ⵉⵛⴰⵄⵢⴰ 25

1 “ⴰ ⵙⵉⴷⵉ, ⵛⴻⴽ ⴷ ⴰⵔⴻⴱⴱⵉ ⵉⵏⵓ, ⵏⴻⵛⵛ ⴰⴷ ⵛⴻⴽ ⵙⵙⵄⵓⴵⴻⵖ, ⴰⴷ ⵚⴻⴱⴱⵃⴻⵖ ⵉⵙⴻⵎ ⵏⵏⴻⵛ, ⵎⴰⵖⴰⵔ ⵛⴻⴽ ⵜⴻⴳⴳⵉⴷ ⵍⴻⵄⵊⴻⴱ, ⴰⵟⵟⴰⵙ ⵏ ⵛⵛⵡⴰⵔ ⵏⵏⴻⵛ ⵣⴻⴳ ⵡⴻⵛⵃⴰⵍ ⵓⵢⴰ, ⴰⵇⴰ-ⵜ ⴷ ⵜⵉⴷⴻⵜⵜ ⵓ ⴷⴰⵢⴻⵙ ⵍⴰⵎⴰⵏ. 2 ⵛⴻⴽ ⵜⴰⵔⵔⵉⴷ ⵜⴰⵏⴷⵉⵏⵜ ⴷ ⴰⵄⵓⵔⵔⵉⵛ ⵏ ⵢⴻⵥⵔⴰ, ⵜⴰⵏⴷⵉⵏⵜ ⵉⵜⵜⵡⴰⵙⵙⵊⴻⵀⴷⴻⵏ ⴷ ⵍⵅⵉⵔⴱⴻⵜ, ⵍⴻⵇⵚⴰⵔ ⵏ ⵉⴱⴰⵔⵔⴰⵏⵉⵢⵢⴻⵏ ⴷⵉ ⵜⴰⵏⴷⵉⵏⵜ, ⵡⴰⵔ ⵜ ⵙⵙⴱⴻⴷⴷⵉⵏ ⵄⴻⵎⵎⴰⵔⵚ ⵄⴰⵡⴻⴷ. 3 ⵅ ⵓⵢⴰ ⴰⴷ ⵛⴻⴽ ⵉⵙⵙⵄⵓⴵⴰ ⵉⵊⵊ ⵏ ⵍⴳⴻⵏⵙ ⵉⵊⵀⴻⴷ, ⵜⴰⵏⴷⵉⵏⵜ ⵏ ⵍⴻⴳⵏⵓⵙ ⵉⵇⴻⵙⵃⴻⵏ ⴰⵟⵟⴰⵙ ⴰⴷ ⵣⵣⴰⵢⴻⴽ ⵜⴻⴳⴳⵯⴻⴷ. 4 ⵎⴰⵖⴰⵔ ⵜⵓⵖⴰ ⵛⴻⴽ ⴷ ⵍⵇⴻⵍⵄⴰ ⵉ ⵓⵎⴰⵔⵅⵓ, ⴷ ⵍⵇⴻⵍⵄⴰ ⵉ ⵓⵎⴻⵣⵍⵓⴹ ⵅⵎⵉ ⵉⵜⵜⵏⴻⵃⵚⴰⵔ, ⵛⴻⴽ ⴷ ⴰⴷⵓⵔⵔⵉ ⵉ ⵡⴻⵏⵥⴰⵔ ⵉⵛⵛⴰⵜⴻⵏ, ⵓⵍⴰ ⴷ ⵜⵉⵍⵉ ⴷⵉ ⵍⴻⵃⵎⵓ ⵎⵉⵏⵣⵉ ⵍⵃⴰⵔⴰⵊ ⵏ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵛⵜ ⴰⵇⴰ-ⵜ ⴰⵎ ⵡⴻⵏⵥⴰⵔ ⵉⵛⵛⴰⵜⴻⵏ ⵅ ⵍⵃⵉⴹ. 5 ⴰⵎ ⵍⴻⵃⵎⵓ ⴷⴻⴳ ⵉⵊⵊ ⵏ ⵡⴻⵎⵛⴰⵏ ⵢⵓⵥⴻⵖ, ⴰⵎⵎⵓ ⵉ ⵖⴰ ⵜⴻⵙⵙⴻⵖⴷⴻⴷ ⵍⵃⴰⵔⴰⵊ ⵏ ⵉⴱⴰⵔⵔⴰⵏⵉⵢⵢⴻⵏ, ⴰⵎ ⵜⵉⵍⵉ ⵏ ⵓⵙⴻⵢⵏⵓ ⵜⴻⵙⵙⴻⵙⵎⵉⴹ ⵍⴻⵀⵎⵓ, ⴰⵎⵎⵓ ⵉ ⵖⴰ ⵉⵜⵜⵡⴰⵙⵙⴻⵖⴷ ⵉⵣⵍⵉ ⵏ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵛⵜ." 6 “ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⴰⴷ ⵉⵙⵙⴻⵡⵊⴻⴷ ⵅ ⵡⴻⴷⵔⴰⵔ-ⴰ ⵉⵛⵜ ⵏ ⵣⵣⴰⵔⴷⴻⵜ ⵙ ⵎⴰⵛⵛⴰ ⵜⴻⵛⵛⵓⵔ ⵙ ⵜⴰⴷⵓⵏⵜ ⵅ ⵡⴻⴷⵔⴰⵔ-ⴰ ⵉ ⵎⴰⵔⵔⴰ ⵔⴻⴳⵏⵓⵙ, ⵉⵛⵜ ⵏ ⵣⵣⴰⵔⴷⴻⵜ ⵙ ⴱⵉⵏⵓ ⵉⵚⴻⴱⵃⴻⵏ ⵇⴰⵄ, ⵙ ⵉⵛⵜ ⵏ ⵎⴰⵛⵛⴰ ⵜⴻⵛⵛⵓⵔ ⵙ ⵜⴰⴷⵓⵏⵜ ⴷ ⵡⴰⴷⵓⴼ, ⵙ ⴱⵉⵏⵓ ⵉⵚⴻⴱⵃⴻⵏ ⵉⵚⴼⴰⵏ. 7 ⵏⴻⵜⵜⴰ ⴰⴷ ⵉⴱⴻⵟⵟⴻⵍ ⵅ ⵡⴻⴷⵔⴰⵔ-ⴰ ⴰⵍⴻⵃⵃⴰⴼ ⵉ ⵣⵉ ⵜⵜⵍⴻⵃⵃⴰⴼⴻⵏ ⵎⴰⵔⵔⴰ ⵍⴻⴳⵏⵓⵙ ⵓⵍⴰ ⴷ ⴷⴷⵓⵔⵉ ⵉ ⵣⵉ ⵜⵜⵡⴰⵙⵙⴷⵓⵔⵔⵓⵢⴻⵏ ⵎⴰⵔⵔⴰ ⵍⴻⴳⵏⵓⵙ. 8 ⵏⴻⵜⵜⴰ ⴰⴷ ⵉⵙⴰⵔⴹ ⵍⵎⴻⵡⵜ ⵉ ⵍⴻⴱⴷⴰ ⵓⵛⴰ ⵙⵉⴷⵉ ⵉⵏⵓ, ⵙⵉⴷⵉ, ⴰⴷ ⵉⵎⵙⴻⵃ ⵉⵎⴻⵟⵟⴰⵡⴻⵏ ⵣⵉ ⵎⴰⵔⵔⴰ ⵉⵖⴻⵎⴱⴰⴱ, ⴰⴷ ⵉⴽⴽⴻⵙ ⵍⴻⴼⴹⵉⵃⴻⵜ ⵏ ⵍⴳⴻⵏⵙ ⵏⵏⴻⵙ ⵣⵉ ⵎⴰⵔⵔⴰ ⵜⴰⵎⵎⵓⵔⵜ, ⵎⴰⵖⴰⵔ ⴰⵎⵎⵓ ⵉ ⵉⵏⵏⴰ ⵙⵉⴷⵉ." 9 “ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵏⵉⵏ: ‘ⴰⵇⴰ ⴷⴰ, ⵡⴰ ⴷ ⴰⵔⴻⴱⴱⵉ ⵏⵏⴻⵖ, ⵅⴰⵙ ⵉ ⵏⴻⴳⴳⴰ ⴰⵙⵉⵜⴻⵎ ⵏⵏⴻⵖ ⵓ ⵏⴻⵜⵜⴰ ⴰⴷ ⴰⵏⴻⵖ ⵉⵙⵙⴻⵏⵊⴻⵎ. ⵡⴰ ⴷ ⵙⵉⴷⵉ ⵏⵏⵉ ⵅ ⵏⴻⴳⴳⴰ ⴰⵙⵉⵜⴻⵎ ⵏⵏⴻⵖ, ⴰⴷ ⵏⴻⵙⵍⵉⵡⵍⴻⵡ, ⴰⴷ ⵏⴼⴰⵔⵃ ⵅ ⵓⵙⴻⵏⵊⴻⵎ ⵏⵏⴻⵙ!’ 10 ⵎⴰⵖⴰⵔ ⴰⴼⵓⵙ ⵏ ⵙⵉⴷⵉ ⴰⴷ ⵢⴰⵔⵙ ⵅ ⵡⴻⴷⵔⴰⵔ-ⴰ, ⵎⴰⵛⴰ ⵎⵓ’ⴰⴱ ⴰⴷ ⵉⵜⵜⵡⴰⴷⴷⴻⵣ ⴷⵉ ⵜⴻⵎⵎⵓⵔⵜ ⵏⵏⴻⵙ, ⴰⵎ ⵎⴰⵎⵎⴻⵛ ⵉⵜⵜⵡⴰⴷⴷⴻⵣ ⵓⵍⵓⵎ, ⴰⴷ ⵉⴷⵡⴻⵍ ⴷ ⵜⴰⵣⵓⴱⴰⵛⵜ. 11 ⵎⵓ’ⴰⴱ ⴰⴷ ⴷⴰⵢⴻⵙ ⵉⴱⴻⵣⵣⴻⵄ ⵙ ⵉⴼⴰⵙⵙⴻⵏ ⵏⵏⴻⵙ, ⴰⵎ ⵓⴼⴻⵜⵜⴰⵃ ⴷⴻⴳ ⵡⴻⴼⵜⴰⵃ. ⴰⵔⴻⴱⴱⵉ ⴰⴷ ⵉⵙⵙⴰⴹⴰⵔ ⵏⵏⴼⴰⵅⴻⵜ ⵏⵏⴻⵙ ⵊⵎⵉⵄ ⴰⴽ-ⴷ ⵎⴰⵔⵔⴰ ⵎⵉⵏ ⵉⵣⴻⵎⵎⴰⵔ ⴰⴷ ⵉⴳⴳ ⵙ ⵜⴻⵃⵔⴰⵢⵎⴻⵛⵜ ⵏ ⵉⴼⴰⵙⵙⴻⵏ ⵏⵏⴻⵙ. 12 ⵏⴻⵜⵜⴰ ⴰⴷ ⵉⵀⴷⴻⵎ ⵍⴱⵓⵔⵊ ⵏ ⵉⵖⴻⴱⵍⴰⵡⴻⵏ ⵏⵏⴻⵛ ⵢⵓⵄⵍⴰⵏ, ⴰⴷ ⵜⴻⵏ ⵉⵙⵙⴻⵀⵡⴰ, ⴰⴷ ⵜⴻⵏ ⵉⵎⵎⴻⵏⴹⴰⵔ ⵖⴰⵔ ⵜⴻⵎⵎⵓⵔⵜ, ⴷⴻⴳ ⵓⵛⴰⵍ."