Guyeiti 84

1 Guye loo ɠundiɠii nɔnɔi ʋe. É loozu kɔnigi ɠa, nii é zeɠezu Gate taazuʋɛ. Kolé mavofodaiti ta-wuyei. 2 Ee, Ɠɔoɠɔ GALAGI, Fai-Pɛ-Maliɠii, è-zeizuʋɛ nɛɛʋɛ bɛ̀ gola! 3 Nà ɓalasu, zìi ɗa zoolɛ, ɗa-ɠoi ma vaa zu, Ɠɔoɠɔ GALAGI, nà wooɠula ga koozunɛɛi zɛnvu su ƓALAGI ʋɛ. 4 Soologi ɠa laɠagi losu zɔlɔɔsu, sɛʋɛzɛʋɛgoi laɠagi losu zɔlɔɔ, ʋɛ é ma yiʋoiti puuzu ná, ɗa-zalaɠa ɠulazuʋɛti kobaʋɛ, Ɠɔoɠɔ GALAGI, Fai-Pɛ-Maliɠii, nà-masagi, nà-GALAGI. 5 Undaanɛ nu ɠa ga naati, niiti ti zeizu ɗa-ʋɛlɛi wu, mazɔlɔɔ ta yɛ è maamusɛzu eyɛsu ɠɔ. Lo! 6 Undaanɛ nu ɠa ga naati, niiti è ga ti-zɛbɛi, pelei ɠa ti-yiimaʋɛ, ta ziɛ la, ti li ɗa-ʋɛlɛi wu. 7 Siɛgi zu ti leʋesu da Ɓaka nɛmɛi zu (nii poluʋɛ ga «gɔlɔ nɛmɛi zu»), GALA ka falibo, é kɛ ga koozunɛ adaʋɛ, tona mɔungiti ta ʋu naa ma, ga tuyai. 8 Ti-zuvikɛi ɠa li ga wɔɔlɔa, ta ɓɔɠɔ lɛ ga GALA Siyɔn. 9 Ɠɔoɠɔ GALAGI, Fai-Pɛ-Maliɠii, woilo nà-maanɛɛnɛ wooi ma! Woilo, Zakɔɓe ná-GALAGI! Lo! 10 Ee, GALA, ɗɛi è gi makɛsu, yeezei naa wu ga pagɔ, nii è gulɔi ziaai ma, è sei. 11 Mazɔlɔɔ nu folo ɠila kɛ ɗa-ɠoizuʋɛ, naa zoloogɛ é leʋe folo waagilagi (1.000) ʋa nu a kɛ ada ɠili. Fizɔgɛ nu yɛ nà-GALAGI ná-pɛlɛlaʋɛ, é ʋa li yɛsu faa ɲɔu ɠɛ nuiti ta-ʋɛlɛi wu. 12 Mazɔlɔɔ Ɠɔoɠɔ GALAGI ɠa gi ʋɛ eɠɛ foloi, ta kɔɔɠɔ zɛpɛgi, Ɠɔoɠɔ GALAGI ɠa zaalai veezu ta lɛbiyai, é la ɠɛlɛa undaanɛɛ veezu naati bɛ, niiti ti ziɛzu sɔledai zu. 13 Ɠɔoɠɔ GALAGI, Fai-Pɛ-Maliɠii, undaanɛ nu ɠa ga naama nui, nii é ɠalivaazu è ma!