dikadarda, a e gair gergerge adge waiperedi able au mitkar luglug le metalam maike tege. 21 E laglag wairwi able lewer puipi ya obatwereda able mitkar lugizkem le laulaulam. Ei omai gair kerkerge watbaskeda abra bad wadisomdeda. 22 Able lukak le eumida ege abi angelagize igareda Abramaidoge timridarda ge able lewer kotorge tidirsilare. Able lugizira apu ga eumida, a abi etkobeidarda. 23 Muige Urasamkak utebge, ge e au asiasi digier, e egremada Abramai erdari aumurizge a Lazaro ge abidoge timireder. 24 Ege eudige ererekri, “Baba Abrama! Ma kari omarge tarakai: ma Lazaro temarik e tabara tagpim nige watakmei a watabakiamu kara werut gebem waitimuar ableglam kaka asiasi digili muige able urge!" 25 Ege abi Abramade tidetagri, “Kara werem, ma mena dikepwali nako mama idid watarali mai gair debelu ma watirepli. A Lazarode ya gair adud lu watirepli. Able kerker pe irdi epe sererge dali mape asiasi pema digili. 26 A nerut pe dikeredi, able aukaka muimui awak pe merbidoge eipuge iperedi, ya waiakai netat lelut umerkak wadatupi kerbialam obakiamu mari watarardar, a netat lelut umerkak watadatupi kei watabakiamu kerbim pe nade mama tarali." 27 Ege able lugizira apu akaidari abi detagri, “Baru bab, ka marim bagwi, ma Lazaro emarik obakiamu kari bab metage 28 pe nade kara 5 barada turidli. Ma abi emarik yabi umerem watadaratagrare ya waiakai wi umerkak watabakiauare able asiasi utebem." 29 Abramade abi detagri, “Mari baradara tuduridli Mose a perepeta ko yabi umerem watadaratagerlare. Mari baradagize umele yabi watarasorlare. 30 Ege lugizira apu akaida abi ikaidari, “Nole bab Abrama, wi umerkak yabi watarasorlare! Ese netat le eudlam wekiam a yabim obakiamu wi ya taba witlam watabatare." 31 Ege Abramade abi detagri, “Ese wi nole Mose a peropeta tarasreda, wi umerkak ya watarasrare ese netat le ya eudlam wekiam."