Guyeiti 8

1 Guye loo ɠundiɠii nɔnɔi ʋe. Davide ná-guyei. É loozu kɔnigi ɠa, nii é zeɠezu Gate taazuʋɛ. 2 Ɠɔoɠɔ GALAGI, gi-Maliɠii! È-laaseigi maayikiʋɛ, eteai zu ná pɛ! Ɗa-maayikii é volozu, è naa zeiɗa geeɠɔlɔgi maazuʋɛ. 3 È lɛbiyai lɔa doungoiti daaʋɛ, ta ɲiimiɓɔlegiti, è wɔinzeɠe nuiti ta-vaa zu, è è zili nuiti gaalɛi, ta potokula nuiti. 4 Siɛgi zu nà geeɠɔlɔgiti pɛtɛna da, ti ga ɗɔnɔiti, è-yeei ti ɓɛtɛai, alugi ta somideɠaiti, è ti ɲɛkpɛai: 5 Nuɓusɛi ɠa ga leeni, è ʋa ɠigaiziɛ su? Nui ɠa ga leeni, è ʋa yiizoolɛ la? 6 Anɛɛ naa ʋe, è kɛɛʋɛ ga GALA ná-seikobai nɔ, è lɛbiyai ta unfemai veeʋɛ bɛ, ti ɠɛ unma ga masa bɔɔlɔgi. 7 È zobogi veeʋɛ bɛ, ga é masadai ɠɛ anii kpein unda, è-yeei ti ɓɛtɛai, è ti pɛ puuni kɔɠɔwu, 8 toganiiti pɛ, ma wolaiti ta ma goiti, anɛɛ dɔɓɔ zuaiti ɓalaa, 9 ta wɔniiti, ta kaleiti, ta niiti kpein ti ziɛzu ziɛiti bu. 10 Ɠɔoɠɔ GALAGI, gi-Maliɠii! È-laaseigi maayikiʋɛ, eteai zu ná pɛ!