ⵉⵛⴰⵄⵢⴰ 26

1 ⴷⴻⴳ ⵡⴰⵙⵙ ⵏⵏⵉ ⴰⴷ ⵖⴻⵏⵏⵊⴻⵏ ⵉⵣⵍⵉ-ⵢⴰ ⴷⵉ ⵜⴻⵎⵎⵓⵔⵜ ⵏ ⵢⴰⵀⵓⴷⴰ: “ⵏⴻⵛⵛⵉⵏ ⵖⴰⵔⵏⴻⵖ ⵉⵛⵜ ⵏ ⵜⴻⵏⴷⵉⵏⵜ ⵉⵊⴻⵀⴷⴻⵏ, ⵏⴻⵜⵜⴰ ⵉⵙⵙⴱⴻⴷⴷ ‘ⴰⵙⴻⵏⵊⴻⵎ’ ⴷ ⵍⴻⵃⵢⵓⴹ ⴷ ⵍⴻⵇⵡⴰⵔⴰⵜ. 2 ⴰⵔⵣⵎⴻⵎ ⵜⵉⵡⵡⵓⵔⴰ, ⵎⴰⵃⴻⵏⴷ ⵍⴳⴻⵏⵙ ⴰⵎⵙⴻⴳⴳⴻⴷ ⴰⴷ ⴷⴷ-ⵢⴰⴷⴻⴼ, ⵍⴳⴻⵏⵙ ⵏⵏⵉ ⵉⵃⴻⵟⵟⴰⵏ ⵍⴰⵎⴰⵏ ⵉ ⵙⵉⴷⵉ ⵍⴻⴱⴷⴰ. 3 ⵙ ⵍⴱⴰⵍ ⵉⵎⵜⴻⵏ ⴰⵎ ⵜ ⵉⴵⴰ, ⵛⴻⴽ ⵜⵃⴻⵟⵟⵉⴷ ⵜ ⴷⵉ ⵍⴻⵀⵏⴰ, ⵡⴰⵀ ⴷⵉ ⵍⴻⵀⵏⴰ, ⵎⴰⵖⴰⵔ ⵍⴳⴻⵏⵙ ⵉⵜⵜⵛⴰⵍⴰ ⵅⴰⴽ." 4 “ⵜⴻⵛⵍⴻⵎ ⵅ ⵙⵉⴷⵉ ⵉ ⵍⴻⴱⴷⴰ, ⵎⴰⵖⴰⵔ ⴷⵉ ⵙⵉⴷⵉ, ⵙⵉⴷⵉ, ⵉ ⵜⴻⴵⴰ ⴷ ⵜⴰⵚⴹⴰⵔⵜ ⵏ ⵣⵣⵎⴰⵏⴰⵜ. 5 ⵎⴰⵖⴰⵔ ⵏⴻⵜⵜⴰ ⵉⵜⵜⴰⵔⵔⴰ ⴰⴷ ⴰⴹⴰⵔⴻⵏ ⵉⵏⵏⵉ ⵉⵣⴻⴷⴷⵖⴻⵏ ⴷⵉⵏⵏⵉ ⴷⵉ ⵍⵓⵄⵍⴰ, ⵜⴰⵏⴷⵉⵏⵜ ⵢⵓⵄⵍⴰⵏ ⴰⴷ ⵜⵜ ⵉⵙⵙⴻⵀⵡⴰ, ⴰⴷ ⵜⵜ ⵉⵙⵙⴻⵀⵡⴰ ⴰⵍ ⵜⴰⵎⵎⵓⵔⵜ, ⴰⴷ ⵜⵜ ⵉⵄⴰⵔⵏ ⴷⴻⴳ ⵓⵛⴰⵍ. 6 ⴰⴷ ⵅⴰⵙ ⵉⵄⴼⴻⵙ ⵓⴹⴰⵔ, ⵉⴹⴰⵔⴻⵏ ⵏ ⵡⴻⵏⵏⵉ ⵉⵜⵜⵡⴰⵃⵚⴰⵔⴻⵏ, ⵍⴰⵜⴰⵔⴰⵜ ⵏ ⵉⴹⴰⵔⴻⵏ ⵏ ⵉⵎⴻⵣⵍⴰⴹ." 7 “ⴰⴱⵔⵉⴷ ⵏ ⵓⵎⵙⴻⴳⴳⴻⴷ ⵉⵡⴰⵟⴰ, ⵏⵉⵛⴰⵏ ⵉ ⵉⴵⴰ ⵍⴰⵜⴰⵔ ⵏ ⵓⵎⵙⴻⴳⴳⴻⴷ, ⵛⴻⴽ ⵜᵉⵜⵜⵙⴻⴳⴳⴰⵎⴻⴷ ⵜ. 8 ⵓⵍⴰ ⴷⴻⴳ ⵡⴻⴱⵔⵉⴷ ⵏ ⵍⴻⵃⴽⴰⵎⴰⵜ ⵏⵏⴻⵛ, ⴰ ⵙⵉⴷⵉ, ⵜⵓⵖⴰ ⵏⴻⵙⵙⵉⵜⵉⵎ ⴰⵛ, ⵍⴻⵄⵎⴰⵔ ⵏⵏⴻⵖ ⵉⵎⵎⴻⵥⵔⵉ ⴷⴻⴳ ⵢⵉⵙⴻⵎ ⵏⵏⴻⵛ ⵓ ⴷⵉ ⵍⵉⴷⴰⵔⴻⵜ ⵏⵏⴻⵛ. 9 ⵜⵓⵖⴰ ⵍⴻⵄⵎⴰⵔ ⵉⵏⵓ ⵉⵜⵜⵡⴻⵃⵃⴰⵛ ⵉ ⵛⴻⴽ ⴷⵉ ⴵⵉⵍⴻⵜ, ⵓⵍⴰ ⴷ ⴱⵓⵃⴱⴻⵍ ⵉⵏⵓ ⴷⴰⵢⵉ, ⵜⵓⵖⴰ ⵢⴰⵔⴻⵣⵣⵓ ⵅⴰⴽ ⵙ ⵊⵊⴻⵀⴷ. ⵎⴰⵖⴰⵔ ⵎⴰⵍⴰ ⵍⴻⵃⴽⴰⵎⴰⵜ ⵏⵏⴻⵛ ⵓⵙⵉⵏⵜ-ⵉ-ⴷⴷ ⵅ ⵜⴻⵎⵎⵓⵔⵜ, ⴰⴷ ⵍⴻⵎⴷⴻⵏ ⵉⵎⴻⵣⴷⴰⵖ ⵏ ⵜⴻⵎⵎⵓⵔⵜ ⵜⴰⵙⴻⴳⴷⴰ." 10 “ⵎⴰⵍⴰ ⵉⵙⵙⵛⴻⵏ ⴱⵏⴰⴷⴻⵎ ⴰⵃⵉⵏⵏⵉ ⵉ ⵓⵄⴻⴼⴼⴰⵏ, ⵡⴰⵏⵉⵜⴰ ⵡⴰⵔ ⵉⵍⴻⵎⵎⴻⴷ ⵜⴰⵙⴻⴳⴷⴰ, ⵎⴰⵛⴰ ⴰⴷ ⵢⴻⴳⴳ ⵍⵖⴰⵔ ⴷⵉ ⵜⴻⵎⵎⵓⵔⵜ ⵉⵛⵛⵓⵔⴻⵏ ⵙ ⵜⵙⴻⴳⴷⴰ, ⵓ ⵡⴰⵔ ⵉⵥⴰⵔⵔ ⴰⵄⵓⴵⵉ ⵏ ⵙⵉⴷⵉ." 11 “ⴰ ⵙⵉⴷⵉ, ⴰⴼⵓⵙ ⵏⵏⴻⵛ ⵉⵜⵜⵡⴰⵙⵙⴳⴻⵄⵄⴰⴷ, ⵎⴰⵛⴰ ⵏⵉⵜⵏⵉ ⵡⴰⵔ ⵜ ⵜⵜⵡⵉⵍⵉⵏ. ⵡⴰⵅⵅⴰ ⴰⵎⴻⵏⵏⵉ ⴰⴷ ⵜ ⵥⴰⵔⴻⵏ ⵄⴰⴷ, ⵎⴰⵛⴰ ⴰⴷ ⵙⴻⴹⵃⴰⵏ ⵣⴻⴳ ⵡⴰⵙⴰⵎ ⵏⵏⴻⵛ ⵉ ⵍⴳⴻⵏⵙ ⵏⵏⴻⵛ, ⵡⴰⵀ, ⵜⵉⵎⴻⵙⵙⵉ ⴰⴷ ⵜⴻⵛⵛ ⵉⵖⵔⵉⵎⴻⵏ ⵏⵏⴻⵛ. 12 ⴰ ⵙⵉⴷⵉ, ⵍⵃⵓⴽⵎ ⵏⵏⴻⵛ ⵅⴰⵏⴻⵖ ⴰⴷ ⵢⵉⵍⵉ ⴷ ⵍⴻⵀⵏⴰ, ⵎⴰⵖⴰⵔ ⵛⴻⴽ ⵜⴽⴻⵎⵎⵍⴻⴷ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵖ ⴷⵉ ⵟⵟⵡⴻⵄ ⵏⵏⴻⵖ. 13 ⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵉⵙⵉⴷⵉⵜⴻⵏ ⵏⵏⴻⵖⵏⵉ ⵙⴻⴵⴹⴻⵏ ⵅⴰⵏⴻⵖ. ⵣⵣⴰⵢⴻⴽ ⵛⴻⴽ ⵡⴻⵃⵃⴷⴻⴽ ⴰⵇⴰ ⵏⴻⵜⵜⵉⴷⴰⵔ ⵉⵙⴻⵎ ⵏⵏⴻⵛ. 14 ⵉⵎⴻⵜⵜⴰⵏ ⵡⴰⵔ ⵜⵜⴻⴷⴷⴰⵔⴻⵏ ⵄⴰⵡⴻⴷ, ⵍⴻⵅⵢⴰⵍⴰⵜ ⵡⴰⵔ ⵜⵜⵏⴻⴽⴽⴰⵔⴰⵏ. ⵙ ⵓⵢⴰ ⵜⵅⴻⵍⴼⴻⴷ ⴰⵙⴻⵏ ⵙ ⵍⵖⴰⵔ ⵓⵛⴰ ⵜⴻⵇⴹⵉⴷ ⵜⴻⵏ. ⵛⴻⴽ ⵜⴻⴽⴽⵙⴻⴷ ⵎⴰⵔⵔⴰ ⵍⵄⴻⵇⵔⴰⵏ ⵅⴰⵙⴻⵏ. 15 ⴰ ⵙⵉⴷⵉ, ⵛⴻⴽ ⵜⴰⵔⵏⵉⴷ ⴷⵉ ⵍⴳⴻⵏⵙ-ⴰ, ⵛⴻⴽ ⵜⴰⵔⵏⵉⴷ ⴷⵉ ⵍⴳⴻⵏⵙ-ⴰ, ⵜᵉⵜⵜⵡⴰⵙⵙⵄⵓⴵⴻⴷ ⴷⴰⵢⴻⵙ, ⴰⵇⴰ ⵜⴻⵙⵙⵡⴻⵙⵄⴻⴷ ⵎⴰⵔⵔⴰ ⵉⵢⵎⵉⵔⴻⵏ ⵏ ⵜⴻⵎⵎⵓⵔⵜ." 16 “ⴰ ⵙⵉⴷⵉ, ⴷⵉ ⵍⴻⵃⵚⴰⵔⴻⵜ ⴰⵔⵣⵓⵏ ⵅⴰⴽ, ⵣⴻⴵⵄⴻⵏ ⵜⵉⵥⴰⴵⵉⵜⵉⵏ ⵏⵙⴻⵏ ⵙ ⵜⵃⴻⵙⵙⴻⵛⵜ, ⵓⵎⵉ ⵅⴰⵙⴻⵏ ⴷⴷ-ⵜⵓⵙⴰ ⵜⴰⵔⴱⵉⵢⵢⴻⵜ ⵏⵏⴻⵛ. 17 ⴰⵎ ⵎⴰⵎⵎⴻⵛ ⵜᵉⵜⵜⵏⴻⵣⴱⴰⵔ ⵉⵛⵜ ⵏ ⵜⴻⵎⵖⴰⵔⵜ ⵙ ⴷⴷⴻⵢⵙⴻⵜ, ⵜⴻⵏⵏⵉ ⵉⴳⴳⵓⵔⴻⵏ ⴰⴷ ⵜⴰⵔⵓ ⴰⵃⴻⵏⵊⵉⵔ ⵏⵏⴻⵙ ⵓ ⵜⴻⵙⵖⵓⵢⵢⵓ ⵙ ⵍⴻⵡⵊⴻⵄ ⵏ ⵜⴰⵔⵓⵜ ⵏⵏⴻⵙ, ⴰⵎⵎⵓ ⵉ ⴷ ⴰⵏⴻⵖ ⵜⵓⵖⴰ ⵏⴻⵛⵛⵉⵏ, ⴰ ⵙⵉⴷⵉ, ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵛ. 18 ⵜⵓⵖⴰ ⵏⴻⵛⵛⵉⵏ ⴰⵅⵎⵉ ⵏⴻⴽⵙⵉ ⵙ ⴷⴷⴻⵢⵙⴻⵜ, ⵉⵎⵏⴻⵄ ⴰⵏⴻⵖ ⵍⴻⵃⵔⵉⵇ ⵏ ⵜⴰⵔⵡⴰ, ⵜⵓⵖⴰ ⵏⴻⵛⵛⵉⵏ ⴰⵅⵎⵉ ⵏⵓⵔⵓ ⴰⵙⴻⵎⵎⵉⴹ. ⵡⴰⵔ ⴷⴷ-ⵏⵉⵡⵉ ⴰⵙⴻⵏⵊⴻⵎ ⵉ ⵜⴻⵎⵎⵓⵔⵜ, ⵓ ⵉⵎⴻⵣⴷⴰⵖ ⵏ ⴷⴷⵓⵏⴻⵛⵜ ⵡⴰⵔ ⴷⴷ-ⵜⵜⵡⴰⵅⴻⵍⵇⴻⵏ." 19 “ⵉⵎⴻⵜⵜⴰⵏ ⵏⵏⴻⵛ ⴰⴷ ⴷⴷⴰⵔⴻⵏ! ⵍⵅⴻⵛⴱⴰⵜ ⵉⵏⵓ ⴰⴷ ⴱⴻⴷⴷⴻⵏⵜ! ⴼⴰⵇⴻⵎ, ⵓⵛⴰ ⵙⵍⵉⵡⴻⵍⵡⴻⵎ ⴽⴻⵏⵏⵉⵡ, ⵉⵏⵏⵉ ⵉⵣⴻⴷⴷⵖⴻⵏ ⴷⴻⴳ ⵓⵛⴰⵍ! ⴰⵇⴰ ⵏⵏⴷⴰ ⵏ ⵜⴼⴰⵡⵉⵏ ⴰⵎ ⵏⵏⴷⴰ ⵏⵏⴻⵛ, ⵓⵛⴰ ⵜⴰⵎⵎⵓⵔⵜ ⴰⴷ ⵜⴰⵔⵓ ⵍⴻⵅⵢⴰⵍⴰⵜ ⵏ ⵉⵎⴻⵜⵜⴰⵏ." 20 “ⵓⵢⵓⵔ, ⴰ ⵍⴳⴻⵏⵙ ⵉⵏⵓ, ⴰⴷⴻⴼ ⵖⴰⵔ ⵉⵅⵅⴰⵎⴻⵏ ⵏⵏⴻⵛ ⵏ ⴷⴰⵅⴻⵍ, ⴱⴻⵍⵍⴻⵄ ⵜⵉⵡⵡⵓⵔⴰ ⴰⵡⴰⵔⵏⵉ ⴰⵛ. ⵙⵏⵓⴼⴼⴰⵔ ⵉⵅⴻⴼ ⵏⵏⴻⵛ ⵍⵇⴻⴷⴷ ⵏ ⵉⵛⵜ ⵏ ⵜⵣⴻⵃⵣⵉⵃⵜ ⴰⵍ ⴷⴷ ⵉⵄⴷⵓ ⵡⴻⵙⵅⴻⴹ. 21 ⵎⴰⵖⴰⵔ ⵅⵣⴰⵔ, ⵙⵉⴷⵉ ⴰⴷ ⵉⴼⴼⴻⵖ ⵣⴻⴳ ⵡⴻⵎⵛⴰⵏ ⵏⵏⴻⵙ ⵎⴰⵃⴻⵏⴷ ⴰⴷ ⵉⵅⵍⴻⴼ ⵉ ⵉⵎⴻⵣⴷⴰⵖ ⵏ ⵜⴻⵎⵎⵓⵔⵜ ⵍⵎⵓⵄⵚⵉⵢⵢⴻⵜ ⵏⵙⴻⵏ, ⵓⵛⴰ ⵜⴰⵎⵎⵓⵔⵜ ⴰⴷ ⵜⵄⴰⵔⵔⴰ ⵉⴷⴰⵎⵎⴻⵏ ⵉ ⵅⴰⵙ ⵉⵜⵜⵡⴰⵙⵙⵉⵣⵍⴻⵏ, ⵡⴰⵔ ⵜⵅⴻⵎⵎⵉⵍ ⵄⴰⴷ ⵉⵏⵏⵉ ⵅⴰⵙ ⵉⵜⵜⵡⴰⵏⵖⴻⵏ."