1 Corinthians 11

1 Ha usuri na noku tovongi sohen enau na lo usuri na tovongi non KrÌisto. 2 Ale nakerihi, na lo hasohaso kamim matan ka lo rÌomrÌomiau na hinau tari, matana ka lo tauri mamahuni na mauri kalesia, sohen enau na lo vujangi kamim hinia. 3 Pani na opoia vara ha pa levosahia vara patu harÌai lahi matea enia tuana, patu lamane tari enia KrÌisto, ale patun KrÌisto enia God. 4 Lamane tari sei la ropoi na patura, ale vara la lo usiusi teni la lo retimangovi, enira la lo vai mahanuhanu na patura sei, enia KrÌisto. 5 Pani harÌai lahi tari sei, vara la sopo ropoi na patura ale la lo usiusi teni la lo retimangovi, enira la lo vai mahanuhanu na patura sei tuara, mo sohena vara la hiripilopiloia. 6 Vara harÌai lahi matea mo rÌohu vara i ropoi na patuna, mo rÌuhu vara i tai na vuluna i vejuveju. Pani matan enia hina mahanuhanu matea vara te harÌai lahi i tai na vuluna teni la hiripilopilo na patuna, mo rÌuhu vara i ropoi na patuna. 7 Matan mo sopo tataholo vara lamane matea i ropoi na patuna, matan enia niniun God, enia mo lo vujangi na rÌuhurÌuhun God, pani harÌai enira la vujangi na rÌuhurÌuhu nona tamlohi. 8 Matan God mo sopo vai na lamane na harÌai, pani mo vai na harÌai na lamane. 9 Ale mo sohena purongo, God mo sopo vai na lamane mata harÌai, pani harÌai mata lamane. 10 Matan haratu natu, mo rÌuhu vara harÌai la ropoi na patura sohena matamata matea mo vujangia vara la lo toho na ruhuruhu suiha tinapua, matan angelo la lo kilau matana. 11 Pani na vao kalesia non Moli, harÌai mo sopo matan i toho hasena, teni tamlohi i toho hasena, 12 matan God mo vai na harÌai na lamane, ale nake lamane mo vora isan harÌai, ale hinau tari la tai isan God. 13 Kamim hasemim ka hitea vara mo tataholo vara harÌai matea i usiusi isan God, ale i sopo ropoi na patuna? 14 Mauri mo sopo vujangi kamim moiso i mera vara lamane matea vuluna mo peravu, enia hina mahanuhanu isana? 15 Pani vara vulu harÌai mo peravu, enia hina rÌuhurÌuhun harÌai atu teni mo vono? Matan God mo sile na vuluna mata ropoi na patuna. 16 Vara tea rÌomina mo sopo opoi hinau sei, pani mo sohen haratu natu isamam peresi na lolo vao kalesia non God. 17 Pani sava a pa verea nakerihi, na sopo hasohaso kamim matara, matan ka lo pulutahi jara matea, enia mo sopo matan ha pa vai te hinau i mele rÌuhu, pani ka vaia mo mele sati jea sivo. 18 Matan tiroma hinau na rongoa, enia vara ka lo pulutahi mata lotu ale patumasa mo lo toho isamim. Ale na rongoa vara mo vararÌuhu, 19 matan rÌa levosahia vara patumasa la pa vora isamim, matan vara i memera vara hare nakonako isamim la jea na mauri rasua. 20 Matan ka lo pulutahi jara matea, mo sopo hanhani tapu sei ka lo hania. 21 Matan, na nomim hanhani, tamlohi hatehateahi la hasera hani na hara hinau. Matea mo marohati, ale tinapua mo drong! 22 Mo toma? Mo sopo te imamim vara ha erÌi hanhani teni ha inu hinira? Teni ka lo hitelehilehi na vao kalesia non God, matan ka vai la haratu mo sopo te nora hinau la mahanuhanu? Na sopo levosahia vara a pa vere na sava isamim! Ka rÌomi vara a pa hasohaso kamim matana? Mo vono! 23 Matan sava na silea isamim na lavia isan Moli. Hin vutepongi atu sei Judas mo turuposi hinia, Moli Iesu mo lavi na pereti, 24 ale mo vere meje matana moiso mo topea mo verea mara, “Harihi enia epeku sei na silea matamim. Ha vai harihi rÌomrÌomi na sava na vaia matamim." 25 Mo mele vaia sohena purongo na isoison hanhani atu, enia mo lavi paniken atu, mo verea mara, “Harihi enia retitauhi paro na rÌaeku. Vara ha inua, ha vai harihi rÌomrÌomi na sava na vaia matamim." 26 Matan sava rani ka lo hani pereti atu, ale ka inu hin paniken atu, ka lo vujangi na mateia non Moli, ale ha lo vaia sohena i tikeli na rani i mele mai hinia. 27 Sava tamlohi vara mo hani pereti atu teni mo inu hin paniken atu non Moli na malele matea mo sopo tataholo, enia mo lo vai na hehe matan mo lo kilau purongoi na epen Moli peresi na rÌaena. 28 Tamlohi hatehateahi hasera la pa kilau usurira matan te hehe na maurira la pa vaharÌi hinia, moiso la pa erÌi hani pereti atu, ale la inu hin paniken atu. 29 Matan, vara tea mo hani teni mo inu, pani mo sopo rÌomrÌomi na kalesia tinapua, enia mo hase hani teni mo inu na nona talai. 30 Hinau sei natu, mo vai kamim matuvana mo sopo te suihamim, ale ka rojo, ale hai la mate. 31 Pani vara rÌa haserÌa kilau usuri mamahunirÌa, God i pa sopo arirÌa matana. 32 Pani vara Moli i arirÌa, mo vaia matan vara i vai tataholoirÌa matan vara rÌa pa sopo lavi na talai peresi na tamlohi tinapua na varama na pongi hitahu. 33 Matana, la voraiku peresi na vevoraiku, vara ha pulutahi mata hanhani tapu, ha saovi kamim hatehateahi. 34 Vara tea mo marohati, i pa hanhani na ima purongo, matan vara ka pulutahi, i sopo mata lavi na talai. Ale mata hinau tinatinapua a pa vere na malelera tataholo isamim vara a mai.