ⵉⵥⴻⵀⵀⵉⴷⴻⵏ 60
TTI1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵙ ⵜⴻⵖⵏⵉⵏⵜ ⵏ ‘ⵜⴰⵍⵉⵍⵍⴻⵛⵜ ⴷ ⴰⵛⴻⵀⵀⴰⴷ’. ⵜⵉⵔⴰ ⵉⵏⴻⵇⵛⴻⵏ ⵏ ⴷⴰⵡⵓⴷ ⵉ ⵓⵙⴻⵍⵎⴻⴷ. 2 ⵅ ⵍⴰⵎⵉ ⵜⵓⵖⴰ ⵉⵜⵜⵎⴻⵏⵖⴰ ⴰⴽ-ⴷ ⵉⵎⴻⵣⴷⴰⵖ ⵏ ⴰⵔⴰⵎ-ⵏⴰⵀⵔⴰⵢⵏ, ⴰⵇⴰ-ⵜⵜ ⴷ ⵎⵉⵙⵓⴱⵓⵜⴰⵎⵢⴰ, ⵓ ⴰⴽ-ⴷ ⴰⵢⵜ ⵏ ⴰⵔⴰⵎ ⵣⵉ ⵚⵓⴱⴰ, ⵓⵎⵉ ⴷⴷ-ⵉⴷⵡⴻⵍ ⵢⵓⵡⴰⴱ, ⵉⵡⵜⴰ ⴰⵢⵜ ⵏ ⵉⴷⵓⵎ ⴷⵉ ⵜⴻⵖⵣⵓⵔⵜ ⵏ ⵜⵎⴻⴵⴰⵃⵜ, ⵄⴻⵛⵔⴰ ⴰⵍⴰⴼ ⵏ ⵢⴻⵔⵢⴰⵣⴻⵏ. 3 ⴰ ⴰⵔⴻⴱⴱⵉ, ⵛⴻⴽ ⵜⴻⵏⴹⴰⵔⴻⴹ ⴰⵏⴻⵖ, ⵜⴰⵔⵥⵉⴷ ⴰⵏⴻⵖ. ⵜⵓⵖⴰ ⵜⴻⵙⵄⴰⵔⴻⴷ ⴰⵟⵟⴰⵙ! ⵙⴱⴻⴷⴷ ⴰⵏⴻⵖ ⵄⴰⵡⴻⴷ! 4 ⵛⴻⴽ ⵜⴻⵙⵙⴻⵏⵀⴻⵣⵣⴻⴷ ⵜⴰⵎⵎⵓⵔⵜ, ⵜⴼⴻⴵⵇⴻⴷ ⵜⵜ. ⵙⴳⴻⵏⴼⴰ ⵜⵉⵔⴻⵥⵥⴰ ⵏⵏⴻⵙ, ⵎⴰⵖⴰⵔ ⴰⵇⴰ ⵜᵉⵜⵜⴻⵏⵀⴻⵣⵣⴰ. 5 ⵛⴻⴽ ⵜⴻⵙⵙⴻⵛⵏⴻⴷ ⵉⵅⴻⴼ ⵏⵏⴻⵛ ⵉ ⵍⴳⴻⵏⵙ ⵏⵏⴻⵛ ⵙ ⵍⴻⵇⵙⴰⵃⴻⵜ. ⵛⴻⴽ ⵜⴻⵡⵛⵉⴷ ⴰⵏⴻⵖ ⴰⴷ ⵏⵙⵓ ⵛⵛⵔⴰⴱ ⵉⵙⵙⴷⴻⵡⵡⴰⵅⴻⵏ. 6 ⵉⵏⵏⵉ ⵛⴻⴽ ⵉⵜⵜⴻⴳⴳⵯⴻⴷⴻⵏ, ⵜⴻⴳⴳⵉⴷ ⴰⵙⴻⵏ ⵜⴰⵄⴻⴵⴰⵏⵜ ⵉ ⵖⴰⵔ ⵜⵜⵔⴰⴽⴽⵡⴰⵍⴻⵏ ⵣⵉ ⴼⵍⵉⵜⵛⴰⵜ ⵏ ⵍⵇⴻⵡⵙ. ⵙⵉⵍⴰⵀ. 7 ⵃⵉⵎⴰ ⵉⵎⵄⵉⵣⵣⴻⵏ ⵏⵏⴻⵛ ⴰⴷ ⵜⵜⵡⴰⴼⴻⴽⴽⴻⵏ, ⴰⵡⵉ ⴰⵙⴻⵏⵊⴻⵎ ⵙ ⵓⴼⵓⵙ ⴰⴼⵓⵙⵉ ⵏⵏⴻⵛ ⵓ ⴰⵔⵔ-ⴷⴷ ⵅⴰⵏⴻⵖ. 8 ⴰⵔⴻⴱⴱⵉ ⵜⵓⵖⴰ ⵉⵙⵙⴰⵡⴰⵍ ⴷⵉ ⵣⵣⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ, ⵙ ⵓⵢⴻⵏⵏⵉ ⴰⴷ ⵏⴻⴳⵣⴻⵖ ⵙ ⵍⴻⴼⵔⴰⵃⴻⵜ. ⵏⴻⵛⵛ ⴰⴷ ⴱⴹⵉⵖ ⵛⴰⴽⵉⵎ, ⴰⴷ ⵄⴻⴱⴱⴰⵔⴻⵖ ⵜⴰⵖⵣⵓⵔⵜ ⵏ ⵙⵓⴽⴽⵓⵜ. 9 ⵊⵉⵍⵄⴰⴷ ⵉⵏⵓ, ⵎⴰⵏⴰⵙⵙⴰ ⵉⵏⵓ, ⵉⴼⵔⴰⵢⵉⵎ ⴷ ⴰⵙⴻⵍⵇⵉ ⵉⵊⴻⵀⴷⴻⵏ ⵏ ⵓⵣⴻⴵⵉⴼ ⵉⵏⵓ, ⵢⴰⵀⵓⴷⴰ ⴷ ⴰⵎⴳⴻⵡⵡⴻⴷ ⵉⵏⵓ. 10 ⵎⵓ’ⴰⴱ ⴷ ⵙⵙⴰⵔⵉⵊ ⵉⵏⵓ ⵉ ⵓⵙⵉⵔⴷ, ⵅ ⵉⴷⵓⵎ ⴰⴷ ⵏⴹⴰⵔⴻⵖ ⵙⴰⵏⴷⴰⵍⵉⵢⴰⵜ ⵉⵏⵓ, ⵏⴻⵛⵛ ⴰⴷ ⴷⴷⵓⵇⵣⴻⵖ ⵙ ⵓⵙⵍⵉⵡⵍⴻⵡ ⵅ ⵜⴻⵎⵎⵓⵔⵜ ⵏ ⴼⵉⵍⵉⵛⵉⵜ. 11 ⵡⵉ ⴷ ⴰⵢⵉ ⵉ ⵖⴰ ⵉⵏⴻⴷⵀⴻⵏ ⴷⵉ ⵜⴻⵏⴷⵉⵏⵜ ⵉⴼⴰⵔⵢⴻⵏ? ⵡⵉ ⴷ ⴰⵢⵉ ⵖⴰ ⵉⴳⴻⵡⵡⴷⴻⵏ ⵖⴰⵔ ⵉⴷⵓⵎ? 12 ⵎⴰ ⵡⴰⵔ ⴷ ⴰⵏⴻⵖ ⵜⴻⵏⴹⴰⵔⴻⴷ, ⴰ, ⴰⵔⴻⴱⴱⵉ, ⵓ ⴰⴽ-ⴷ ⵍⵄⴻⵙⴽⴰⵔⴰⵜ ⵏⵏⴻⵖ ⵎⴰ ⵡⴰⵔ ⴰⴽⵉⴷⵙⴻⵏ ⴷⴷ-ⵜⴻⴼⴼⵉⵖⴻⴷ ⵄⴰⴷ, ⴰ ⴰⵔⴻⴱⴱⵉ? 13 ⴻⵡⵛ ⴰⵏⴻⵖ ⴰⴼⵓⵙ ⵃⵉⵎⴰ ⴰⴷ ⴰⵏⴻⵖ ⵜⴻⵙⵙⵏⴻⵊⵎⴻⴷ ⵣⵉ ⵍⴻⵃⵚⴰⵔⴻⵜ, ⵎⴰⵖⴰⵔ ⴰⵙⴻⵏⵊⴻⵎ ⵙ ⵓⴼⵓⵙ ⵏ ⵢⵉⵊⵊ ⵏ ⴱⵏⴰⴷⴻⵎ ⴰⵇⴰ-ⵜ ⴱⴰⵟⴻⵍ. 14 ⴰⴽ-ⴷ ⴰⵔⴻⴱⴱⵉ ⴰⴷ ⵏⴻⴳⴳ ⵙ ⵡⴻⵎⵃⴰⴷ, ⵏⴻⵜⵜⴰ ⴰⴷ ⵉⵄⴼⴻⵙ ⵅ ⵢⵉⵏⵏⵉ ⴷ ⴰⵏⴻⵖ ⵉⵃⴻⵚⵚⴰⵔⴻⵏ.