ⵉⵥⴻⵀⵀⵉⴷⴻⵏ 59
TTI1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ‘ⵡⴰⵔ ⵜ ⵜⵜⴰⵔⴻⴷⴷⴻⴵ!’ ⵏ ⴷⴰⵡⵓⴷ. ⵜⵉⵔⴰ ⵉⵏⴻⵇⵛⴻⵏ. ⵓⵎⵉ ⵛⴰⵡⵓⵍ ⵉⵊⵊⴰ ⴰⴷ ⵃⴹⴰⵏ ⵜⴰⴷⴷⴰⵔⵜ ⵏ ⴷⴰⵡⵓⴷ ⵃⵉⵎⴰ ⴰⴷ ⵜ ⵏⵖⴻⵏ. 2 ⴼⴻⴽⴽ ⴰⵢⵉ ⵣⵉ ⵍⵄⴻⴷⵢⴰⵏ ⵉⵏⵓ, ⴰ ⴰⵔⴻⴱⴱⵉ, ⵙⴳⴻⵄⵄⴻⴷ ⴰⵢⵉ ⵙⴻⵏⵏⴻⵊ ⵖⴰⵔ ⵓⵃⴻⵟⵟⵓ ⵣⴻⴳ ⵉⵏⵏⵉ ⵅⴰⴼⵉ ⵉⵜⵜⴻⴽⴽⴰⵔⴻⵏ. 3 ⴼⴻⴽⴽ ⴰⵢⵉ ⵣⴻⴳ ⵉⵏⵏⵉ ⵉⵜⵜⴻⴳⴳⴻⵏ ⵍⵖⴻⵛⵛ, ⵙⴻⵏⵊⴻⵎ ⴰⵢⵉ ⵣⴻⴳ ⵉⵔⵢⴰⵣⴻⵏ ⵏ ⵉⴷⴰⵎⵎⴻⵏ. 4 ⴰⵇⴰ, ⵅⵣⴰⵔ, ⵏⵉⵜⵏⵉ ⴳⴳⵉⵏ ⵉⵊⵊ ⵏ ⵍⴼⴻⵅ ⵉ ⵍⴻⵄⵎⴰⵔ ⵉⵏⵓ, ⴰⵢⵜ ⵏ ⴱⵓ-ⵚⵚⵓⵍⵟⴰ ⵎⵓⵏⴻⵏ ⵅⴰⴼⵉ. ⵡⴰⵔ ⴷⵉⵏ ⴰⵅⴻⵟⵟⵓ ⵓⵍⴰ ⴷ ⴷⴷⴻⵏⴱ ⵖⴰⵔⵉ, ⴰ ⵙⵉⴷⵉ! 5 ⵡⴰⵅⵅⴰ ⵡⴰⵔ ⴳⴳⵉⵖ ⵍⵊⴰⵔⵉⵎⴰ, ⴰⵇⴰ ⵏⵉⵜⵏⵉ ⵣⴻⵄⵎⴰ ⵓⵙⵉⵏ-ⴷⴷ ⵜⵜⴰⵣⵣⵍⴻⵏ-ⴷⴷ ⵖⴰⵔⵉ ⵓ ⵙⵙⵡⴻⵊⵊⴰⴷⴻⵏ ⵉⵅⴻⴼ ⵏⵙⴻⵏ. ⴼⴰⵇ, ⴰⵙ-ⴷⴷ ⵖⴰⵔ ⵓⵎⵙⴰⴳⴰⵔ ⴰⴽⵉⴷⵉ ⵓ ⵅⵣⴰⵔ. 6 ⵛⴻⴽ, ⴰ ⵙⵉⴷⵉ, ⴰⵔⴻⴱⴱⵉ ⵏ ⵍⵄⴻⵙⴽⴰⵔⴰⵜ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⴼⴰⵇ ⵃⵉⵎⴰ ⴰⴷ ⵜⵍⴻⵇⴼⴻⴷ ⵎⴰⵔⵔⴰ ⵍⴻⴳⵏⵓⵙ. ⵡⴰⵔ ⵜⵜⵃⵉⵏⵏⵉ ⵅ ⵓⵍⴰ ⴷ ⵉⵊⵊ ⵣⵉ ⵎⴰⵔⵔⴰ ⵉⵖⴻⴷⴷⴰⵔⴻⵏ ⵉⵏⵏⵉ ⵉⵜⵜⴻⴳⴳⴻⵏ ⵍⵖⴻⵛⵛ. ⵙⵉⵍⴰⵀ. 7 ⴰⵇⴰ ⵜⵜⵄⴻⵇⴱⴻⵏ ⵖⴰⵔ ⵜⵎⴻⴷⴷⵉⵜ, ⵜⵜⵣⵓⵏ ⴰⵎ ⵡⴻⵇⵣⵉⵏ, ⵜⵜⴻⵏⵏⴹⴻⵏ ⵉ ⵜⴻⵏⴷⵉⵏⵜ. 8 ⵅⵣⴰⵔ, ⵙ ⵓⵇⴻⵎⵎⵓⵎ ⵏⵙⴻⵏ ⵙⵙⵓⵙⵓⴼⴻⵏ ⵇⴰⵄ, ⵍⴻⵙⵢⵓⴼ ⵏⵙⴻⵏ ⴰⵇⴰ ⴰⵜⴻⵏ ⵅ ⵉⵢⴻⵏⵛⵉⵛⴻⵏ ⵏⵙⴻⵏ, ⵎⵉⵏⵣⵉ ⵎⴰⵏ ⵡⴻⵏ ⵉ ⵖⴰ ⵉⵙⵍⴻⵏ? 9 ⵛⴻⴽ ⵎⴰⵛⴰ, ⴰ ⵙⵉⴷⵉ, ⴰⴷ ⵅⴰⵙⴻⵏ ⵜⴹⴻⵃⵛⴻⴷ, ⵛⴻⴽ ⴰⴷ ⵜⵃⴻⵛⵛⴻⴷ ⵅ ⵎⴰⵔⵔⴰ ⵍⴻⴳⵏⵓⵙ. 10 ⴰ ⵊⵊⴻⵀⴷ ⵏⵏⴻⵙ, ⵏⴻⵛⵛ ⴰⴷ ⵜ ⵔⴰⵊⵉⵖ, ⵎⴰⵖⴰⵔ ⴰⵔⴻⴱⴱⵉ ⴷ ⵍⴱⵓⵔⵊ ⵉⵏⵓ ⵢⵓⵄⵍⴰⵏ. 11 ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵏ ⴰⵔⴻⴱⴱⵉ ⵉⵏⵓ ⴰⴷ ⴰⵢⵉ ⵜⵉⵣⵡⴰⵔ, ⴰⵔⴻⴱⴱⵉ ⴰⴷ ⴰⵢⵉ ⵢⴰⵔⵔ ⴰⴷ ⵥⴰⵔⴻⵖ ⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ. 12 ⵡⴰⵔ ⵜⴻⵏ ⵏⴻⵇⵇ ⵛⴰ, ⵎⴰⵃⴻⵏⴷ ⵍⴳⴻⵏⵙ ⵉⵏⵓ ⵡⴰⵔ ⵜ ⵉⵜⵜⴻⵜⵜⵓ. ⴻⵊⵊ ⵉ-ⵜⴻⵏ ⴰⴷ ⵡⴻⴷⴷⴰⵔⴻⵏ ⵙ ⵊⵊⴻⵀⴷ ⵏⵏⴻⵛ, ⵎⴻⵏⴹⴰⵔ ⵉ-ⵜⴻⵏ ⵙⵡⴰⴷⴷⴰⵢ, ⵎⴰⵖⴰⵔ ⵛⴻⴽ ⴷ ⵜⴰⵙⴻⴷⴷⴰⵔⵜ ⵏⵏⴻⵖ ⵉ ⵓⵙⴻⵍⵇⵉ, ⴰ ⵙⵉⴷⵉ ⵉⵏⵓ. 13 ⵅ ⴷⴷⵏⵓⴱ ⵏ ⵓⵇⴻⵎⵎⵓⵎ ⵏⵙⴻⵏ, ⵅ ⵡⴰⵡⴰⵍⴻⵏ ⵉ ⴷⴷ-ⵉⵜⵜⴻⴼⴼⵖⴻⵏ ⵣⴻⴳ ⵉⵢⴻⵏⵛⵉⵛⴻⵏ ⵏⵙⴻⵏ, ⵅ ⵓⵢⴰ ⴻⵊⵊ ⵉ-ⵜⴻⵏ ⴰⴷ ⵜⵜⵡⴰⵃⴻⴱⴱⵙⴻⵏ ⴷⵉ ⵏⵏⴼⴰⵅⴻⵜ ⵏⵙⴻⵏ, ⵓⵍⴰ ⵅ ⵏⵏⴻⵄⵍⴻⵜ ⵓ ⵅ ⵓⵅⴰⵔⵔⵉⵇ ⵏⵏⵉ ⵅⴻⴼ ⵜⵜⵃⴰⵔⴷⴻⵏ. 14 ⴽⴻⵃⵃⴻⴹ ⵉ-ⵜⴻⵏ ⴷⴻⴳ ⵡⴻⵙⵄⴰⵔ ⵏⵏⴻⵛ, ⴽⴻⵃⵃⴻⴹ ⵉ-ⵜⴻⵏ ⴰⵍⴰⵎⵉ ⵡⴰⵔ ⴵⵉⵏ ⵄⴰⴷ, ⴰⵔⵔ ⵉ-ⵜⴻⵏ ⴰⴷ ⵙⵙⵏⴻⵏ, ⴰⵇⴰ ⴰⵔⴻⴱⴱⵉ ⴷ ⵍⵃⴰⴽⴻⵎ ⴷⵉ ⵢⴰⵄⵇⵓⴱ, ⴰⵍ ⵜⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ. ⵙⵉⵍⴰⵀ. 15 ⴰⵇⴰ ⴰⴷ ⵄⴻⵇⴱⴻⵏ ⵖⴰⵔ ⵜⵎⴻⴷⴷⵉⵜ, ⵜⵜⵣⵓⵏ ⴰⵎ ⵡⴻⵇⵣⵉⵏ ⵓ ⵜⵜⴻⵏⵏⴹⴻⵏ ⵉ ⵜⴻⵏⴷⵉⵏⵜ. 16 ⴻⵊⵊ ⵉ-ⵜⴻⵏ ⵜⵜⴻⵎⵀⴰⴼⴰⵏ ⴷⴰ ⴷ ⴷⵉⵀⴰ ⵅ ⵎⴰⵛⵛⴰ, ⴻⵊⵊ ⵉ-ⵜⴻⵏ ⵅⴻⵏⵏⵉ ⴰⴷ ⵇⵇⵉⵎⴻⵏ ⵙⵙⵏⵓⵙⴰⵏ, ⵎⴰⵍⴰ ⵡⴰⵔ ⵊⵊⵉⵡⵏⴻⵏ, 17 ⵏⴻⵛⵛ ⴰⴷ ⵖⴻⵏⵏⵊⴻⵖ ⵅ ⵊⵊⵀⴻⴷ ⵏⵏⴻⵛ, ⵖⴰⵔ ⵜⴻⴼⴼⵓⵜ ⴰⴷ ⵙⵍⵉⵡⵍⴻⵡⴻⵖ ⵅ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ, ⵎⴰⵖⴰⵔ ⵜⵓⵖⴰ ⵛⴻⴽ ⴷ ⵉⵊⵊ ⵏ ⵍⴱⵓⵔⵊ ⵢⵓⵄⵍⴰⵏ ⵉ ⵏⴻⵛⵛ, ⴷ ⴰⵎⵛⴰⵏ ⵏ ⵜⴰⵔⴻⵡⵍⴰ ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ ⵉⵏⵓ. 18 ⵊⵊⴻⵀⴷ ⵉⵏⵓ, ⵏⴻⵛⵛ ⴰⴷ ⵣⴻⵀⵀⴷⴻⵖ ⵉ ⵛⴻⴽ, ⵎⴰⵖⴰⵔ ⵛⴻⴽ ⴰⵔⴻⴱⴱⵉ ⴷ ⵍⴱⵓⵔⵊ ⵉⵏⵓ ⵢⵓⵄⵍⴰⵏ, ⴰⵔⴻⴱⴱⵉ ⵏ ⵜⵎⴻⵅⵙⵉⵡⵜ ⵉⵏⵓ ⵉⵛⴻⵡⵡⴰⵔⴻⵏ.