Colossians 4

1 Kamim la tamlohi tavera, ha kilau mamahuni na nomim slev na posposi rÌuhu, matan kamim sohena, ka levosahia vara nomim tamlohi tavera sei, Moli na tuka, mo lo kilau kamim. 2 Ha turu rÌilangi na nomim usiusi, ha rÌomrÌomi mamahuni na sava ka lo usiusi matana, ale ha vere meje na mapumim i vano isana, 3 ha usiusi matamam sohena, ha usiusi vara God i sile te masapa matan vara kama pa vereuli na nona retisohai sei mo lo vujangi na nona rÌomrÌomi luhu hin KrÌisto, haratu natu, na lo toho na ima rÌilangi matana, 4 ha usiusi mataku vara a pa vereulia i pa memera i rÌuhu na malele God mo opoia. 5 Ale mo rÌuhu vara ha sopo toho purongo na nahon tamlohi atu la sopo rasua, pani ha lo usuri na posposi tataholo non Moli. 6 Mo rÌuhu vara tarea na nomim retireti, ha retiholoholo, ha rÌomrÌomi na sava reti ka verea, ale ha pa tatamahu vara ha pa rÌarami mamahuni na tamlohi hatehateahi sohena sava. 7 Tychicus vorairÌa atu enrÌa rÌa opoia, enia tapalaku volitusi matea non Moli, tarea mo lo rÌomturu rÌilangi na vavahinau non Moli, enia i pa sorahi na sava na lo vaia isamim, 8 ale na lo rÌule Tychicus isamim matan haratu, vara ha pa levosahia vara kama lo toho sohena sava, ale vara i erÌi retituetueni na mapumim, 9 moiso Onesimus mo lo usuri Tychicus, enia vorairÌa matea, rÌa opoia mo rÌomturu rÌilangi, enia vonamim matea, ale la pa sorahi na sava hinau kama lo vaira nike. 10 Aristarchus, enia mo lo toho peresiau na ima rÌilangi nike, mo sile na nona retioloolo isamim, moiso Mark atu vorain Barnabas, korong ka lavi te reti moiso vara i pala isamim, ale ha pa lavia, 11 peresi na tamlohi matea hijan Iesu la lo tovia Jastas. La harihi tupu visalete purongo na Jew tari la lo vavahinau matan mauri atu God mo aulu hinia peresiau nike, ale na avulahi tavera mata enira la lo tueniau. 12 Epaphras, enia vonamim matea, enia volitusi non KrÌisto Iesu, mo sile na retioloolo isamim, mo lo usiusi rÌilangi tarea matamim na nona usiusi matan vara ha pa mai ha pa jea, ale ha levosahi mamahuni na masalon God. 13 Enau a erÌi verea isamim vara enia mo lo vavahinau rÌilangi matamim peresi la haratu Laodicea peresi la haratu Hierapolis. 14 Doctor Luke vorairÌa sei rÌa opoia, peresi Demas, enira la sile na nora retioloolo isamim. 15 Ha sile na noku retioloolo isana vorai kalesia atu Laodicea, ale isan harÌai atu Nympha peresi na vao kalesia la lo matavuhi na imana. 16 Ale vara ka evi leta nike isamim mo isoiso, ha mele evia isana vao kalesia la lo matavuhi Laodicea. Ale mo rÌuhu vara ha evi leta atu na pete sohaia tiroma moiso isan la haratu Laodicea. 17 Ale ha verea isan Archippus vara, “O vaihitea vara o vai marÌivisi na vavahinau non Moli sei mo lo silea isam." 18 Enau Paul na lo uli la retioloolo nike na limaku haseku. Ha sopo rÌomaliho vara enau na lo toho na ima rÌilangi, ale rÌomrÌuhu non God i pa toho isamim.