Yɛsɑ̃ɑ̃ 52

¹ Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.

² Dowɛki Edomiibɛ kou do nɑ̀kɛ́ Sɑuri Dɑfiti tɑmɛ̀ Aimmɛdɛki cĩ́ɛ̃̀tɛ̀ kòò dentɛ̀ fɛ̀.

³ Dɛ̀ dòmmɛ fɔ̃́ nwèè kpeńnì mɛyɛi ndɔɔ̀rìmù miɛkɛ kɑ̀ɑ pɔ̀tìnɛ̀ mɛyɛi? Kɛ ɔ̃ ntṹṹ nkɛ toti mukɔ̀ù mɑ́ɑ̀ kpɛ́í?

⁴ A mɔkɛ mɛsoùmmɛ̀ mmɛ, kɑ̀ɑ nùù nɑɑti kuponkù kɔ̃mɛ, kɑ̀ɑ tú oniticiìntì.

⁵ A dɔ́ mɛyɛi mmɛ kɛ yóu mɛsɑ̀ɑ̀, kɛ dɔ́ siyɑ́ɑ̀bìsí kɛ yóu timɔ́mmɔnti.

⁶ A nɔnnɛ̀ tinɑ́ɑǹtì tìì kó dimɑ̀ɑ̀ kɔ̀ùrì tìnti, kɛ mɔkɛ mɛciìmmɛ̀.

⁷ Kuyie mbo dɑ bɔ nsɑ̃́ɑ̃̀, kù bo dɑ uutɛ́ ɑ cĩ́ɛ̃̀tɛ̀ miɛkɛ kɛ́ dɑ dennɛ, kɛ́ dɑ dɛitɛ bɛfòùbɛ̀ miɛkɛ kɛtenkɛ̀ kiɛ nyĩ́nkɛ̀.

⁸ Bɛ̀ɛ̀ borimɛ wenni kɛ̀ bɛ̀ dɑ yɑ̀ kɛ kufɔ̃wɑɑ́ mbɛ̀ pĩ, kɛ̀ bɛ̀ ndɑ dɑú kɛ tú:

⁹ Ntɛnɛ̀ onìtì wèè do í yíé nKuyie mbo nhò kɑ̃nkɛ́mɛ̀, kòo yɛ̀mmɛ̀ ńnɑɑtinɛ̀ o kpɑ̀tì, ò do soutɛ́mu kɛ́kpenkɛ.

¹⁰ Mí m bo Kuyie ncĩ́ɛ̃̀tɛ̀ ntɛ kɛ dò mmutie mùù sɛ̀nti, kɛ búɔ́ Kuyie nkó mɛsɑ̀ɑ̀ nsɑ̃́ɑ̃̀.

¹¹ N yó nsɑ̃ntí fɔ̃́ nwe sɑ̃́ɑ̃̀ ɑ dɔ̀ɔ̀ dɛ̀ kpɛ́í, n yó mbúɔ́ fɔ̃́ nwe kɛ yɛ̃́ ɑ sɑ̀ɑ̀ mbonɛ̀mɛ̀ bɛ̀ɛ̀ dɑ dɔ́.