ⴰⵡⴰⵍⴻⵏ ⵉⵡⴻⵥⵏⴻⵏ 12

1 ⵡⴻⵏⵏⵉ ⵉⵜⵜⴻⵅⵙⴻⵏ ⵜⵜⴰⵔⴱⵉⵢⵢⴻⵜ, ⵉⵜⵜⴻⵅⵙ ⵜⵓⵙⵙⵏⴰ, ⵎⴰⵛⴰ ⵡⴻⵏⵏⵉ ⵉⵛⴰⵔⵔⵀⴻⵏ ⴰⵡⴻⴱⴱⴻⵅ ⴰⵇⴰ ⵏⴻⵜⵜⴰ ⴷ ⴰⵇⴻⴼⴼⵓⵃ. 2 ⴱⵏⴰⴷⴻⵎ ⴷ ⴰⵚⴻⴱⵃⴰⵏ ⵉⵜⵜⴰⴼ ⴰⵔⴹⴰ ⵏ ⵙⵉⴷⵉ, ⵎⴰⵛⴰ ⴰⵔⵢⴰⵣ ⵉⵏⴻⴽⴽⵡⴰⵏ ⵜⴰⵃⵔⴰⵢⵎⴻⵛⵜ ⴰⴷ ⵜ ⵉⴱⴰⵔⵔⴻⵃ ⴷ ⴱⵓ-ⵓⵎⴰⵔⵡⴰⵙ. 3 ⴱⵏⴰⴷⴻⵎ ⵡⴰⵔ ⵉⵣⴻⵎⵎⴰⵔ ⴰⴷ ⵉⵇⵇⵉⵎ ⵉⴱⴻⴷⴷ ⵓⵎⵉ ⵉⵜⵜⴻⴳⴳ ⵍⵖⴰⵔ, ⵎⴰⵛⴰ ⴰⵥⵡⴰⵔ ⵏ ⵉⵎⵙⴻⴳⴳⴰⴷⴻⵏ ⵡⴰⵔ ⵉⵣⴻⵎⵎⴰⵔ ⴰⴷ ⵉⵏⵀⴻⵣⵣ. 4 ⵜⴰⵎⵖⴰⵔⵜ ⵉⵎⴻⵃⴹⴻⵏ ⴷ ⵜⵜⴰⵊ ⵏ ⵡⴻⵔⵢⴰⵣ ⵏⵏⴻⵙ, ⵎⴰⵛⴰ ⵜⴻⵏⵏⵉ ⵜ ⵢⴰⵔⵔⵉⵏ ⵉⵜⵜⵙⴻⴹⵃⴰ, ⴷ ⵜⴻⵏⵏⵉ ⴰⵎ ⵡⴰⵔⴻⵚⵚⵓⴹ ⴷⴻⴳ ⵉⵖⵙⴰⵏ ⵏⵏⴻⵙ. 5 ⵉⵅⴻⵎⵎⵉⵎⴻⵏ ⵏ ⵉⵎⵙⴻⴳⴳⴰⴷⴻⵏ ⴷ ⵍⵃⴻⵇⵇ, ⵉⵅⴰⵔⵔⵉⵚⴻⵏ ⵏ ⵉⵄⴻⴼⴼⴰⵏⴻⵏ ⴷ ⵍⵖⴻⵛⵛ ⵎⴰⵔⵔⴰ. 6 ⴰⵡⴰⵍⴻⵏ ⵏ ⵉⵄⴻⴼⴼⴰⵏⴻⵏ ⵍⴻⴱⵜⴻⵏ ⴷⴻⴳ ⵉⴷⴰⵎⵎⴻⵏ, ⵎⴰⵛⴰ ⴰⵇⴻⵎⵎⵓⵎ ⵏ ⵢⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ ⴰⴷ ⵜⴻⵏ ⵉⵙⵙⴻⵏⵊⴻⵎ. 7 ⵉⵄⴻⴼⴼⴰⵏⴻⵏ ⵜⵜⵏⴻⵇⵍⴰⴱⴻⵏ ⵓ ⵡⴰⵔ ⴵⵉⵏ ⵄⴰⴷ, ⵎⴰⵛⴰ ⵜⴰⴷⴷⴰⵔⵜ ⵏ ⵉⵎⵙⴻⴳⴳⴰⴷⴻⵏ ⴰⴷ ⵜⴻⵇⵇⵉⵎ ⵜⴱⴻⴷⴷ. 8 ⵉⵜⵜⵡⴰⵙⵙⴻⵎⵖⴰⵔ ⴱⵏⴰⴷⴻⵎ ⵄⵍⴰⵃⵙⴰⴱ ⵍⵇⴻⴷⴷ ⵏ ⵍⴻⵄⵇⴻⵍ ⵏⵏⴻⵙ, ⵎⴰⵛⴰ ⵡⴻⵏⵏⵉ ⴷⵉ ⵉⴵⴰ ⵡⵓⵍ ⵉⴼⴰⵔⵖⴻⵏ, ⴰⴷ ⵉⵜⵜⵡⴰⵙⵙⴻⵃⵇⴰⵔ. 9 ⵉⵃⵍⴰ ⵡⴻⵏⵏⵉ ⵡⴰⵔ ⵉⵃⴻⵙⵙⴱⴻⵏ ⵅ ⵉⵅⴻⴼ ⵏⵏⴻⵙ ⴰⵟⵟⴰⵙ, ⵎⴰⵛⴰ ⵖⴰⵔⴻⵙ ⵉⵊⵊ ⵏ ⵓⵎⵙⴻⵅⵅⴰⵔ, ⵅ ⵡⴻⵏⵏⵉ ⵉⵜⵜⵛⴻⵏⵏⵄⴻⵏ ⵙ ⵉⵅⴻⴼ ⵏⵏⴻⵙ, ⵎⴰⵛⴰ ⴰⵖⵔⵓⵎ ⵡⴰⵔ ⵖⴰⵔⴻⵙ ⵢⴻⴵⵉ. 10 ⴰⵎⵙⴻⴳⴳⴻⴷ ⵉⵙⵙⴻⵏ ⵍⴻⵄⵎⴰⵔ ⵏ ⵍⴻⴱⵀⵉⵎⴻⵜ ⵏⵏⴻⵙ, ⵎⴰⵛⴰ ⴰⵔⵔⴻⵃⵎⴰⵜ ⵏ ⵓⵄⴻⴼⴼⴰⵏ ⵇⴻⵙⵃⴻⵏⵜ. 11 ⵡⴻⵏⵏⵉ ⵉⵛⴰⵔⵔⵣⴻⵏ ⵜⴰⵎⵎⵓⵔⵜ ⵏⵏⴻⵙ, ⴰⴷ ⵉⵊⵊⴰⵡⴻⵏ ⵙ ⵡⴻⵖⵔⵓⵎ, ⵎⴰⵛⴰ ⵡⴻⵏⵏⵉ ⵢⴰⵔⴻⴷⴷⴼⴻⵏ ⵎⵉⵏ ⵉⴵⴰⵏ ⵉⵅⵡⴰⵏ, ⵡⴰⵔ ⵖⴰⵔⴻⵙ ⵛⴰ ⵡⵓⵍ ⵉⵎⵜⴻⵏ. 12 ⴰⵄⴻⴼⴼⴰⵏ ⵉⵜⵜⴻⵅⵙ ⵎⵉⵏ ⵉⴵⴰⵏ ⴷⵉ ⵜⵔⴰⵛⵛⴰ ⵏ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ, ⵎⴰⵛⴰ ⴰⵥⵡⴰⵔ ⵏ ⵉⵎⵙⴻⴳⴳⴰⴷⴻⵏ ⵉⵜⵜⵖⵉⵎⴰ ⵉⵜⵜⵉⵛ. 13 ⴷⴻⴳ ⵓⵅⴻⵟⵟⵓ ⵏ ⵉⵢⴻⵏⵛⵉⵛⴻⵏ ⴷⴰⵢⴻⵙ ⵉⵊⵊ ⵏ ⵍⴼⴻⵅ ⴷ ⴰⵄⴻⴼⴼⴰⵏ, ⵎⴰⵛⴰ ⴰⵎⵙⴻⴳⴳⴻⴷ ⴰⴷ ⵉⵏⵊⴻⵎ ⵣⵉ ⵍⴻⵃⵚⴰⵔⴻⵜ. 14 ⵣⵉ ⵍⵖⵉⴵⴻⵜ ⵏ ⵓⵇⴻⵎⵎⵓⵎ ⵏⵏⴻⵙ ⵉⵜⵜⵡⴰⵙⵙⵊⵉⵡⴻⵏ ⴱⵏⴰⴷⴻⵎ ⵙ ⵍⵅⵉⵔ, ⵎⵉⵏ ⴷⴷ-ⵜⵜⴰⵡⵢⴻⵏ ⵉⴼⴰⵙⵙⴻⵏ ⵏ ⴱⵏⴰⴷⴻⵎ ⴰⴷ ⵖⴰⵔⴻⵙ ⴷⴷ-ⵉⴷⵡⴻⵍ. 15 ⴰⴱⵔⵉⴷ ⵏ ⵓⴱⵓⵀⴰⵍⵉ ⵏⵉⵛⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵙ, ⵎⴰⵛⴰ ⵡⴻⵏⵏⵉ ⵉⵜⵜⴻⵙⵍⴰⵏ ⵉ ⵛⵛⵡⴰⵔ, ⴰⵇⴰ ⵏⴻⵜⵜⴰ ⴷ ⴰⵎⵉⵖⵉⵙ. 16 ⴰⴱⵓⵀⴰⵍⵉ ⵉⵙⵙⵛⴰⵏⴰ ⵍⵀⴻⵎⵎ ⵏⵏⴻⵙ ⴷⴻⴳ ⵡⴰⵙⵙ ⴷ ⵉⵊⵊ, ⵎⴰⵛⴰ ⵡⴻⵏⵏⵉ ⵉⴼⴻⵜⵜⵏⴻⵏ, ⵉⵜⵜⴷⴰⵍⴰ ⵍⴻⵃⵢⴰ ⵏⵏⴻⵙ. 17 ⵡⴻⵏⵏⵉ ⴷⴷ-ⵉⵏⴻⵟⵟⵇⴻⵏ ⵜⵉⴷⴻⵜⵜ, ⵉⵙⵙⵛⴰⵏⴰ ⵜⴰⵙⴻⴳⴷⴰ, ⵎⴰⵛⴰ ⴰⵛⴻⵀⵀⴰⴷ ⵉⵙⵙⵅⴰⵔⵔⵉⵇⴻⵏ ⵉⵙⵙⵛⴰⵏⴰ ⴰⵛⵎⴰⵜ. 18 ⴰⵇⴰ ⴷⵉⵏ ⵡⴻⵏⵏⵉ ⵉⵜⵜⵀⴰⵔⵡⴰⴹⴻⵏ ⴰⵎ ⵜⴻⵊⵊⵓⵜ ⵏ ⵙⵙⵉⴼ, ⵎⴰⵛⴰ ⵉⵍⴻⵙ ⵏ ⵉⵎⵉⵖⵉⵙⴻⵏ ⵉⵜⵜⴰⵡⵉ-ⴷⴷ ⴰⴳⴻⵏⴼⵓ. 19 ⵉⵢⴻⵏⵛⵉⵛⴻⵏ ⵉⵛⵛⵓⵔⴻⵏ ⵙ ⵜⵉⴷⴻⵜⵜ ⴰⴷ ⵜⵜⵡⴰⴹⵎⴻⵏ ⵉ ⵍⴻⴱⴷⴰ, ⵎⴰⵛⴰ ⵉⵍⴻⵙ ⵉⵙⵙⵅⴰⵔⵔⵉⵇⴻⵏ ⵎⵖⵉⵔ ⵉ ⵢⵉⵊⵊ ⵏ ⵓⵎⵓⵔ ⵡⴰⵀⴰ. 20 ⴰⵛⵎⴰⵜ ⴰⵇⴰ-ⵜ ⴷⴻⴳ ⵡⵓⵍ ⵏ ⵢⵉⵏⵏⵉ ⵉⵏⴻⴽⴽⵡⴰⵏ ⵜⵓⵄⴻⴼⴼⵏⴰ, ⵎⴰⵛⴰ ⵉ ⵢⵉⵏⵏⵉ ⵉⵏⴻⵙⵙⵃⴻⵏ ⵍⴻⵀⵏⴰ, ⴰⵇⴰ ⴷⵉⵏ ⵍⴻⴼⵔⴰⵃⴻⵜ. 21 ⴰⵎⵙⴻⴳⴳⴻⴷ ⵡⴰⵔ ⵜ ⵉⵍⴻⵇⵇⴻⴼ ⵍⵖⴻⵛⵛ, ⵎⴰⵛⴰ ⵉⵄⴻⴼⴼⴰⵏⴻⵏ ⴰⴷ ⵜⵜⵡⴰⵛⵛⵓⵔⴻⵏ ⵙ ⵍⵖⴰⵔ. 22 ⵉⵢⴻⵏⵛⵉⵛⴻⵏ ⵉⵙⵅⴰⵔⵔⵉⵇⴻⵏ ⴷ ⵏⵏⵄⵉ ⵉ ⵙⵉⴷⵉ, ⵎⴰⵛⴰ ⵉⵏⵏⵉ ⵉⵜⵜⴻⵎⵚⵓⵔⵔⵓⴼⴻⵏ ⵙ ⵍⴰⵎⴰⵏ ⵢⴰⵔⴹⴰⵏ ⴰⵙ. 23 ⴱⵏⴰⴷⴻⵎ ⵉⴼⴻⵜⵏⴻⵏ ⵉⵙⵙⴷⵓⵔⵔⵓⵢ ⵜⵓⵙⵙⵏⴰ ⵏⵏⴻⵙ, ⵎⴰⵛⴰ ⵓⵍ ⵏ ⵉⴱⵓⵀⴰⵍⵉⵢⵢⴻⵏ ⵉⵙⵖⵓⵢⵢⵓ ⵙ ⵜⵓⴱⴱⵓⵀⴻⵍⵢⴰ ⴷⵉ ⵍⴻⵅⵍⴰ. 24 ⴰⴼⵓⵙ ⵏ ⵡⴻⵏⵏⵉ ⵉⵎⴻⵃⴹⴻⵏ ⴰⴷ ⵉⵃⴽⴻⵎ, ⵎⴰⵛⴰ ⵍⴻⵄⴳⴻⵣ ⵉⵏⴻⴷⴷⴻⵀ ⵖⴰⵔ ⵜⴻⵙⵎⵓⵖⵉ. 25 ⴰⵎⵏⵓⵙ ⴷⴻⴳ ⵡⵓⵍ ⵏ ⴱⵏⴰⴷⴻⵎ ⵉⵙⵙⵀⴻⴽⴽⵡⴰ ⵉ-ⵜ, ⵎⴰⵛⴰ ⴰⵡⴰⵍ ⵉⵚⴻⴱⵃⴻⵏ ⵉⵙⵙⴼⴰⵔⵔⴰⵃ ⵉ-ⵜ. 26 ⴰⵎⵙⴻⴳⴳⴰⴷ ⵉⵙⵙⵛⴰⵏⴰ ⴰⴱⵔⵉⴷ ⵉ ⵊⵊⴰⵔ ⵏⵏⴻⵙ, ⵎⴰⵛⴰ ⴰⴱⵔⵉⴷ ⵏ ⵓⵄⴻⴼⴼⴰⵏ ⵢⴰⵔⵔⴰ ⵉ-ⵜⴻⵏ ⴰⴷ ⵡⴻⴷⴷⴰⵔⴻⵏ. 27 ⴰⵎⴻⵄⴳⵓⵣ ⵡⴰⵔ ⵉⴹⴻⴼⴼⴰⵔ ⵛⴰ ⴰⵏⴻⵢⵎⴰⵔ ⵏⵏⴻⵙ. ⵎⴰⵛⴰ ⴰⴳⵍⴰ ⵉⵖⵍⴰⵏ ⵏ ⵉⵡⴷⴰⵏ ⴰⵇⴰ ⴷ ⴰⵎⵃⴰⴹ. 28 ⴷⴻⴳ ⵓⵎⴻⵙⵔⵓⵇ ⵏ ⵜⵙⴻⴳⴷⴰ ⵜⴻⴵⴰ ⵜⵓⴷⴰⵔⵜ, ⴰⴱⵔⵉⴷ ⵏ ⵍⴰⵜⴰⵔ ⵏⵏⴻⵙ ⵡⴰⵔ ⴷⴰⵢⴻⵙ ⴱⵓ ⵍⵎⴻⵡⵜ.