Guyeiti 7

1 Davide ná-maawɔin wuyei, é tooni Ɠɔoɠɔ GALAGI ʋɛ, é ʋilɛ Kuse ʋa, Ɓɛnzamɛn nui. 2 Ɠɔoɠɔ GALAGI, nà-GALAGI, nà lɔɔɠuzu ɠaiziɛzu è ʋɔ bɛ, kìzo wɔ̀inzeɠe nuiti kpein ma, ùnmɔɔ, 3 nii a kɛ ti mina bàli ga eɠɛ zalai, nii a ɗa li ga anii, nu la kula zea. 4 Ee, Ɠɔoɠɔ GALAGI, ná-GALAGI, ni gè naa ɠɛɛʋɛ, eɠɛʋelei ti pèelalazu la, ni gè ɲamaba vaa ɠɛɛʋɛ, 5 ni gè ɓaaɠogɛ bɔ̀ɔlai ta ma, ni gè sìli nui ta maavoogɛ, un ge la ba, 6 naazu sìli nui ʋilɛ pòlu, é sò, é ɠɔɠɔlo mà, é nà-lɛbiyai ɓokpo fufiligi zu. Lo! 7 Wuzeɠe, Ɠɔoɠɔ GALAGI, ɗa-yiiɠulagi zu, wɔ̀inzeɠe nuiti ta-yiiɠulagi laalɔɠɔma, ɠaaɓa mà, ɗɛi è faa zɔle fai leveai! 8 Ziiti ti maaɓɔ è-maaɠoolii zu, ɗɔun ɗa zei ti unda, è yɛ zeini naa maazuʋɛ, ɗa-masa kpɔkpɔgi ɠa. 9 Ee, Ɠɔoɠɔ GALAGI, ɗɛi è ga ziiti pɛ tukpɔɠaaleʋe nui, tukpɔi lo bɛ̀, kɛ eɠɛʋelei nà-sɔledai la. É ɠɛ bɛ̀ eɠɛʋelei nà-sɔbalalai la. 10 Pele ɓesa faa ɲɔu ɠɛ nuiti ta-vaa ɲɔi luɠɔ, telebo nui ɠɔɠɔ losu ɓɛtɛ, ɗɛi è nuiti ziimaʋɛ ʋɛtɛsu, ta ta-ɠisiɛi, telebo GALAGI. 11 GALA ka é ga nà-kɔɔɠɔ zɛpɛgi. Nii zii zɔlegai, toɠa naa ɠizo. 12 GALA ka ga tukpɔɠaaleʋe nui nii sɔlegai, nii a ɗa ná-ziiɠaawanai ɠula kɛlɛma voloi faaɠaazagi a ɠɛ la, 13 nui naa laalɔɠɔma, nii é la ʋaazu pɔ. GALA ka ɗa ná-boɠa zɔkpɔi ɠaali, é ná-mɛɛin zumɛɛn, é kɛʋele ɓɛtɛ. 14 Toɠa kɔɔɠɔ zɔɔlaiti kpɛtɛzu nu ʋaa vai ma, é mɛɛinti kpɛtɛ niiti abui ti ʋa. 15 Wɛlɛ, faa ɲɔu ɠɛ nui ɠa telebotalai ɠɛʋele ɓɛtɛzu, toɠa kogi zeɠezu ga faa ɲɔi, é sɔlɔɔ ga zɛɛ vai. 16 Toɠa zeɠei wɔɔzu, é bɔ, é loo zeɠei zu, nii é bɔai. 17 Ná-faa ɲɔi ɠa loozu tɔ ɓɔɠɔi unma. Ná-suɲɔulai ɠa loozu toʋalaʋɛ. 18 Nà Ɠɔoɠɔ GALAGI maamusɛ ná-telebodai maaʋele ma, nà guyei loo Ɠɔoɠɔ GALAGI laaseigi lɛbi vai ma, GALAGI nii é Anii-Pɛ-Unda geezuʋɛ.