Acts 2

1 Ranin Pentecost mo pala, la lo toho na jara matea enira mo isoiso. 2 Ale vahatea purongo, la rongo na hinau matea sohena langi tavera matea mo lo sere, ale mo marÌivisi ima atu la lo sakele hinia. 3 Ale hinau hai sohena pepe hapu, la pala isara la sakele aulu na patura hatehateahi. 4 Ale enira mo isoiso, Tanume Tapu mo sohonira, ale la tapulo retireti na leo tinatinapua sohen Tanumen God mo tinarÌihira hinia. 5 Hin rani atu, Jew matuvana na jara tari na varama sei rÌomira mo rÌilangi mata nora rasua la lo toho atu Jerusalem. 6 Ale vaore tavera atu, mo vai na vao tamlohi la mai jara matea, ale la hutura matan enira hatehateahi la rongora la lo retireti na leora. 7 Ale la hutura, la marÌurahi tavera lara, “Avei, la tamlohi nike, la sopo mara Galilee nakonako? 8 Ale mata sava natu rÌa lo rongora la lo retireti na leo jararÌa hatehateahi sei rÌa vora hinira? 9 EnrÌa mara Pathian, Medes, Elamite ale mara Mesopotamia, Judea, Cappadocia, Pontus, Asia, 10 Phrygia, Pamphylia, Egypt ale jara hai Libya na lolon Cyrene, ale hai la tai Rome. 11 TatuarÌa Jew, tatuarÌa enira la tamlohi rÌorÌoha sei la lo usuri Moses, ale mara Crete peresi na mara Arabia â rÌa rongora la lo retireti na leorÌa. La lo vere na vavahinau rÌuhu mata suiha non God." 12 Ale enira mo isoiso, la marÌurahi la hutura, la lo vereverera hinia lara, “Matamata mata sava nahai?" 13 Pani tatuara la kerehira lara, “Hara sei, la drong na waen meji!" 14 Ale Peter peresi la tupu sangavulu rÌomana matea atu, la turu mai na nahora, ale mo ulo mo verea isara mara, “Mara Judea, ale mara Jerusalem tari, ha tapurongo! Ha levosahi mamahuni hinau nike! 15 Matan la tamlohi nike la sopo drong sohen ka lo rÌomrÌomia, matan mo pa lo rÌalavuho purongo nahai. 16 Pani hinau nike prÌovet Joel mo verea moiso mara, 17 ‘God mo verea mara: Na pongi hitahu, a pa surei na Tanumeku na tamlohi tari, ale natumim peresi na venatumim la pa retimangovi, ale uluvoumim lamane la pa hite na hinau sohena mavuho a pa vujangia isara, ale vajiahamim a pa silera na mavuho; 18 hin pongi atu sohena, a pa surei na Tanumeku isana noku slev lamane peresi na slev harÌai, ale la pa retimangovi. 19 Ale a pa vujangi na matamata marÌurahi tavera aulu na masapa, ale matamata mata rÌae, hapu peresi na asu hapu atano na varama, 20 ale alo i pa posi i mai i rÌorÌoha, majhi vitu i pa hahara sohena rÌae, la pa pala tiroma hin rani atu Moli i pa mele mai, rani tavera atu i pa rÌuhurÌuhu jea. 21 Ale rani matea i pa mai vara sava tamlohi la tau na nora rasu na hijan Moli la pa juri.’” Joel 2.28â32 22 Ale Peter mo mele verea mara, “Tavtavuin Israel, ha tapurongo! Iesu mara Nazareth, tamlohi matea God mo taua na nahomim, mo lo vai na vavahinau mata suiha, matamata rÌuhurÌuhu tavera, peresi na matamata marÌurahi sei God mo vaira na nahomim hin Iesu, sohen kamim mo isoiso ka levosahi mamahunia â 23 tamlohi atu, ka taua na lima tamlohi sasati, matan vara la pa vosaea na talopeilopei vara i mate, pani haratu mo pa lo usuri na rÌomrÌomi tavera non God, ale enia mo levosahia tiroma moiso vara i pa sohena. 24 Pani God mo sauteterahia, mo teria na liman mateia, matan mateia i pa sopo erÌi tauria na suihana. 25 Matan supe David mo retireti matana mara, ‘Tarea na lo hite Moli na nahoku, matan enia mo lo toho na matuaku, enau a pa sopo hisu. 26 Matan haratu mapuku mo avulahi, ale leoku mo uloulo na hasohasona! Epeku i pa toho na liman rÌomtoho, 27 matan engko God o pa sopo tinarÌihia vara a toho na varama mata mateia, teni vara o tinarÌihia vara nom tamlohi tapu i rÌovo na taptap. 28 Engko ko vujangiau moiso na malele mata mauri; engko o pa vaiau a avulahi tavera na nahom.’ Psa 16.8â11 29 La vorai, na levosahi mamahunia vara a erÌi verea isamim, vara pua David mo mate ale la tavunia. Ale tapuna mo lo toho peresirÌa mo kakau nake. 30 Matan David enia prÌovet matea, mo levosahia vara God mo vai na retitauhi matea peresia, vara mahapina matea, i pa sakele na nona jara sakele mata supe, 31 David mo hiteulia tiroma moiso, ale mo verea mara KrÌisto i pa sauteterahi, ale vara i pa sopo taua vara i lo toho na varama mata mateia teni vara epena i rÌovo. 32 Iesu sei, God mo sauteterahia na mateia, ale kamam mo isoiso kama hitea. 33 Nake, God mo tahea mo sahe na matuana, vara i tauri na suiha tavera sei mo aulu jea mo jeu na tinapua na tuka, ale usuri na retitauhi non God Tama, mo lavi na Tanume Tapu, ale mo sureia hin kamam, sei ka lo rongoa ale ka lo hitea nakerihi. 34 Matan David mo sopo lo sahe aulu na tuka, pani enia mo verea mara, ‘Moli, mo verea isan noku Moli: O sakele na matuaku, 35 i tikeli rani atu a vai na nom meresahi, la toho na ruhuruhu palom.’ Psa 110.1 36 Matan haratu, mo rÌuhu vara tamlohi tari Israel la levosahi mamahunia vara God mo vaia mo mai Moli! Ale mo vaia mo mai KrÌisto, pa Iesu atu sei ka lo vosaea na talopeilopei!" 37 Lara la rongo na nona reti, rÌomira la jovi vahatea. Ale la verea isan Peter tolu na vaharÌule tari atu lara, “La vorai, kama pa vai na sava?" 38 Ale Peter mo verea isara mara, “Ha posi! Ale ha paptijo kamim mo isoiso na hijan Iesu KrÌisto, matan vara God i rÌomi na nomim hehe! Ale i pa sile purongoi kamim na Tanume Tapu. 39 Matan retitauhi nike, enia nomim peresi na natumim, ale nona tamlohi tari sei la lo toho asau rÌove, tamlohi mo isoiso sei Moli norÌa God i pa tovira vara la mai isana." 40 Ale Peter mo mele vujangira vavano, mo verea rÌilangi isara mara, “Ha juri kamim hasemim hin pina lejileji nike!" 41 Ale evin la haratu sei la rasu na nona reti moiso la paptijo hin rani atu, la mai kalesia korong mariviti tari vaha tolu (3000). 42 Ale la hase taura na vujangi nona vaharÌule, ale la matavuhi mata hanhani tapu peresi na usiusi. 43 Ale matahu tavera mo sohoni na tamlohi tari matan vaharÌule la vai na hina marÌurahi tavera matuvana peresi na matamata tavera. 44 Ale tarea, tamlohi rasua tari la lo pulutahi jara matea, ale hinau tari enia nora enira mo isoiso. 45 Ale la lo arÌehi na jarara peresi na nora hinahinau, ale la lo asera isan la haratu la vejuveju hin te hinau. 46 Ale na rani hatehateahi, la lo matavuhi na Temple, ale la lo lavi na hanhani tapu na lolo imara, ale na nora hanhani la vaia na avulahi peresi na hansohai. 47 La hasohaso God, ale tamlohi tari la avulahi hinira. Ale na rani hatehateahi tamlohi tinatinapu sei Moli mo jurira, la lo pulutahi peresira.