ⴰⵡⴰⵍⴻⵏ ⵉⵡⴻⵥⵏⴻⵏ 10

1 ⴰⵡⴰⵍⴻⵏ ⵉⵡⴻⵣⵏⴻⵏ ⵏ ⵙⵓⵍⵉⵎⴰⵏ ⵉⵊⵊ ⵏ ⵎⵎⵉⵙ ⴷ ⴰⵎⵉⵖⵉⵙ ⵉⵙⵙⴼⴰⵔⵔⴰⵃ ⴱⴰⴱⴰⵙ, ⵎⴰⵛⴰ ⵉⵊⵊ ⵏ ⵓⴱⵓⵀⴰⵍⵉ ⵏ ⵎⵎⵉⵙ ⴷ ⵡⴻⵏⵏⵉ ⴷ ⴰⵎⵏⵓⵙ ⴰⵎⴻⵇⵇⵔⴰⵏ ⵏ ⵢⴻⵎⵎⴰⵙ. 2 ⵜⵉⵅⵓⴱⴰⵢ ⵏ ⵜⵓⵄⴻⴼⴼⵏⴰ ⵡⴰⵔ ⵏⵏⴻⴼⴼⵄⴻⵏⵜ, ⵎⴰⵛⴰ ⵜⴰⵙⴻⴳⴷⴰ ⵜᵉⵜⵜⴼⴻⴽⴽⴰ ⵣⵉ ⵍⵎⴻⵡⵜ. 3 ⵙⵉⴷⵉ ⵡⴰⵔ ⵉⵜⵜⴻⵊⵊⵉ ⵍⴻⵄⵎⴰⵔ ⵏ ⵉⵎⵙⴻⴳⴳⴰⴷⴻⵏ ⴰⴷ ⵉⵃⴻⵢⵢⴻⴼ, ⵎⴰⵛⴰ ⵎⴻⵥⵔⵉ ⵏ ⵉⵄⴻⴼⴼⴰⵏⴻⵏ ⵉⵄⴰⵔⵔⴻⵏ ⵉ-ⵜ ⵖⴰⵔ ⵍⴰⴳⴳⵯⴰⵊ. 4 ⵡⵉ ⵉⵅⴻⴷⴷⵎⴻⵏ ⵙ ⵓⴼⵓⵙ ⵢⴰⵔⵅⵓⵏ, ⵉⵜⵜⴰⵡⵉ-ⴷⴷ ⵣⵣⴻⵍⴹ, ⵎⴰⵛⴰ ⴰⴼⵓⵙ ⵏ ⵢⵉⵏⵏⵉ ⵉⵜⵜⵛⴻⵟⵟⴰⵔⴻⵏ ⵉⵜⵜⴰⵡⵉ-ⴷⴷ ⴰⴳⵍⴰ. 5 ⵡⴻⵏⵏⵉ ⵉⵢⴰⵔⵔⵡⴻⵏ ⴷⴻⴳ ⵓⵏⴻⴱⴷⵓ ⴷ ⵉⵊⵊ ⵏ ⵎⵎⵉⵙ ⵉⴼⴻⵀⵀⵎⴻⵏ, ⵎⴰⵛⴰ ⵡⴻⵏⵏⵉ ⵉⵜⵜⴻⵟⵟⵚⴻⵏ ⴷⵉ ⵜⵎⴻⵢⵔⴰ ⴷ ⵉⵊⵊ ⵏ ⵎⵎⵉⵙ ⵏ ⵍⴻⴼⴹⵉⵃⴻⵜ. 6 ⵍⴱⴰⵔⴰⴽⴰⵜ ⴰⵔⴻⵙⵙⴰⵏⵜ ⵅ ⵓⵣⴻⴵⵉⴼ ⵏ ⵉⵎⵙⴻⴳⴳⴰⴷⴻⵏ, ⵎⴰⵛⴰ ⵍⵄⵓⵏⴼ ⵉⵙⵙⴷⵓⵔⵔⵓⵢ ⴰⵇⴻⵎⵎⵓⵎ ⵏ ⵉⵄⴻⴼⴼⴰⵏⴻⵏ. 7 ⵍⵉⴷⴰⵔⴻⵜ ⵉ ⵓⵎⵙⴻⴳⴳⴻⴷ ⴰⴷ ⴷⴷ-ⵢⴰⵡⵉ ⵍⴱⴰⵔⴰⴽⴰ, ⵎⴰⵛⴰ ⵉⵙⴻⵎ ⵏ ⵉⵄⴻⴼⴼⴰⵏⴻⵏ ⴰⴷ ⵢⴰⵔⵚⵓⴹ. 8 ⵡⴻⵏⵏⵉ ⴷ ⴰⵎⵉⵖⵉⵙ ⴷⴻⴳ ⵡⵓⵍ, ⴰⴷ ⵉⵇⴱⴻⵍ ⵜⵉⵡⴻⵚⵚⴰ, ⵎⴰⵛⴰ ⵡⴻⵏⵏⵉ ⵉⵙⵙⴰⵡⴰⵍⴻⵏ ⵜⵓⴱⴱⵓⵀⴻⵍⵢⴰ ⵙ ⵉⵢⴻⵏⵛⵉⵛⴻⵏ ⵏⵏⴻⵙ, ⴰⴷ ⵉⵡⴹⴰ. 9 ⵡⴻⵏⵏⵉ ⵉⴳⴳⵓⵔⴻⵏ ⴷⵉ ⵍⴻⵚⴼⴰⵢⴻⵜ, ⵉⴳⴳⵓⵔ ⴷⵉ ⵍⴰⵎⴰⵏ, ⵎⴰⵛⴰ ⵡⴻⵏⵏⵉ ⵉⴳⴳⵓⵔⴻⵏ ⵉⴱⵔⵉⴷⴻⵏ ⵉⴼⴰⵔⵖⴻⵏ, ⴰⴷ ⵉⵜⵜⵡⴰⵙⵙⴻⵏ. 10 ⵡⴻⵏⵏⵉ ⵉⵜⵜⵖⴻⵎⵎⴰⵣⴻⵏ ⵙ ⵜⵉⵟⵟⴰⵡⵉⵏ, ⵉⵜⵜⴻⴳⴳ ⵍⴻⵃⵔⵉⵇ, ⵡⴻⵏⵏⵉ ⵉⵙⵙⴰⵡⴰⵍⴻⵏ ⵜⵓⴱⴱⵓⵀⴻⵍⵢⴰ ⵙ ⵉⵢⴻⵏⵛⵉⵛⴻⵏ ⵏⵏⴻⵙ, ⴰⴷ ⵉⵡⴹⴰ. 11 ⴰⵇⴻⵎⵎⵓⵎ ⵏ ⵓⵎⵙⴻⴳⴳⴻⴷ ⴷ ⵜⴰⵍⴰ ⵏ ⵜⵓⴷⴰⵔⵜ, ⵎⴰⵛⴰ ⵍⵄⵓⵏⴼ ⵉⵙⵙⴷⵓⵔⵔⵓⵢ ⴰⵇⴻⵎⵎⵓⵎ ⵏ ⵉⵄⴻⴼⴼⴰⵏⴻⵏ. 12 ⴰⵛⵔⴰⵀ ⵜⴻⵙⵙⴻⴽⴽⴰⵔⴰ-ⴷⴷ ⵉⵎⵛⵓⴱⴱⴻⵛⴻⵏ, ⵎⴰⵛⴰ ⵜⴰⵢⵔⵉ ⵜⴻⵙⵙⴷⵓⵔⵔⵓⵢ ⵎⴰⵔⵔⴰ ⵉⵅⴻⵟⵟⴰⵏ. 13 ⵅ ⵉⵢⴻⵏⵛⵉⵛⴻⵏ ⵏ ⵡⴻⵏⵏⵉ ⵖⴰⵔ ⵉⴵⴰ ⵍⴻⴼⵀⴰⵎⴻⵜ ⵜᵉⵜⵜⵡⴰⴼ ⵜⵉⵖⵉⵜ, ⵎⴰⵛⴰ ⴰⵄⵎⵓⴷ ⵉ ⵡⴻⵏⵏⵉ ⵡⴰⵔ ⵖⴰⵔ ⵉⴵⵉ ⴱⵓ ⵍⴻⵄⵇⴻⵍ. 14 ⵉⵎⵉⵖⵉⵙⴻⵏ ⵜⵜⵅⴻⵎⵎⴰⵔⴻⵏ ⵜⵓⵙⵙⵏⴰ, ⵎⴰⵛⴰ ⴰⵇⴻⵎⵎⵓⵎ ⵏ ⵓⴱⵓⵀⴰⵍⵉ ⵉⵜⵜⴰⴷⴻⵙ ⵖⴰⵔ ⵓⵀⴻⵍⵍⴻⴽ. 15 ⵉ ⴱⵓ-ⵡⴰⴳⵍⴰ ⵎⵉⵏ ⵉⴵⴰⵏ ⵏⵏⴻⵙ ⴷ ⵜⴰⵏⴷⵉⵏⵜ ⵉⵊⴻⵀⴷⴻⵏ ⵏⵏⴻⵙ, ⵍⴻⴱⵍⴰ ⵏ ⵉⵎⴻⵣⵍⴰⴹ ⴷ ⴰⵀⴻⵍⵍⴻⴽ ⵏⵙⴻⵏ. 16 ⵍⵖⵉⴵⴻⵜ ⵏ ⵓⵎⵙⴻⴳⴳⴻⴷ ⴰⵇⴰ-ⵜⵜ ⵉ ⵜⵓⴷⴰⵔⵜ, ⵍⵎⵓⵏⴻⵜ ⵏ ⵓⵄⴻⴼⴼⴰⵏ ⵉ ⴷⴷⴻⵏⴱ. 17 ⵡⴻⵏⵏⵉ ⵉⵃⴻⵟⵟⴰⵏ ⵜⵜⴰⵔⴱⵉⵢⵢⴻⵜ, ⴰⵇⴰ-ⵜ ⵅ ⵡⴻⴱⵔⵉⴷ ⵏ ⵜⵓⴷⴰⵔⵜ, ⵎⴰⵛⴰ ⵡⴻⵏⵏⵉ ⵉⵙⴻⵎⵎⵃⴻⵏ ⴷⴻⴳ ⵓⵡⴻⴱⴱⴻⵅ, ⴰⴷ ⵉⵡⴻⴷⴷⴰⵔ. 18 ⵡⵉ ⵉⵜⵜⴻⴼⴼⴰⵔⴻⵏ ⴰⵛⵔⴰⵀⵉ, ⵖⴰⵔⴻⵙ ⵉⵢⴻⵏⵛⵉⵛⴻⵏ ⵙⵙⵅⴰⵔⵔⵉⵇⴻⵏ, ⵡⵉ ⵉⵜⵜⵛⴻⵇⵇⴰⴼⴻⵏ ⴰⵇⴰ-ⵜ ⴷ ⴰⴱⵓⵀⴰⵍⵉ. 19 ⵖⴰⵔ ⵡⴰⵟⵟⴰⵙ ⵏ ⵡⴰⵡⴰⵍⴻⵏ ⵡⴰⵔ ⵉⵇⵇⵉⵎ ⵓⵅⴻⵟⵟⵓ ⵉⵏⴻⵇⵇⴻⵚ, ⵎⴰⵛⴰ ⵡⴻⵏⵏⵉ ⵉⵎⴻⵏⵏⵄⴻⵏ ⵉⵢⴻⵏⵛⵉⵛⴻⵏ ⵏⵏⴻⵙ, ⴰⵇⴰ ⵉⵜⵜⴻⴳⴳ ⵙ ⵍⴻⵄⵇⴻⵍ. 20 ⵏⵏⵓⵇⴰⵔⵜ ⵉⵇⵇⵓⵔⴻⵏ ⴷ ⵉⵍⴻⵙ ⵏ ⵓⵎⵙⴻⴳⴳⴻⴷ, ⵓⵍ ⵏ ⵉⵄⴻⴼⴼⴰⵏⴻⵏ ⵡⴰⵔ ⵉⵙⴻⴽⴽⵡⵉⵏ. 21 ⵉⵢⴻⵏⵛⵉⵛⴻⵏ ⵏ ⵉⵎⵙⴻⴳⴳⴰⴷⴻⵏ ⵙⵙⴻⵛⵛⴰⵏ ⴰⵟⵟⴰⵙ, ⵎⴰⵛⴰ ⵉⴱⵓⵀⴰⵍⵉⵢⵢⴻⵏ ⵎⵎⵓⵜⴻⵏ ⵓⵎⵉ ⵡⴰⵔ ⵖⴰⵔⵙⴻⵏ ⴱⵓ ⵡⵓⵍ ⵉⵎⵜⴻⵏ. 22 ⵍⴱⴰⵔⴰⴽⴰ ⵏ ⵙⵉⴷⵉ ⵜᵉⵜⵜⴰⵡⵉ-ⴷⴷ ⴰⴳⵍⴰ, ⴰⵔⴱⴻⵔ ⵏ ⴱⵏⴰⴷⴻⵎ ⵡⴰⵔ ⴷⴰⵢⴻⵙ ⵢⴰⵔⴻⵏⵏⵉ ⵡⴰⵍⵓ. 23 ⵉ ⵓⴱⵓⵀⴰⵍⵉ ⵜⴰⵎⴻⴳⴳⵉⵜ ⵏ ⵍⴻⴼⴹⵉⵀⴻⵜ ⴰⵎ ⵢⵉⵛⵜ ⵏ ⵍⵓⵔⴰⵔⴻⵜ, ⵎⴰⵛⴰ ⵉ ⵡⴻⵔⵢⴰⵣ ⵏ ⵍⴻⴼⵀⴰⵎⴻⵜ ⴰⴷⴻⴱⴱⴰⵔ ⵙ ⵜⵉⵖⵉⵜ ⴰⵎ ⵎⴰⵏ ⴰⵢⴰ. 24 ⵎⵉⵏ ⵣⵉ ⵉⵜⵜⴻⴳⴳⵯⴻⴷ ⵓⵄⴻⴼⴼⴰⵏ ⴰⴷ ⵜ ⵉⵍⵇⴻⴼ, ⵎⴰⵛⴰ ⴰⵙⵉⵜⴻⵎ ⵏ ⵉⵎⵙⴻⴳⴳⴰⴷⴻⵏ ⴰⴷ ⵢⵉⵍⵉ. 25 ⵎⴰⵍⴰ ⵜⴻⵄⴷⵓ-ⴷⴷ ⵜⵃⴰⵔⵢⴰⴹⵜ, ⴰⵄⴻⴼⴼⴰⵏ ⵡⴰⵔ ⵉⵜⵜⵖⵉⵎⵉ, ⵎⴰⵛⴰ ⴰⵎⵙⴻⴳⴳⴻⴷ ⴰⴷ ⵉⵇⵇⵉⵎ ⵉⵎⵜⴻⵏ ⵉ ⵍⴻⴱⴷⴰ. 26 ⴰⵎ ⴱⵉⵏⵓ ⴰⵙⴻⵎⵎⴰⵎ ⵉ ⵜⴻⵖⵎⴰⵙ ⴷ ⴷⴷⴻⵅⵅⴰⵏ ⵉ ⵜⵉⵟⵟⴰⵡⵉⵏ, ⴰⵎⵎⵓ ⵉ ⵉⴳⴳⴰ ⵓⵎⴻⵄⴳⵓⵣ ⵉ ⵢⵉⵏⵏⵉ ⵜ ⵉⵙⵙⴻⴽⴽⴻⵏ. 27 ⵜⵉⴳⴳⵯⵓⴷⵉ ⵏ ⵙⵉⴷⵉ ⵜⴰⵔⴻⵏⵏⵉ ⴷⴻⴳ ⵓⵙⵙⴰⵏ ⵉ ⵜⵓⴷⴰⵔⵜ, ⵎⴰⵛⴰ ⵉⵙⴻⴳⴳⵯⵓⵙⴰ ⵏ ⵉⵄⴻⴼⴼⴰⵏⴻⵏ ⵜⵜⵡⴰⵙⵙⵇⵓⴹⴹⴻⴹⴻⵏ. 28 ⵜⴰⵔⴰⵊⵉⵜ ⵏ ⵉⵎⵙⴻⴳⴳⴰⴷⴻⵏ ⴷ ⵍⴻⴼⵔⴰⵃⴻⵜ, ⵎⴰⵛⴰ ⵍⴰⵢⴰⵙ ⵏ ⵉⵄⴻⴼⴼⴰⵏⴻⵏ ⴳⴳⵓⵔ ⴰⴷ ⵉⴼⵏⴰ. 29 ⴰⴱⵔⵉⴷ ⵏ ⵙⵉⴷⵉ ⴷ ⵍⴱⵓⵔⵊ ⵉⵊⴻⵀⴷⴻⵏ ⵉ ⵡⴻⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ, ⵎⴰⵛⴰ ⴷ ⴰⵀⴻⵍⵍⴻⴽ ⵉ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵖⴻⵛⵛ. 30 ⴰⵎⵙⴻⴳⴳⴻⴷ ⵄⴻⵎⵎⴰⵔⵚ ⴰⴷ ⵉⵏⵀⴻⵣⵣ ⵉ ⵍⴻⴱⴷⴰ, ⵎⴰⵛⴰ ⵉⵄⴻⴼⴼⴰⵏⴻⵏ ⵡⴰⵔ ⵣⴻⴷⴷⵖⴻⵏ ⴷⵉ ⵜⴻⵎⵎⵓⵔⵜ. 31 ⴰⵇⴻⵎⵎⵓⵎ ⵏ ⵓⵎⵙⴻⴳⴳⴻⴷ ⵉⵜⵜⴰⵡⵉ-ⴷⴷ ⵜⵉⵖⵉⵜ ⵙ ⵡⴰⵟⵟⴰⵙ, ⵎⴰⵛⴰ ⵉⵊⵊ ⵏ ⵢⵉⵍⴻⵙ ⵉⵄⴻⵎⵎⴰⵔ ⵙ ⵍⴻⵅⴷⴰⵄⴰⵜ ⴰⴷ ⵉⵜⵜⵡⴰⵇⴻⵙⵙ. 32 ⵉⵢⴻⵏⵛⵉⵛⴻⵏ ⵏ ⵓⵎⵙⴻⴳⴳⴻⴷ ⵙⵙⵏⴻⵏ ⵎⵉⵏ ⵢⴰⵔⴹⴰⵏ, ⵎⴰⵛⴰ ⴰⵇⴻⵎⵎⵓⵎ ⵏ ⵓⵄⴻⴼⴼⴰⵏ ⵉⵙⵙⴻⵏ ⵍⴻⵅⴷⴰⵄⴰⵜ ⵡⴰⵀⴰ.