1 Corinthians 10

1 La voraiku peresi na vevoraiku, na opoia vara ha levosahia vara tamarÌa la lo toho na ruhuruhun telangi atu, ale enira mo isoiso la hahau roto na tasi hin masapa atu God mo vaia, 2 ale enira mo isoiso la mai tamlohi usuri non Moses ale la paptijo hinia hin telangi atu ale hin tasi atu, 3 enira mo isoiso la hani hanhani atu God mo silea, 4 enira mo isoiso la inu hin wai atu God mo silea. Matan la inu hin vatu mauri atu sei mo lo usurira, ale vatu atu enia KrÌisto. 5 Pani God mo sopo avulahi na sope vaora tavera, matan God mo vilimateira, ale mo pla hau na tarapera na jara hasetoho atu. 6 La hinau sei la masese sohena tovongi matea isarÌa, matan vara rÌa pa sopo opoi na hina sasati sohera. 7 Ha pa sopo lotulotu vono sohena tatuara la lo vaia tuai, sohen la ulia moiso vara, ‘Tamlohi la sakele vara la hanhani, la inu, ale hitahu, la turu la velu’. Exo 32.6 8 RÌa pa sopo usuri na posposi maji sohena tatuara sei la lo vaia tuai, rani matelete purongo vao sei la mate, evira mo tikeli tari vaha ngavulu rua mo tolu (23,000). 9 RÌa sopo vaihite Moli sohen la tatuara atu la lo vaihitea tuai sei ale mata la hati matemateira, 10 teni rÌa sopo reti vavarihi sohen la tatuara atu la lo vaia tuai, ale angelo mata mateia mo vilimatemateira. 11 La hinau sei la mai isara tuai sohena tovongi matea isarÌa, ale la ulira mata retirÌoarÌoahai isarÌa nake, enrÌa sei rÌa lo toho na pongi hitahu. 12 Matan haratu, sava tamlohi mo lo rÌomrÌomia vara enia mo lo turu rÌilangi, i lo kilau mamahunia vara i sopo jovi sohera. 13 Mo sopo te vaihite hatea vara ko jovi hinia mo tinapua hin la haratu la lo tikeli na tamlohi tari. God mo lo turu rÌilangi tarea, ale i pa sopo tinarÌihia vara te hinau hatea i vaihite kamim i jeu na vaihite sei ha erÌi horora, pani hin vaihite atu God i pa sile te malele mata rovo hinia matan vara ha pa erÌi jelu hinia. 14 Matan hinau sei, la voraiku rÌuhurÌuhu, ha rovo na lotulotu vono. 15 Noku reti mo lo vano isana tamlohi la tamlohi tapurongo, ha ari na sava na lo verea isamim. 16 Paniken mata lerÌuhu non God sei rÌa lo vere meje isana matana, enia matan vara enrÌa mo isoiso rÌa erÌi lavi na lerÌuhu na rÌaen KrÌisto hinia. Ale pereti atu rÌa lo topea, enia matan vara enrÌa mo isoiso rÌa erÌi lavi na lerÌuhu na epen KrÌisto hinia. 17 Matan pereti atu enia pereti matelete purongo, enrÌa sei rÌa vao matuvana, rÌa mai epe matelete, matan enrÌa mo isoiso rÌa hani na pereti matelete purongo. 18 Ha to rÌomrÌomi na tavtavuin Israel. Ka hitea vara la haratu sei la lo hani na malamalai, la sopo mai matelete matana? 19 Ka rÌomi vara na lo vere na sava? Na sopo verea vara tamasi teni te hanhani sei la silea isara enira hinau purongo. 20 Mo vono! Na lo verea vara malamalai atu tamlohi rÌorÌoha la lo silea, la lo silea isana tanume sasati, mo sopo isan God. Na sopo opoia vara kamim ha matavuhi peresi na tanume sasati. 21 Ha sopo erÌi inu na paniken non Moli, ale ha inu na paniken nona tanume sasati! 22 Mo toma? Mo tataholo vara rÌa vaivai Moli i lolokoru? Ka rÌomi vara enrÌa rÌa rÌilangi rÌa jeu Moli? 23 Tamlohi hai la lo verea lara, “A erÌi vai na hinau tari na opoia!” Mo rÌuhu pani hinau tari la pa sopo rÌuhu hiniho ale hai lara, “A erÌi vai na hinau tari na opoia!” Mo rÌuhu pani hinau tari la pa sopo tueniho vara o ulua. 24 I pa sopo tea i rÌomrÌomi na sava mo rÌuhu isana purongo. Ha rÌomrÌomi na tinapua, ale sava i pa rÌuhu isara. 25 Ha hani na mit la arÌehira na jara maket, i sopo te retiusia vara la silea isana tamasi moiso teni mo vono matan vara rÌomimim i sopo rÌomkaka hinia. 26 Matan Retitapu mo verea vara, ‘Varama enia non Moli, ale hinau tari la lo toho hinia enira nona’. Psa 24.1 27 Ale vara te tamlohi rÌorÌoha mo tovi kamim vara ha hanhani peresia, ale ka avulahi vara ha vano, ha hani na sava hinau la taua na nahomim, i sopo te retiusia hinira vara la tataholo vara ha erÌi hanira teni mo vono. 28 Pani vara tea mo verea isamim vara, “Hinau sei la silea sohen malamalai moiso!” vara mo sohena, ha sopo hania matan enia mo vere kamim hinia, ale matan vara i sopo komo te rÌomina. 29 Pani na sopo vere na rÌomimim, pani rÌomin tamlohi atu. Matan mata sava natu, noku materi i pa isoiso mata rÌomrÌomi non te tinapua? 30 Vara na lavia peresi na vere meje isan God, mata sava natu, tea la erÌi tuvaiau matan hinau sei na vere meje matana moiso? 31 Ale matana, sava ka hania teni ka inua teni ka vaira, ha vaira matan vara hasohaso i pa vano isan God matana. 32 Ha sopo vai te hinau mata vaivai na Jew, teni na tamlohi rÌorÌoha teni isana vao kalesia non God, 33 sohen enau sei na vaihitea vara a vai na tamlohi tari la avulahi na hinau tari sei na lo vaira. Na sopo vaia mata i pa rÌuhu isaku, pani na lo alea vara a vaia i tueni na tamlohi matuvana matan la pa erÌi juri.